فوتو: اقوردا
اقورداعا اياق باسقان جاۋاپتى ماماندىق يەلەرى «پاراسات», «قۇرمەت» وردەنى, «ەرەن ەڭبەگى ءۇشىن» جانە «شاپاعات» مەدالىمەن ماراپاتتالىپ, «قازاقستاننىڭ ەڭبەك سىڭىرگەن ۇستازى» قۇرمەتتى اتاعىن ارقالادى.
بەدەلى بيىك ماراپات العان ۇستازداردىڭ قاتارىندا شىمكەنت قالاسى ت.تاجىباەۆ اتىنداعى №47 مەكتەپ-گيمنازيانىڭ قازاق ءتىلى مەن ادەبيەتى ءپانى مۇعالىمى شەرالحان گۇلميرا دا بار. بىلىكتى ۇستاز ەل بولاشاعىنا سىڭىرگەن ەرەن ەڭبەگى ءۇشىن بۇعان دەيىن «ى.التىنسارين» توسبەلگىسىن يەمدەنىپ, بىلتىر عانا «ۇزدىك پەداگوگ-2024» بايقاۋىنىڭ رەسپۋبليكالىق كەزەڭىندە توپ جارعان. ال بۇل جولعى مارتەبەلى ماراپات «قازاقستاننىڭ ەڭبەك سىڭىرگەن ۇستازى» قۇرمەتتى اتاعىن ىزدەنىمپاز پەداگوگكە ەل پرەزيدەنتىنىڭ ءوزى تابىستادى.
شەرالحان گۇلميرا ۇستاز ماراپاتتان كەيىن ادەمى اسەرىمەن ءبولىسىپ, باعالانعان ەڭبەك ۇستازدىق قىرىن ۇشتاي تۇسۋگە يتەرمەلەپ, شابىتقا شابىس قوساتىنىن ايتتى.
«ەل باسشىسىنىڭ پەداگوگتەردى ارنايى ماراپاتتاۋى ۇستاز ءرولىنىڭ جوعارى ەكەنىن كورسەتەدى. بۇل مۇعالىم جەتىستىگىنىڭ بيىگى عانا ەمەس, كەرىسىنشە جاڭا باستامالار مەن تىڭ يدەيالاردىڭ باستاۋى. بىزگە ارتىلعان سەنىم. ماراپاتتاۋ ساتىندە ويىما ءتۇرلى يدەيالار كەلدى. ەرتەرەك جۇزەگە اسىرۋعا اسىقتىم. شابىتتانىپ, ماماندىعىمدى اداسپاي تاپقانىما قۋاندىم. ءار ماراپاتتىڭ جاۋاپكەرشىلىگى بار, ارتار جۇگى بار. ءبىلىمىمىز بەن تاجىريبەمىزدى ەلىمىزدىڭ جارقىن بولاشاعىنا ارنايمىز دەپ سەنىممەن ايتا الامىن», دەگەن ۇستاز ەندى قاسىم-جومارت كەمەل ۇلى باسا نازار اۋدارىپ جۇرگەن جي مۇمكىندىكتەرىن دەر كەزىندە مەڭگەرىپ, زامان سۇرانىسىنا ساي بولۋدى دىتتەپ وتىرعانىن اتاپ ءوتتى.
«ماقسات – باسەكەگە قابىلەتتى ۇرپاق تاربيەلەۋ. ولاي بولسا, مۇعالىم دە قازىرگى جاھاندانۋدىڭ قاتاڭ تالاپتارىنا ساي بولۋى ءتيىس. اقپاراتتىق تەحنولوگيالاردىڭ دامىعان ۋاقىتىندا فۋنكتسيونالدىق ساۋاتتىلىعى جوعارى, جي جەتىستىكتەرىن مەڭگەرگەن ۇستاز عانا شاكىرتىن بيىك بەلەستەرگە جەتەلەي الادى», دەدى شىمكەنت قالاسى ت.تاجىباەۆ اتىنداعى №47 مەكتەپ-گيمنازيانىڭ مۇعالىمى.
قازاقتىڭ ايگىلى اسكەري قولباسشىسى باۋىرجان مومىش ۇلى «بولاشاقتىڭ باسشىسىن دا, داناسىن دا, عالىمىن دا, ەڭبەكقور ەگىنشىسىن دە, كەنشىسىن دە ۇستاز وسىرەدى, ومىرگە ۇرپاق بەرگەن انالاردى قالاي ارداقتاساق, سول ۇرپاقتى تاربيەلەيتىن ۇستازداردى دا سولاي ارداقتاۋعا مىندەتتىمىز» دەگەن ونەگەلى سوزىمەن وسيەت ەتكەنىندەي شاكىرتتەرىنىڭ ساناسىندا ءبىلىم شامشىراعىن جاعىپ جۇرگەن ۇستاز ەڭبەگىنىڭ ەلەنۋى تۇتاس قوعامنىڭ قۇرمەتى, العىسى.
