قازاقستان اۆتوكولىك وداعىنىڭ دەرەگىنشە, 2024 جىلى ەلىمىزدە 44 مىڭنان استام Hyundai كولىگى ساتىلىپ, بيىلعى بەس ايدا 20 مىڭنان اسا اۆتوكولىك يەسىن تاپقان. ديستريبيۋتور دا بۇل دەرەكتەردى راستاي وتىرىپ ءوندىرىستىڭ ءۇش جىل قاتارىنان ساتىلىم كورسەتكىشى بويىنشا ءبىرىنشى ورىندى يەلەنىپ, كوش باستاپ تۇرعانىن مالىمدەدى.
تۇتىنۋشى تاڭداۋىن ايقىندايتىن فاكتورلار
كولىك وندىرىسىندەگى سۇرانىسقا اسەر ەتەتىن نەگىزگى فاكتورلاردى ماماندار بىرنەشە باعىتقا بولەدى. بىرىنشىدەن, باعا مەن ساپا اراقاتىناسى. ەلىمىزدەگى تۇتىنۋشىلاردىڭ باسىم بولىگى ورتا تاپقا جاتادى, ولاردىڭ ساتىپ الۋ قابىلەتى شەكتەۋلى. سوندىقتان «ارزان, بىراق سەنىمدى» كولىكتەرگە سۇرانىس جوعارى. ساراپشىلاردىڭ پىكىرىنشە, باعا تەك باستاپقى قۇندى ەمەس, كولىكتىڭ بۇكىل ومىرلىك تسيكلىندەگى شىعىنداردى قامتيدى: جانارماي ۇنەمدىلىگى, قوسالقى بولشەكتەردىڭ قولجەتىمدىلىگى, سەرۆيستىك قىزمەتتىڭ شىعىنى.
ەكىنشىدەن, زاماناۋي ديزاين مەن تەحنولوگيالىق جابدىقتالۋ دەڭگەيى. قازىرگى تۇتىنۋشى كولىكتى تەك قوزعالىس قۇرالى ەمەس, الەۋمەتتىك مارتەبە مەن كۇندەلىكتى ءومىردىڭ ءبىر بولىگى رەتىندە قابىلدايدى. Hyundai Auto Kazakhstan ساراپشىلارى كولىكتىڭ قاۋىپسىزدىك جۇيەلەرى, جۇرگىزۋشىگە كومەكشى فۋنكتسيالار, مۋلتيمەديالىق ينتەرفەيستىڭ قازاق تىلىندە بولۋى سياقتى قوسىمشالار شەشۋشى ءرول وينايتىنىن ايتادى:
«ەل تۇرعىندارى اراسىندا Tucson, Elantra, Mufasa جانە Santa Fe مودەلدەرى تانىمال. بۇل ەڭ الدىمەن سەنىمدىلىگى دالەلدەنگەن قوزعالتقىشتار مەن بەرىلىس قورابىنا, باعا مەن ساپانىڭ وڭتايلى اراقاتىناسىنا, زاماناۋي ديزاينى مەن باي جابدىقتالۋىنا بايلانىستى», دەيدى.
ۇشىنشىدەن, ديلەرلىك ورتالىقتار مەن سەرۆيستىك قىزمەتتىڭ كەڭەيۋى. ەل اۋماعى كەڭ بولعاندىقتان, سەرۆيس قولجەتىمدىلىگى ساتىپ الۋشى سەنىمىنە تىكەلەي ىقپال ەتەدى. ەگەر رەسمي ورتالىق كوپ بولسا, تۇتىنۋشى ءوز تاڭداۋىنا سەنىمدى بولادى. بۇل جەردە قوسالقى بولشەكتەردىڭ جەتكىلىكتىلىگى دە ماڭىزدى.
تورتىنشىدەن, trade-in جۇيەسى سياقتى قولجەتىمدى تەتىكتەردىڭ دامۋى. بۇرىن ەسكى كولىكتى ساتىپ, جاڭاسىن الۋ ءۇشىن ايلاپ ۋاقىت قاجەت بولسا, قازىر trade-in بۇل ۇدەرىستى جەڭىلدەتتى. «Trade-in جۇيەسى قازاقستانداعى بارلىق رەسمي Hyundai ديلەرلىك ورتالىقتارىندا جۇمىس ىستەيدى. 2025 جىلدىڭ العاشقى بەس ايىندا Hyundai ساتىپ العان كليەنتتەردىڭ 6 پايىزى وسى قىزمەتكە جۇگىندى. بۇل – ەسكى كولىكتى زاڭدى ءارى ىڭعايلى جولمەن جاڭا كولىككە جاڭارتۋ مۇمكىندىگى», دەپ تۇسىندىرەدى Hyundai ماماندارى.
