سىرعا تابان تىرەگەن فەستيۆال قوناقتارى العاشقى كۇنى قورقىت بابانىڭ كەسەنەسىنە بارىپ, بابا رۋحىنا تاعزىم ەتتى. مەموريالدى كەشەننىڭ امفيتەاترىندا وتكەن فەستيۆالعا قاتىسۋشىلاردىڭ «قورقىت سازى» اتتى كونتسەرتىنىڭ كورەرمەنى كوپ بولدى. ال «قورقىت مۇراسى: تۇركى الەمىنە ورتاق ەپيكالىق قۇندىلىقتار» تاقىرىبىندا وتكەن حالىقارالىق عىلىمي-تەوريالىق كونفەرەنتسيادا عالىمدار ۇلى ويشىلدىڭ ورتاق مۇراسىن ساقتاپ, كەڭىنەن ناسيحاتتاۋ باعىتىندا ەركىن پىكىر الماستى.
كونفەرەنتسيانى اشقان وبلىس اكىمى نۇرلىبەك نالىباەۆ عاسىر بۇرىن ەل بايتاعى اتانعان قىزىلورداعا الىس-جاقىننان كەلگەن قوناقتارعا العىسىن جەتكىزىپ, مەملەكەت باسشىسى باستاماشى بولعان «تۇركى الەمىنىڭ كەلەشەگى – 2040» قۇجاتى اياسىندا ورتاق قۇندىلىقتاردى دارىپتەۋ ماڭىزدى باسىمدىق ەكەنىن اتاپ ايتتى.
«بۇگىندە قورقىت مۇراسىن زەرتتەۋ – وتكەندى تانۋ عانا ەمەس, بولاشاعىمىزعا باعىتتالعان رۋحاني ميسسيا. وسى ماقساتتاعى عىلىمي ىزدەنىستەر مەن حالىقارالىق بايلانىستار تۇركى حالىقتارىنىڭ مادەني تۇتاستىعىن نىعايتۋعا, رۋحاني ۇندەستىگىن ارتتىرۋعا زور ۇلەس قوستى», دەدى نۇرلىبەك نالىباەۆ.
كونفەرەنتسيادا «تۇركى مادەنيەتى جانە مۇراسى» قورىنىڭ پرەزيدەنتى اقتوتى رايىمقۇلوۆا ءتۇبى ءبىر تۇركىنىڭ باسىن قوسقان ونەر فەستيۆالى ۇلتتىق مادەنيەتتىڭ بيىگى بولەك برەندىنە اينالعانىنا توقتالدى. ازەربايجان ۇلتتىق عىلىم اكادەمياسى فولكلور ينستيتۋتىنىڭ ديرەكتورى حيكمەت كۋليەۆ, قىرعىز رەسپۋبليكاسى ۇلتتىق عىلىم اكادەمياسى ش.ايتماتوۆ اتىنداعى ءتىل جانە ادەبيەت ينستيتۋتىنىڭ باس عىلىمي قىزمەتكەرى, فيلولوگيا عىلىمدارىنىڭ دوكتورى جىلدىز وروزوبەكوۆا, قاجى بايرام ۆەلي اتىنداعى انكارا ۋنيۆەرسيتەتىنىڭ پروفەسسورى مەحمەت چەۆيك ورتاق رۋحاني تامىرىمىزدى زەردەلەپ, سىر بويى مادەنيەتىندەگى تۇركىلىك قۇندىلىقتاردى ايشىقتاۋ باعىتىندا وي ءوربىتتى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ كانديداتى انارباي بۇلدىباي ءسوزىن قورقىت فيلوسوفياسىنىڭ تۇركى-موڭعول الەمىنە اسەرىنەن باستاپ, ۇلى ويشىلدىڭ مۇرالارىن تۇپنۇسقادان تىكەلەي اۋدارۋ ماسەلەسىن ايتىپ ءوتتى. قازاقستاننىڭ ەڭبەك سىڭىرگەن قايراتكەرى, جىراۋ الماس الماتوۆ تۇركى حالىقتارىنا ورتاق ونەر اكادەمياسىن اشۋ تۋرالى ۇسىنىس ايتتى.
