جوبا «سارىارقا» ماگيسترالدى گاز قۇبىرىنىڭ ءبىرىنشى كەزەڭى اياسىندا ىسكە اسىرىلدى. ىبىراي التىنسارين اتىنداعى اۋىلدا 51 شاقىرىم جانە تالاپكەردە 154 شاقىرىم - جالپى 205 شاقىرىم جەلى تارتىلدى. 3,8 مىڭ ءۇي شارۋاشىلىعىندا تۇراتىن 13,8 مىڭ تۇرعىنعا كوگىلدىر وتىن بەرۋدى قامتاماسىز ەتەتىن 27 شكافتىق پۋنكت ورناتىلدى.
اقمولا وبلىسىنىڭ اكىمى مارات احمەتجانوۆ گازداندىرۋ – بۇل جاي عانا ينجەنەرلىك جوبا ەمەس, ادامداردىڭ ءومىر ءسۇرۋ ساپاسىن ارتتىرۋعا باعىتتالعان ماڭىزدى قادام ەكەنىن اتاپ ءوتتى.
«حالىقتى تابيعي گازبەن قامتاماسىز ەتۋ – نەگىزگى ينفراقۇرىلىمدىق جوبالاردىڭ ءبىرى. گاز اۋىلداردى ىڭعايلى ەتەدى, ەكولوگياعا جۇكتەمەنى ازايتادى جانە شاعىن بيزنەس ءۇشىن جاڭا مۇمكىندىكتەر اشادى. بيىل تسەلينوگراد اۋدانىندا تاعى ءتورت اۋىل – قوياندى, قىزىلسۋات, قاراجار جانە قاراوتكەل گازداندىرىلادى. قوياندىدا جۇمىستار اياقتالۋدا. جوبالاردى ىسكە اسىرعاننان كەيىن تاعى 21 مىڭعا جۋىق اقمولالىق «كوگىلدىر وتىندى» پايدالانا الادى», – دەپ اتاپ ءوتتى مارات احمەتجانوۆ.
حالىقتىڭ الەۋمەتتىك وسال ساناتتارى ءۇشىن قوسىمشا قولداۋ شارالارى قاراستىرىلعان. تابىسى تومەن وتباسىلار گاز تولەمىنە 20%-عا دەيىن جەڭىلدىك الادى, ال ەڭ تومەنگى كۇنكورىس دەڭگەيىنەن تومەن كىرىسى بار ازاماتتارعا 70 ايلىق ەسەپتىك كورسەتكىش مولشەرىندە كومەك كورسەتىلەدى.
وڭىردە 966 شاقىرىم گاز تاراتۋ جەلىلەرى «Qazaq Gaz Aimaq» اق-نىڭ سەنىمگەرلىك باسقارۋىنا بەرىلدى. كومپانيانىڭ استانا فيليالىنىڭ وكىلى ءۋاليحان قىمباتوۆ وبلىستا گازداندىرۋ كەزەڭ-كەزەڭىمەن ءجۇرىپ جاتقانىن جانە بارعان سايىن كوپ ەلدى مەكەندى قامتىپ وتىرعانىن ايتتى:
«اقمولا وبلىسىندا ۇيلەردى تابيعي گازعا قوسۋ بويىنشا اۋقىمدى جۇمىستار جالعاسۋدا. بۇگىن التىنسارين جانە تالاپكەر اۋىلدارى «كوگىلدىر وتىنعا» قوسىلۋدا. قازىرگى ۋاقىتتا 112 تۇتىنۋشى گاز الدى, جانە ءبىز حالىقتىڭ قۋانىشىن كورىپ وتىرمىز. ادامدار ءۇشىن بۇل جاي عانا ىڭعايلىلىق ەمەس, بۇل – ءومىردىڭ جاڭا دەڭگەيى. ءبىز گاز ءار ۇيگە جەتۋى ءۇشىن جۇيەلى جۇمىس جۇرگىزۋدى جالعاستىرامىز», – دەپ اتاپ ءوتتى ول.
جەرگىلىكتى تۇرعىنداردىڭ ايتۋىنشا, گازدىڭ ىسكە قوسىلۋى ء–ومىردى جاقسارتاتىن, كوپتەن كۇتكەن وقيعا.
ء«بىز بۇل كۇندى كوپتەن كۇتتىك. ەندى ۇيلەر جىلى بولادى, ال ءومىر – جەڭىلدەيدى. كومىر مەن وتىن جيناۋدىڭ قاجەتى جوق, ءبارى الدەقايدا ىڭعايلى بولدى. اۋىل كوز الدىمىزدا وزگەرىپ جاتىر, جانە بۇل بولاشاققا سەنىم ۇيالاتادى», – دەپ ءبولىستى زەينەتكەر يمان قايباعاروۆ.
بۇگىنگى تاڭدا اقمولا وبلىسىندا ارشالى جانە تسەلينوگراد اۋداندارىندا, سونداي-اق قوسشى قالاسىندا 21 ەلدى مەكەن گازعا قوسىلعان. ورتالىقتاندىرىلعان گازبەن 79 مىڭعا جۋىق تۇرعىن قامتاماسىز ەتىلگەن. بيىل تاعى ون جوبا ىسكە اسىرىلۋدا, ولار 178 مىڭ ادامنىڭ ءومىر ءسۇرۋ جاعدايىن جاقسارتادى. 2026 جىلعا قاراي التى جاڭا نىساننىڭ – قاراوتكەل, قىزىلسۋات, قاراجار, اقبۇلاق, تايكول اۋىلدارىندا, سونداي-اق قوسشى قالاسىنداعى ەكى ىسكە قوسۋ كەشەننىڭ قۇرىلىسىن اياقتاۋ جوسپارلانۋدا.
بولاشاقتا تابيعي گاز وبلىستىڭ سولتۇستىك اۋداندارىندا دا پايدا بولادى. گازداندىرۋدىڭ جاڭارتىلعان سىزباسىنا سايكەس, «سارىارقا» ماگيسترالدىق گاز قۇبىرىنىڭ استانا – كوكشەتاۋ – پەتروپاۆلوۆسك باعىتى بويىنشا ەكىنشى جانە ءۇشىنشى كەزەڭدەرىنىڭ قۇرىلىسى 2028 جىلعا جوسپارلانعان. بۇل كەزەڭدەر اياقتالعاننان كەيىن 400 مىڭنان استام ادام تۇراتىن 165 ەلدى مەكەن گازعا قوسىلادى.
