سۋرەتتى تۇسىرگەن – اۆتور
بيىلعى دوداعا قۇس كوتەرگەندەر سوناۋ قىتاي, رەسەي, يسپانيا, ماجارستان, موڭعوليا, قىرعىزستاننان كەلىپ قاتىستى. ەلىمىزدىڭ تۇكپىر-تۇكپىرىنەن جەتكەن قۇسبەگىلەر قانشاما. ەرەجە ءباز-باياعى, بۇركىت شىرعاعا ءتۇسىپ, ىرىكتەلگەندەرى قويان السا, قارشىعا, لاشىن سىندى قۇستار كوك جۇزىندە كەپتەر تەۋىپ, جينالعان جۇرتتى تاڭ-تاماشا ەتتى. راسىمەن قىزىق. جۇدىرىقتاي قۇستىڭ شاپشاڭدىعىنا تاڭعالاسىڭ. پىر ەتىپ ۇشقان كەپتەردى اعىنداتىپ كەلىپ تەپكەندە بۇرق ەتكەن مامىق قانا قالدى. ال اناۋ توبەدەن بارلاي ۇشقان بۇركىت قورعانسىز قوياندى تەگەۋرىنىمەن ىلە قونار ەدى. ءۇي قويانى عوي, قاشىپ ۇلگەرگەنشە قاناتىن قومداي كەلگەن اش قىران باسىپ ۇلگەرەدى. ءىشىنارا جالت بەرىپ, قۇتىلعانى دا, سىتىلعانى دا بار.
بابادان كەلە جاتقان بەكزات ونەر بايقاۋىن بوزانبايدىڭ جەلكە تۇسىنداعى بۇركىت توبەدە وتكىزۋ تەگىن ەمەس. 80-جىلدارى وسى اۋىلدان وزبەك ماناپوۆ ەسىمدى بۇركىتشى شىعىپ, جارتى الەمگە ايگىلەنسە, بۇگىنگى كۇندە ناجيتباندار وتباسى اتا ءداستۇردى جاڭعىرتىپ وتىر. اۋىلدىڭ ءوڭى كەتىپ تۇر دەگەنى بولماسا, كوگىنەن قىراننىڭ ساڭقىلى كەتپەگەن قاسيەتتى مەكەن. تابيعاتى دا اسەم. سونى قىزىقتاپ كەلىپ جاتقان ساياحاتشىلار دا از ەمەس. ايتقانداي, وسى تويعا وبلىس باسشىسى نۇرىمبەت ساقتاعانوۆپەن بىرگە تۋريزم جانە سپورت ءمينيسترى ەربول مىرزابوسىنوۆ كەلدى. «قۇسبەگىلىك» فەدەراتسياسىنىڭ ۆيتسە-پرەزيدەنتتەرى باعدات مۇپتەكەقىزى مەن جانجىگىت ومارحان دا قاتىستى.
– بۇل – وبلىس ءۇشىن عانا ەمەس, ەلىمىز ءۇشىن ماڭىزى زور فەستيۆال. ءۇش كۇن بويى بۇركىت توبە الاڭىنىڭ كوركىن سپورتتىق باسەكەلەر قىزدىرىپ, قاتىسۋشىلار دوستىق پەن بىرلىكتىڭ ناعىز ۇلگىسىن كورسەتتى. التاي مەن تارباعاتايدىڭ اسقاق شىڭدارى مەن كەڭ دالاسىندا قىران قۇس سالۋ – اتا-بابامىزدان جالعاسقان كونە ءداستۇردىڭ ءبىرى. ساياتشىلىق ونەردىڭ الەمدىك دەڭگەيدە مويىندالىپ, ۇلتتىق برەندكە اينالا باستاۋى – حالقىمىزدىڭ ۇرپاقتان-ۇرپاققا جالعاسقان باعا جەتپەس مۇراسى, ماڭگىلىك قۇندىلىق ەكەنىن ايعاقتايدى, – دەدى ءوڭىر باسشىسى نۇرىمبەت ساقتاعانوۆ.
بۇركىت تويىنا كەلگەندەر تەڭگە ءىلۋ, جامبى اتۋ سىندى ۇلتتىق سپورت تۇرىنەن دە سايىسقا ءتۇستى. قىرىققا جۋىق كيىز ءۇي تىگىلىپ, قولونەر شەبەرلەرىنىڭ كورمەسى ءوتتى. جينالعان جۇرتشىلىققا قازاق ەستراداسىنىڭ تانىمال جۇلدىزدارى كەنجەبەك ءجانابىلوۆ, دوسىمجان تاڭاتاروۆ سىندى انشىلەر مەن «الاتاۋ سەرىلەرى» توبى اننەن شاشۋ شاشتى.
– حالىقتىڭ پەيىلىنە, نيەتىنە قاراي كۇن دە جارقىراپ تۇردى. قانشاما ەلدەن كەلىپ, قازاقتىڭ ءداستۇرىن كورىپ جاتىر. ۇلتىمىزدى ۇلىقتايتىن وسىنداي ءىس-شارا جالعاسىن تابا بەرسە ەكەن, – دەدى بەلگىلى ءانشى كەنجەبەك ءجانابىلوۆ.
فەستيۆال قورىتىندىسى بويىنشا يتەلگى سايىسىنان اقمولادان ات ارىتىپ كەلگەن ەرلان كەنجەتاەۆ جەڭىسكە جەتسە, قارشىعا جانە بۇركىت سايىستارىندا الماتىدان كەلگەن ءومىرحان باەتباي ءبىرىنشى ورىندى قانجىعاسىنا بوكتەردى.
شىعىس قازاقستان وبلىسى,
ۇلان اۋدانى,
بوزانباي اۋىلى