جيىندا تۇركيانىڭ بەلگىلى ەتنومۋزىكاتانۋشىسى, عالىم فيكرەت كاراكايا, وزبەكستان رەسپۋبليكاسى ۇلتتىق عىلىم اكادەمياسىنىڭ ءا.ناۋاي اتىنداعى مەملەكەتتىك ادەبيەت مۋزەيىنىڭ ديرەكتورى, فيلولوگيا عىلىمدارىنىڭ دوكتورى, پروفەسسور جوپپور ەشونكۇلوۆ, فيلولوگيا عىلىمدارىنىڭ كانديداتى راقىش جۇماشاي, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ دوتسەنتى ۇلجان بايبوسىنوۆا پىكىر ءبىلدىردى.
ەكى كۇنگە سوزىلعان فەستيۆالدى ونەر ورتالىعىندا وتكەن گالا-كونتسەرت قورىتىندىلادى. ءوڭىر باسشىسى ازەربايجاننىڭ گابالا قالاسىندا وتكەن تۇركى مەملەكەتتەرى ۇيىمىنىڭ 12-سامميتىنەن كەيىن باۋىرلاس جۇرت ونەرپازدارىنىڭ باسىن قوسقان بۇل فەستيۆال ءوزارا مادەني بايلانىسىمىزدى نىعايتۋدىڭ باستى قادامى ەكەنىن اتاپ ءوتتى.
كونتسەرتتە ايگىلى جىراۋلار مەن جىرشىلاردىڭ قايتالانباس ماقامدارىن بۇگىنگە جەتكىزىپ, ۇلتتىق ونەرىمىزدىڭ شىنايى ناسيحاتشىلارىنا اينالعان سىر سۇلەيلەرىنىڭ ءىزباسارلارى ەلمۇرا جاڭابەرگەن, ۇلجان بايبوسىنوۆا, اقمارال نوعايباەۆا, شولپان بيمبەتوۆا, مايرا سارسەنباەۆا, سەرىك جاقسىعۇلوۆ, كۇنسۇلۋ تۇرىكپەن, بيسەمبەك تولەۋباي جانە جەتىسۋ جىر مەكتەبىنىڭ تۇلەگى نۇرجان جانپەيىسوۆ, ارقا مەكتەبىنىڭ وكىلى ءبىرجان ەسجانوۆ, سالتانات ەرسۇلتان جىردان شاشۋ شاشتى.
رەسەي فەدەراتسياسىنىڭ التاي رەسپۋبليكاسىنان كەلگەن ۋرمات ىنتاەۆ, ايدىن ورسۋلوۆ تابيعاتقا, اتا-بابا رۋحىنا ارنالعان جانە ەرلىكتى وزەك ەتكەن كوشپەلى حالىقتىڭ اۋەنى ءوز بولمىسىن جوعالتپاعانىن دالەلدەدى. التاي حالىقتارىندا ءالى كۇنگە دەيىن ساقتالعان كونە اسپاپتار تاۋ سامالىن, وزەن سىلدىرىن قۇلاعىمىزعا جەتكىزگەندەي كۇي كەشتىك.
ازەربايجاننان كەلگەن «كاراباق» مۇعامشىلار توبى ۇلتتىق اۋەندەرىن ورىنداپ, كورەرمەندى ەرەكشە اسەرگە بولەدى. قىرعىز ەلىنىڭ قومىزشىلار ءانسامبلى تۇركى حالىقتارىنىڭ كونە ساز مۇراسىن جاڭعىرتا ءتۇستى. وزبەكستاننىڭ «شاشماقوم» ءانسامبلى مەن بيشىلەر توبى ۇلتتىق ونەردىڭ ۇزدىك ۇلگىسىن ساحناعا شىعاردى.
تىۆالاردىڭ كونە زامان مۇراسىن ساقتاپ قالعان «ەش» فولكلورلىق دۋەتى مەن تۇركيادان كەلگەن سينان بارىش, كامبەر ناردىڭ ونەرىنە كورەرمەن ەرەكشە قوشەمەت كورسەتتى.
حالىقارالىق فەستيۆال تۇركى مادەنيەتى مەن مۋزىكاسى ورتاق تاريح پەن رۋحاني تامىردان ءنار العانىن, ءبىر-بىرىمەن ۇندەسكەن ۇلتتىق ساز باۋىرلاس ەلدەردىڭ بىرلىگىن كۇشەيتەتىنىنىڭ تاعى ءبىر دالەلدەدى.
قىزىلوردا
