وعان «تۇركى مادەنيەتى جانە مۇراسى» قورىنىڭ پرەزيدەنتى اقتوتى رايىمقۇلوۆا, تۇركيا, ازەربايجان, قىرعىزستان, وزبەكستان جانە وتاندىق بەلگىلى عالىمدار, زەرتتەۋشىلەر, مادەنيەت پەن ونەر مايتالماندارى, زيالى قاۋىم وكىلدەرى, قوعام قايراتكەرلەرى قاتىستى.
ايماق باسشىسى نۇرلىبەك نالىباەۆ فەستيۆالدىڭ تۇركى حالىقتارىنىڭ مادەني بايلانىسىن نىعايتۋداعى جانە ۇلتتىق ونەردى دارىپتەۋدەگى ماڭىزىن اتاپ ءوتىپ, باۋىرلاس ەلدەردەن كەلگەن قوناقتارعا العىسىن ءبىلدىردى.
«پرەزيدەنتىمىز قاسىم-جومارت كەمەل ۇلى كۇنى كەشە ازەربايجان رەسپۋبليكاسىنىڭ گابالا قالاسىندا وتكەن تۇركى مەملەكەتتەرى ۇيىمىنىڭ 12-ءشى سامميتىندە: ء«تۇبى ءبىر تۇركى جۇرتىنىڭ تاريحى تامىرلاس, حالىقتارىمىزعا ورتاق سان عاسىرلىق شەجىرەمىز بار دەپ ۇنەمى ايتىپ جاتىرمىز. مۇنىڭ ءبارى – بەرەكەلى بىرلىگىمىز بەن ماڭگىلىك ىنتىماعىمىزدىڭ التىن ارقاۋى», – دەگەن بولاتىن.
باۋىرلاس حالىقتاردىڭ رۋحىن كوتەرۋ, فولكلورلىق-مۋزىكالىق ونەرىن دارىپتەۋ, ءوزارا مادەني بايلانىسىن نىعايتۋدا فەستيۆالدىڭ ماڭىزى زور.
قورقىت بابا مۇرالارىنىڭ بىرىككەن ۇلتتار ۇيىمى جانىنداعى يۋنەسكو-نىڭ عالامدىق ماتەريالدىق ەمەس مۇرالار تىزىمىنە ەنگىزىلۋى – جىلدار بويى بىرلەسىپ اتقارعان جۇمىسىمىزدىڭ ناتيجەلى جەمىسى.
كۇللى تۇركى دۇنيەسىنىڭ نازارىن وزىنە اۋدارعان, كەڭ دالانى جىرعا بولەپ, نۇرعا تولتىرعان بۇل ءداستۇرلى ونەر مەرەكەسى – ۇلتتىق رۋحىمىزدىڭ, تۇركى جۇرتىنىڭ ماڭگىلىك مۇراسى مەن مادەني ساباقتاستىعىنىڭ جارقىن كورىنىسى.
تۇركى حالىقتارىنىڭ بىرلىگى مەن رۋحاني تۇتاستىعى نىعايا بەرسىن! تاۋەلسىز ەلىمىزدىڭ تۇعىرى بيىك, ەگەمەندىگى ەڭسەلى بولعاي!», – دەدى نۇرلىبەك ماشبەك ۇلى.
«تۇركى مادەنيەتى جانە مۇراسى» قورىنىڭ پرەزيدەنتى اقتوتى رايىمقۇلوۆا ءتۇبى ءبىر تۇركى تۋىستاردىڭ باسىن قوسقان حالىقارالىق ءىس-شارانى جوعارى دەڭگەيدە ۇيىمداستىرعان قىزىلوردا وبلىسىنىڭ باسشىلىعىنا العىسىن ايتتى.
