فوتو: ۇكىمەتتىڭ ءباسپاسوز قىزمەتى
پرەمەر-ءمينيستردىڭ ايتۋىنشا, مەملەكەت باسشىسى بيىل جالپى ىشكى ونىمدەگى كولەڭكەلى ەكونوميكا ۇلەسىن 15 پايىزعا دەيىن ازايتۋ مىندەتىن قويعان.
«بۇل كورسەتكىشتى ودان ءارى تومەندەتە بەرۋگە ءتيىسپىز. بىزگە تازا ءارى اشىق ەكونوميكا كەرەك. كورىپ وتىرعانداي, بۇل باعىتتا جاڭا تاسىلدەر قولعا الىنىپ, جۇيەلى جۇمىس اتقارىلىپ جاتىر. ايتىلعان ۇسىنىستاردى جالپى قولدايمىز. وسى باعىتتا بارلىق مەملەكەتتىك ورگاندار مەن بيزنەس سۋبەكتىلەرىنىڭ جۇمىسىن كۇشەيتۋ قاجەت. بۇل جۇمىس تەك حات-حابار الماسىپ, ەسەپ بەرۋمەن عانا شەكتەلمەۋگە ءتيىس. ەكونوميكا جانە سالىق تۇراقتىلىعى, تسيفرلاندىرۋ, سونداي-اق بيزنەس جۇرگىزۋدى وڭايلاتۋ ىسىندە ساپالى ءارى كەشەندى شەشىمدەر قاجەت», دەدى ولجاس بەكتەنوۆ.
سونىمەن قاتار ولجاس بەكتەنوۆ تسيفرلاندىرۋدى ستراتەگيالىق مىندەت دەپ اتاپ, سالالىق مينيسترلىكتەرگە بۇل باعىتتاعى جۇمىستى كۇشەيتۋدى تاپسىردى.
«مەملەكەت باسشىسى قازاقستان حالقىنا جولداۋىندا جاپپاي تسيفرلاندىرۋ جانە جاساندى ينتەللەكت تەحنولوگياسىن ەنگىزۋ ارقىلى ەكونوميكانىڭ بارلىق سالاسىن جاڭعىرتۋ قاجەتتىگىن اتاپ ءوتتى. بۇل – ستراتەگيالىق مىندەت. بىرقاتار سەكتوردا, ونىڭ ىشىندە ساۋدا, قۇرىلىس جانە اۋىل شارۋاشىلىعى سالالارىندا تسيفرلاندىرۋ دەڭگەيى ءالى دە جەتكىلىكسىز. بارلىق مۇددەلى مينيسترلىك ءوز سالاسىندا جاپپاي تسيفرلاندىرۋدى قامتاماسىز ەتۋى قاجەت», دەدى پرەمەر-مينيستر.
پرەمەر-مينيستر كولەڭكەلى ەكونوميكاعا قارسى كۇرەس اياسىندا مەملەكەتتىك كىرىستەر كوميتەتى تسيفرلاندىرۋ بويىنشا كوشباسشى بولۋى ءتيىس ەكەنىن باسا ايتتى.
«تەك جۇيەلى قادامدار عانا مەملەكەت پەن بيزنەس اراسىنداعى قارىم-قاتىناستىڭ جاڭا سەرۆيستىك مودەلىن قۇرۋعا مۇمكىندىك بەرەدى. سونىمەن قاتار تسيفرلىق باستامالاردى ىسكە اسىرۋ ءۇشىن ءتيىستى رەسۋرستار قاجەت. وسىعان بايلانىستى جاساندى ينتەللەكت جانە تسيفرلىق دامۋ مينيسترلىگى كەلەسى جىلى مەملەكەتتىك كىرىستەر كوميتەتىنىڭ ءوز الدىنا دەرەكتەردى وڭدەۋ ورتالىعىن قۇرۋى كەرەك», ولجاس بەكتەنوۆ.
