فوتو: istockphoto.com
جاڭا ءتاسىل قۇقىق بۇزۋشىلىقتاردىڭ ناقتى ساناتتارىنا جەدەل ارەكەت ەتۋگە جانە ولاردىڭ سەبەپتەرىن جويۋعا باعىتتالادى. سونداي-اق, پروفيلاكتيكالىق جۇيەگە ۆيكتيمولوگيالىق تەتىكتەر ەنگىزىلىپ, ىقتيمال قۇربانداردىڭ سانىن ازايتۋعا باسىمدىق بەرىلەدى. بۇل شارالار قاۋىپتى ايماقتاردا باقىلاۋدى كۇشەيتۋدى, ازاماتتاردى قاقتىعىستاردى بەيبىت جولمەن شەشۋگە جانە ءوزىن-ءوزى قورعاۋعا ۇيرەتۋدى, سونداي-اق زورلىق-زومبىلىق قۇرباندارىن انىقتاپ, ولارعا كومەك كورسەتۋدى قامتيدى.
سونىمەن قاتار, زاڭ جوباسىندا «قوعامدىق ورىن» ۇعىمى ناقتى انىقتالىپ, پروفيلاكتيكالىق شارالاردى قولدانۋدىڭ بىرىڭعاي قۇقىقتىق نەگىزى جاسالعان.
«اكىمشىلىك قۇقىق بۇزۋشىلىق تۋرالى كودەكستە ەنگىزىلگەن وزگەرىستەر زاڭسىز كونتەنتتى ورنالاستىرعانى جانە تاراتقانى ءۇشىن, سونداي-اق قۇقىق بۇزۋشىلىققا ىقپال ەتەتىن سەبەپتەر مەن جاعدايلاردى جويۋ تۋرالى مەملەكەتتىك بۇيرىقتاردى قاساقانا ورىنداماعانى ءۇشىن جاۋاپكەرشىلىك بەلگىلەنگەن. بۇل رەتتە قۇقىقتىق بىرىزدىلىكتى قامتاماسىز ەتۋ ءۇشىن الەۋمەتتىك كودەكسكە جانە ءۇش زاڭعا وزگەرىستەر مەن تولىقتىرۋلار ەنگىزىلەدى», دەپ حابارلادى ءماجىلىستىڭ ءباسپاسوز قىزمەتى.