كونتسەرتتە ايگىلى جىراۋلار مەن جىرشىلاردىڭ قايتالانباس ماقامدارىن بۇگىنگە جەتكىزگەن, ۇلتتىق ونەرىمىزدىڭ شىنايى ناسيحاتشىلارىنا اينالعان سىر سۇلەيلەرىنىڭ ءىزباسارلارى ەلمۇرا جاڭابەرگەن, ۇلجان بايبوسىنوۆا, اقمارال نوعايباەۆا, شولپان بيمبەتوۆا, مايرا سارسەنباەۆا, سەرىك جاقسىعۇلوۆ, كۇنسۇلۋ تۇرىكپەن, بيسەمبەك تولەۋباي جانە جەتىسۋ جىر مەكتەبىنىڭ تۇلەگى نۇرجان جانپەيىسوۆ, ارقا مەكتەبىنىڭ وكىلى ءبىرجان ەسجانوۆ, سالتانات ەرسۇلتان جىردان شاشۋ شاشتى.
رەسەي فەدەراتسياسىنىڭ التاي رەسپۋبليكاسىنان كەلگەن ۋرمات ىنتاەۆ, ايدىن ورسۋلوۆ تابيعاتقا, اتا-بابا رۋحىنا جانە ەرلىك جىرلارىنا نەگىزدەلگەن كوشپەلى حالىقتىڭ اۋەنى ءوز بولمىسىن جوعالتپاعانىن تاعى ءبىر كورسەتتى. كومەيمەن ايتۋ ونەرى مەن توپشۋر, قوبىز سياقتى كونە اسپاپتاردىڭ ءۇنى التاي حالىقتارىندا ءالى كۇنگە دەيىن ساقتالعان. بۇل اۋەندەر تاۋدىڭ جەلىن, وزەن سۋىنىڭ سىلدىرىن جانە مالشى ءومىرىنىڭ تىنىسىن بەينەلەيدى.
ازەربايجاننان كەلگەن «كاراباح» مۇعامشىلار توبى ۇلتتىق ناقىشتاعى كۇردەلى اۋەن ورنەكتەرىن ورىنداپ, كورەرمەندى ەرەكشە اسەرگە بولەدى. قىرعىز ەلىنىڭ قومىزشىلار ءانسامبلى مەن سامات كوچەرباەۆ «اقاق» شىعارماسىن ورىنداپ, تۇركى حالىقتارىنىڭ كونە ساز مۇراسىن جاڭعىرتتى.
وزبەكستاننىڭ «شاشماقوم» ءانسامبلى مەن بيشىلەر توبى ۇلتتىق ونەردىڭ ۇزدىك ۇلگىسىن ساحناعا شىعاردى. الماتى قالاسىنان كەلگەن «ارقايىم» نەو-ەتنو فولكلورلىق ءانسامبلى «تەنگير ازۋن» شىعارماسىن ورىنداپ, ەسكى سارىندى زاماناۋي تاسىلمەن ۇيلەستىردى.
كونە تۇرىكتەردىڭ كومەيمەن ءان سالۋ ءداستۇرى تىۆا حالىقتارىندا جاقسى ساقتالعان. ولار كومەيمەن ءان سالۋدى «حوومەي» دەپ اتايدى. ىقىلىم زاماننىڭ مۇرا ونەرىن ساقتاپ قالعان حالىقتىڭ «ەش» فولكلورلىق دۋەتى دە بۇگىنگى فەستيۆالدىڭ قۇرمەتتى قوناعى بولدى. تۇركيا رەسپۋبليكاسىنان كەلگەن سينان بارىش, كامبەر ناردىڭ ونەرىنە كورەرمەن ەرەكشە قوشەمەت كورسەتتى.
حالىقارالىق فەستيۆال بۇگىنگى تۇركى مادەنيەتى مەن مۋزىكاسى ورتاق تاريح پەن رۋحاني تامىردان ءنار العانىن, تۋىس حالىقتاردىڭ اندەرى مەن اۋەندەرى ءبىر-بىرىمەن ۇندەسىپ, باۋىرلاس ەلدەردىڭ بىرلىگىن كۇشەيتەتىنىن تاعى ءبىر دالەلدەدى.
