– بۇل جوبانىڭ ماقساتى – حالىق اراسىندا ساقتالعان كونە كىتاپ, قولجازبا, حاتتار مەن فوتوسۋرەتتەردى جيناقتاپ, ولاردى تاريحي اينالىمعا ەنگىزۋ, زەرتتەۋ جانە ۇرپاققا مۇرا ەتۋ, – دەيدى مۋزەي ديرەكتورى جانتاس سافۋللين.
باستاما اۆتورى جانتاس نابيوللا ۇلى جوبانىڭ تاريحي, عىلىمي جانە مادەني ماڭىزدىلىعىنا توقتالىپ, بيىل 150 جىلدىق مەرەيتويى اتالىپ وتىرعان ۇلى اعارتۋشى-اقىن عۇمار قاراشقا قاتىستى بىرنەشە پاپكا قۇندى قۇجاتتى مۋزەي قورىنا وتكىزدى. ونىڭ ىشىندە اقىننىڭ 1911 جىلى باسىلعان «ورنەك» كىتابىنىڭ تۇپنۇسقاسى دا بار. بۇل دۇنيەلەر 2012 جىلى ماسكەۋ قالاسىندا تۇرعان عۇمار قاراشتىڭ نەمەرەسى ءناديا بۇرحانقىزىنان الىنعان ەكەن.
جوبا بويىنشا حالىق قولىنداعى قولجازبا, قۇندى قۇجاتتاردىڭ تۇپنۇسقاسى دا, كوشىرمەسى دە جيناقتالا بەرەدى. ناتيجەسىندە, مۋزەي قورى جاڭا جادىگەرلەرمەن تولىعىپ, ولار عىلىمي ساراپتامادان ءوتىپ, زەرتتەلىپ, كورمەلەر ارقىلى كوپشىلىك نازارىنا ۇسىنىلادى.
جوبا باستالعالى از ۋاقىت وتسە دە تۇرعىندار اراسىندا ەرەكشە قوزعالىس تۋىپ جاتىر. اسىرەسە ۇلكەندەر جاعى ساندىق تۇبىندەگى سارعايعان كىتاپ, داپتەردىڭ شاڭىن قاعىپ, جەرگىلىكتى مۋزەيلەرگە جەتكىزگەن. سونىڭ ىشىندە ارداگەر امانگەلدى ۋاليەۆ تاپسىرعان 1928 جىلى 1 مامىردا جانىبەك اۋىلىندا وتكەن شەرۋدىڭ فوتوسۋرەتى, باسقا دا كونە كىتاپ, قولجازبالار بار.
باتىس قازاقستان وبلىسى
