قۇجاتقا سايكەس, ۇلتتىق مۋزەي جانىنان رەستاۆراتسيا ورتالىعى قۇرىلادى. جاڭا مەكەمە تاجىريبە الماسۋ, بىرلەسكەن سەمينارلار وتكىزۋ جانە بىلىكتى ماماندار دايارلاۋ ورتالىعى بولماق.
«بۇل باعىتتاعى ينستيتۋتسيونالدىق نەگىز قۇرۋ – ستراتەگيالىق ماسەلە. قازاقستان مەن يتاليا اراسىنداعى قارىم-قاتىناس قارقىندى دامىپ كەلەدى. ەكى ەل باسشىلارىنىڭ كەزدەسۋلەرى, ءوزارا قولداۋى جانە بارلىق باعىتتا – ەكونوميكالىق, سىرتقى ساياسي, مادەني-گۋمانيتارلىق ىنتىماقتاستىقتى نىعايتۋى سونىڭ دالەلى. وسىنداي مادەني بايلانىستار ءبىزدىڭ حالىقتاردىڭ ءبىرىن-ءبىرى تەرەڭىرەك تانۋىنا ىقپال ەتەدى», دەدى ا.بالاەۆا.
ءمينيستردىڭ ايتۋىنشا, يتاليالىق مامانداردىڭ تاجىريبەسى مۋزەي ءىسىن, رەستاۆراتسيا قىزمەتىن جانە ۇلتتىق مۇرانى ساقتاۋ ءىسىن دامىتۋعا سەپ بولادى.
«رەستاۆراتسيا ورتالىعىنىڭ جەمىستى جۇمىس ىستەۋى – جوعارى دەڭگەيدەگى مامانداردىڭ ەڭبەگىنە بايلانىستى. ءبىز مەتالل, تاس, ماتا, اعاش جانە باسقا دا ماتەريالداردان جاسالعان كوركەم جانە تاريحي-مادەني قۇندىلىقتاردى قالپىنا كەلتىرۋمەن اينالىساتىن كاسىبي كادرلار توبىن دايارلاۋعا اتسالىسقىمىز كەلەدى. بۇل وتە ماڭىزدى, سەبەبى ۇلتتىق رەستاۆراتسيا ورتالىعىن قۇرۋ ارقىلى ءبىز جاڭا بۋىن مامانداردى دايارلايتىن ايماقتىق ورتالىقتاردى دا قالىپتاستىرامىز. سونداي-اق وسى جۇمىستىڭ الەۋمەتتىك جانە قايىرىمدىلىق تۇسىن دا ەسكەرۋ ماڭىزدى. ەگەر دايارلىق باعدارلاماسىنا مۇمكىندىگى شەكتەۋلى جاستاردى تارتىپ, ولارعا رەستاۆراتور ماماندىعىن يگەرۋگە جانە سۇرانىستاعى كاسىبي مامان رەتىندە دامۋىنا مۇمكىندىك بەرسەك, وتە جاقسى بولار ەدى دەپ ەسەپتەيمىن», دەدى مينيستر.
يتاليا مادەنيەت مينيسترلىگىنىڭ رەستاۆراتسيا جونىندەگى ورتالىق ينستيتۋتىنىڭ ديرەكتورى لۋيدجي وليۆا ءوز تاراپىنان ىنتىماقتاستىققا دايىن ەكەنىن ءبىلدىردى.
«قازاقستاندا ۇلتتىق رەستاۆراتسيا ورتالىعىن قۇرۋ – بۇل تەك مادەني جوبا ەمەس, سونىمەن قاتار جاڭا جۇمىس ورىندارىن اشۋعا مۇمكىندىك. ورتالىقتىڭ قىزمەتى مەتالل, اعاش, ماتا, تاس جانە باسقا دا ماتەريالداردان جاسالعان بۇيىمداردى قالپىنا كەلتىرۋ باعىتتارىن قامتيدى. ءبىز قازاقستاندىق رەستاۆراتورلاردى وقىتۋعا جانە مۋزەي ەكسپوناتتارىمەن جۇمىس ىستەۋدىڭ وزىق تەحنولوگيالارىن ەنگىزۋگە دايىنبىز», دەدى ل.وليۆا.
كەزدەسۋ بارىسىندا ايدا بالاەۆا استانادا وتكەن لەوناردو دا ءۆينچيدىڭ «ادەمى حانشايىم» كارتيناسىنىڭ كورمەسى تۋرالى دا اتاپ ءوتتى. بۇل كورمە قازاقستاندىق كورەرمەننىڭ قىزىعۋشىلىعىن تۋدىردى. مينيستر يتاليالىق تاراپ وسى باعىتتاعى ىنتىماقتاستىقتى جالعاستىرىپ, يتاليا سۋرەتشىلەرىنىڭ باسقا دا تۋىندىلارىنىڭ كورمەسىن وتكىزۋگە قولداۋ بىلدىرۋگە دايىن ەكەنىن جەتكىزدى.
كەزدەسۋ سوڭىندا تاراپتار ءوزارا ىنتىماقتاستىق قازاقستان مەن يتاليا اراسىنداعى دوستىقتى نىعايتۋعا ماڭىزدى ۇلەس قوساتىنىنا سەنىم ءبىلدىردى.
