عيماراتتىڭ ءبىرىنشى قاباتىندا سپورت زالدارى, فۋتبولشىلاردىڭ دايىندىق بولمەلەرى, ساۋىقتىرۋ ورتالىقتارى ورنالاسقان. ەكىنشى قاباتتا اكىمشىلىك بولمەلەر, ءۇشىنشى قاباتتا جيىندارعا ارنالعان ءماجىلىس زالى بار. مۇمكىندىگى شەكتەۋلى سپورتشىلاردىڭ جاتتىعۋىنا دا تولىق جاعداي جاسالعان.
11 مىڭ ورىندىق «قايسار-ارەنا» ۋەفا-نىڭ 4-ساناتىنا سايكەستەندىرىلگەن. جاسىل الاڭ حالىقارالىق ستاندارتتارعا ساي جاساندى توسەنىشپەن جابدىقتالىپ, زاماناۋي جارىقتاندىرۋ, دىبىس جۇيەلەرى ورناتىلعان. ماماندار بۇل حالىقارالىق دەڭگەيدەگى ءتۇرلى سپورتتىق, مادەني شارالاردى جوعارى دەڭگەيدە وتكىزۋگە مۇمكىندىك بەرەتىنىن ايتادى.
«قايسار-ارەناداعى» شىمكەنتتىك «ورداباسى» مەن قوستانايلىق «توبىل» كوماندالارىنىڭ فينالدىق كەزدەسۋىنە تۋريزم جانە سپورت ءمينيسترى ەربول مىرزابوسىنوۆ, ەلىمىزدىڭ فۋتبول فەدەراتسياسىنىڭ پرەزيدەنتى مارات وماروۆ, مىڭداعان جانكۇيەر جينالدى. وبلىس اكىمى نۇرلىبەك نالىباەۆ جۇرتشىلىقتى جاڭا نىساننىڭ اشىلۋىمەن قۇتتىقتاپ, كوماندالارعا ساتتىلىك تىلەدى.
«بۇگىن – ەل سپورتى تاريحىنداعى ايتۋلى كۇن. مەملەكەت باسشىسىنىڭ وڭىرلەردە سپورت ينفراقۇرىلىمىن دامىتۋ, ونىڭ ىشىندە ستاديوندار مەن سپورت كەشەندەرىن سالۋ تۋرالى تاپسىرماسىنا سايكەس قىزىلوردا قالاسىندا جاڭا ستاديون بوي كوتەردى. جاڭا ستاديوننىڭ اشىلۋى فۋتبولدان ەل كۋبوگىنىڭ فينالدىق ويىنىمەن تۇسپا-تۇس كەلىپ, جانكۇيەرلەر اسىعا كۇتەتىن سپورت مەرەكەسى وتاندىق فۋتبول تاريحىندا العاش رەت قىزىلوردا قالاسىندا ءوتىپ جاتىر. بۇل – ءبىز ءۇشىن ۇلكەن مارتەبە, زور ماقتانىش. جاڭا نىساننىڭ سالىنۋىنا ەرەكشە قولداۋ بىلدىرگەن مەملەكەت باسشىسىنا, ۇكىمەتكە سىر جۇرتشىلىعى اتىنان شىنايى العىسىمىزدى بىلدىرەمىز. بارشاڭىزدى جاڭا ستاديوننىڭ اشىلۋىمەن شىن جۇرەكتەن قۇتتىقتايمىن. كوماندالارعا ساتتىلىك تىلەيمىن. ەل فۋتبولىنىڭ داڭقى ارتا بەرسىن», دەدى وبلىس باسشىسى.
تارتىستى باستالعان ويىن باسىندا «ورداباسى» ءساتتى شابۋىلدار ۇيىمداستىرعانىمەن, «توبىلدىڭ» تەگەۋرىنى سەزىلىپ تۇردى. 19-مينۋتتا اسحات تاعىبەرگەن تەپكەن ايىپ دوبىن كوماندالاسى نيكولاي سيگنەۆيچ گولعا اينالدىردى. 33-مينۋتتا «ورداباسى» قاقپاسىن تاعى ءبىر مارتە ءدال كوزدەگەن يسلام چەسنوكوۆ ەسەپتى ەسەلەي ءتۇستى. شۆەيتساريالىق سۆەن ۆولفەنسبەرگەر باس تورەشى بولعان كەزدەسۋ تابلوسىنداعى ەسەپ ويىن سوڭىنا دەيىن وزگەرمەدى.
جەڭىمپازداردى وبلىس اكىمى نۇرلىبەك نالىباەۆ, تۋريزم جانە سپورت ءمينيسترى ەربول مىرزابوسىنوۆ, فۋتبول فەدەراتسياسىنىڭ پرەزيدەنتى مارات وماروۆ ماراپاتتاپ, كۋبوك پەن مەدالدار تابىس ەتتى.
ون ءبىر مىڭ ورىندىق جاڭا ستاديوندا ينە شانشار ورىن بولمادى. اۋلاسىنا دا ۇلكەن LED ەكران قويىلىپ, سىرتتاعىلار ماتچتى سودان تاماشالادى.
قىزىلوردا
