كينوفەستيۆال تۇركى مادەنيەتىن جانە ونەرىن دامىتۋ حالىقارالىق ۇيىمىنىڭ (تۇركسوي) باستاماسىمەن ۇيىمداستىرىلدى. ءىس-شارا ازەربايجان, قازاقستان, قىرعىزستان, تۇركىمەنستان, تۇركيا جانە وزبەكستاننىڭ ۇلتتىق كينو ۇيىمدارىن بىرىكتىرەدى.
بۇعان دەيىن فەستيۆال ستامبۇلدا, بۋرسادا, شۋشادا جانە اناۋدا (اشحاباد) ءوتتى. 2025 جىلى العاش رەت قازاقستان تۇركى مەملەكەتتەرىن قابىلدادى. سەبەبى اقتاۋ قالاسى بيىل تۇركى الەمىنىڭ مادەني استاناسى مارتەبەسىنە يە بولدى. اقتاۋ شاھارى تۇركى كينەماتوگرافىنىڭ جاڭا ورتالىعىنا اينالدى. جيىنعا العاش رەت ماجارستاننان دا ماماندار قاتىسۋدا.
سالتاناتتى ءىس-شارانىڭ اشىلۋ ءراسىمى «دوستىق ۇيىندە» ءوتتى. فەستيۆالدە رەجيسسەر دۋمان ەركىمبەكتىڭ تولىقمەتراجدى العاشقى تۋىندىسى – «QAITADAN» ءفيلمى كورسەتىلدى. بۇل كارتينا قازاق كينوسى تاريحىندا العاش رەت مەملەكەت قولداۋىمەن ءتۇسىرىلىپ, 1 ميلليارد تەڭگەدەن استام قارجى جيناپ, رەكورد ورناتتى.
سالتاناتتى راسىمدە قر ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى قۇرمانبەك جۇماعالي ءسوز سويلەدى. ونىڭ ايتۋىنشا, «قورقىت اتا» كينوفەستيۆالىن اقتاۋدا وتكىزۋ – ۇلكەن مارتەبە. سەبەبى اقتاۋعا بيىل تۇركى الەمىنىڭ مادەني استاناسى اتاعى بەرىلدى.
فەستيۆالدىڭ بايقاۋ باعدارلاماسىنا قر مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن كەلەسى تۋىندىلار ەندى:
- «Joqtau» (رەج. ارۋان انارتاي)
- «پريانيكي دليا ەيو وتتسا, موەگو پرادەدا, ەيو دەدا» (رەج. الينا مۋستافينا)
- «ەۆا. باتىر قىز» (رەج. تەمىربەك امانجول)
- «اتامەكەن» (رەج. جاننا قۇرماشەۆا).
فەستيۆال اياسىندا جەتەكشى كينو قايراتكەرلەرىمەن شىعارماشىلىق كەزدەسۋلەر, كينوسامميت, بايقاۋ جانە بايقاۋدان تىس فيلمدەر كورسەتىلىمى, سونداي-اق ماڭعىستاۋ ءوڭىرىنىڭ تۇمسا تابيعاتىن تانىستىراتىن مادەني باعدارلاما ۇيىمداستىرىلماق. بايقاۋدان تىس باعدارلامادا كينو ورتالىعىنىڭ «قاجىمۇقان» ءفيلمى (رەج. قاناعات مۇستافين) كورسەتىلەدى.
4 قازاندا فەستيۆالدىڭ جابىلۋ سالتاناتى ءوتىپ, جەڭىمپازدار ماراپاتتالادى. قازىلار القاسى «ۇزدىك كوركەم فيلم», «ۇزدىك رەجيسسەر», «ۇزدىك ستسەناري», «ۇزدىك اكتريسا» جانە «ۇزدىك اكتەر» نوميناتسيالارى بويىنشا جەڭىمپازداردى انىقتايدى. بۇعان قوسا, تۇركسوي-دىڭ «تۇركى مادەنيەتىنە قوسقان ۇلەسى ءۇشىن» ارنايى سىيلىعى دا تابىستالادى.
