كاسىپكەردىڭ تاعى ءبىر جاڭاشىلدىعى – ءوز باقشاسىندا وسىرگەن كوكونىستەردى پايدالانۋى. سابىزدەن سارعىش رەڭكتى, قىزىلشادان قانىق قىزىل ءتۇستى, قىزاناقتان اشىق ءتۇستى ماكاروندار جاسايدى. مۇنداي تابيعي قوسپالار تاعام ساپاسىن ارتتىرىپ قانا قويماي, بالالاردىڭ دا تابەتىن اشادى. بۇل جەردە ول ەشقانداي حيميالىق بوياعىش نەمەسە جاساندى قوسپا قولدانبايدى.
نينا ەرەكشە ونىمدەرىن تەك جەتىسۋ وڭىرىندە ەمەس, باسقا ايماقتارعا دا جەتكىزۋدى كوزدەيدى. سول ءۇشىن ءوندىرىستى كەڭەيتىپ, ارنايى تسەح اشىپ, جاڭا جۇمىس ورىندارىن قۇرۋدى ارماندايدى. بۇل جوسپار جۇزەگە اسسا, اۋىلداعى ايەلدەرگە, جاستارعا جاڭا مۇمكىندىك بەرەرى انىق. تاعى ءبىر ماقساتى – ۇلتتىق ءدامدى ساقتاي وتىرىپ, زاماناۋي تاسىلمەن ۇسىنۋ. دارىگەر-ديەتولوگ ايمان جۇمابەكقىزىنىڭ ايتۋىنشا, جابايى ساڭىراۋقۇلاقتاردىڭ ادام دەنساۋلىعىنا تيگىزەر پايداسى كوپ.
نينا تيشكوۆانىڭ ەڭبەگى – اۋىل كاسىپكەرلىگى مەن ەكولوگيالىق ءونىم ءوندىرىسىنىڭ ناقتى مىسالى. قازىر الەمدە تابيعي ءارى ەكولوگيالىق تازا تاعامدارعا سۇرانىس ارتىپ كەلەدى. بىزدە دە بۇل باعىتتاعى باستامالاردىڭ قولداۋ تاۋىپ جاتقانى قۋانتادى. ونىڭ ۇستىنە, شاعىن كاسىپورىندار ەل ەكونوميكاسىن ارتاراپتاندىرۋعا ىقپال ەتەدى. ال جابايى ساڭىراۋقۇلاقتان باستاپ ءتۇرلى-ءتۇستى ماكارونعا دەيىنگى ونىمدەر – ءسوز جوق, نينا تيشكوۆانىڭ شىعارماشىلىق ىزدەنىسىنىڭ جەمىسى.
جەتىسۋ وبلىسى
