باۋىرجان فايزوللا ۇلى – بەلگىلى بالالار جازۋشىسى, ونىڭ «كۇن بالا», «جيھانكەز اقكەربەز» جيناقتارى ەڭ كىشكەنتاي وقىرمانداردىڭ سۇيىكتى كىتابىنا اينالعان. اقجايىق ءوڭىرىنىڭ قوعامدىق-ساياسي ومىرىندە ءوز ورنى بار ازامات شيرەك عاسىردان بەرى وبلىستىق «ورال ءوڭىرى» گازەتىن باسقارىپ, ءارى قازاقستان رەسپۋبليكاسى پرەزيدەنتى جانىنداعى ۇلتتىق قۇرىلتاي مۇشەسى رەتىندە ەل مەن جەردىڭ ماسەلەسىنە ۇنەمى ءۇن قوسىپ كەلەدى.
قالامگەردىڭ شىعارماشىلىق كەشىنە اقىن, مەملەكەتتىك سىيلىقتىڭ لاۋرەاتى اقۇشتاپ باقتىگەرەەۆا, عالىم-جازۋشى, م.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى نۇرداۋلەت اقىش, «Egemen Qazaqstan» گازەتىنىڭ باس رەداكتورى عابيت مۇسىرەپ, «پاراسات» جۋرنالىنىڭ باس رەداكتورى ساكەن سىبانباي سىندى مارتەبەلى مەيماندار قاتىستى. پاراسات مايدانىنداعى تانىمال قالامگەرگە مادەنيەت جانە اقپارات ءمينيسترى ايدا بالاەۆانىڭ, قازاقستان جۋرناليستەر وداعىنىڭ توراعاسى سەيىتقازى ماتاەۆتىڭ العىسحاتتارى تاپسىرىلدى. وسى كەشتە اۆتوردىڭ «نامىس نايزاعايى» اتتى پۋبليتسيستيكالىق جيناعىنىڭ تۇساۋى كەسىلدى.
باۋىرجان عۇبايدۋلليننىڭ شىعارمالارى الەمنىڭ ونداعان تىلىنە اۋدارىلعان. بالالار ادەبيەتىنەن بولەك, «جانىما جاقىن جاعالاۋ», «بيلەنبەگەن ۆالس» سىندى تۋىندىلارى دا وقىرمان جۇرەگىنەن لايىقتى ورىن تاپقان. قالامگەردىڭ ءوزى دە ورىس پەن اراب حالىق ەرتەگىلەرىن قازاق تىلىنە اۋدارىپ, بالالار ادەبيەتىنىڭ دامۋىنا ەلەۋلى ۇلەس قوستى.
– كوپ ۋاقىتىمدى جۋرناليستيكانىڭ كۇيبەڭ تىرلىگىنە جۇمساپ, ادەبيەتكە مويىن بۇرا الماعانىم راس. باستاپ قويعان كولەمدى دۇنيەلەرىم دە بار ەدى. بۇگىن وقىرمانىمنىڭ الدىندا ويىمدا جۇرگەن جاڭا شىعارمالارىمدى قولعا الۋعا ءسوز بەرەمىن, – دەدى جازۋشى تولقىپ تۇرىپ.
باتىس قازاقستان وبلىسى