قارجىلاندىرۋ – شەشۋشى تەتىك
جوعارىدا اتالعان فاكتورلاردىڭ ءبارى ماڭىزدى بولعانىمەن, تۇتىنۋشى ءۇشىن باستى ماسەلە – قولجەتىمدى باعا. اۆتونارىقتا ءتيىمدى نەسيە بولماسا, باعا مەن ساپا, ديزاين مەن سەرۆيسكە قاتىستى ارتىقشىلىقتاردىڭ ءبارى ناقتى ساتىپ الۋعا اپارمايدى. Hyundai بۇل باعىتتا اجەپتاۋىر تاجىريبە جيناقتاعان.
«2025 جىلدىڭ ءبىرىنشى جارتىجىلدىعىندا جىلىنا 4 پايىزدىق مولشەرلەمەمەن جەڭىلدەتىلگەن اۆتونەسيە باعدارلاماسى جۇزەگە استى. بۇل مەملەكەتتىك باعدارلاما ەمەس, ديستريبيۋتوردىڭ ەكىنشى دەڭگەيلى بانكتەرمەن بىرلەسكەن ارنايى ۇسىنىسى بولدى. ول بارلىق مودەلدەرگە تارالدى, ال Palisade ءۇشىن – 1%, Tucson ءۇشىن – 3,5%. الايدا مۇنداي باعدارلامالار تۇراقتى ەمەس, قازىرگى تاڭدا 4 پايىزدىق نەسيە ۋاقىتشا توقتاتىلدى», دەيدى كومپانيانىڭ رەسمي جاۋابى.
بۇگىندە ەڭ كوپ سۇرانىس بەس جىلعا بەرىلەتىن, باستاپقى جارناسى 10-30 پايىز ارالىعىنداعى نەسيەلەرگە ءتۇسىپ وتىر. Hyundai ماماندارىنىڭ ايتۋىنشا, تاجىريبە كورسەتكەندەي, بەس جىلدىق وتەۋ مەرزىمى اي سايىنعى تولەم مەن جالپى ارتىق تولەم اراسىنداعى تەڭگەرىمدى ساقتايدى. بۇل ازاماتتاردىڭ قارجىلىق جوسپارلاۋعا بەيىمدەلگەنىن اڭعارتادى.
جاڭا مودەلدەر جانە ءوندىرىستىڭ كەمەلدەنۋى
كولىك ءوندىرىسىنىڭ الەۋەتىن باعالاۋدا جاڭا مودەلدەردىڭ شىعۋى ەرەكشە ورىن الادى. جاقىن ارادا الماتىداعى زاۋىتتا جاڭارتىلعان Hyundai Palisade مودەلىنىڭ ءوندىرىسى باستالادى. ساتىلىمى 2025 جىلدىڭ تامىز ايىنا جوسپارلانىپ وتىر. ماقساتى – مودەلدى جاڭارتۋ عانا ەمەس, وتاندىق ءوندىرىستىڭ تەحنولوگيالىق دەڭگەيىن ارتتىرۋعا باعىتتالعان. ساراپشىلاردىڭ ايتۋىنشا, الداعى ۋاقىتتا گيبريدتى جانە ەلەكترلى مودەلدەرگە نازار اۋدارۋ – ۋاقىت تالابى.
سونىمەن قاتار, قوسالقى بولشەكتەردى جەرگىلىكتى ءوندىرۋ كەڭەيىپ كەلەدى. الماتى يندۋستريالىق ايماعىندا ورىندىق شىعاراتىن زاۋىت ىسكە قوسىلدى, مۋلتيمەديالىق جۇيەلەردى وندىرەتىن كاسىپورىن جۇمىسىن باستادى. بۇل – ەلىمىزدەگى اۆتوموبيل ءوندىرىسىنىڭ الەۋەتتەنگەنىن بىلدىرەتىن ماڭىزدى قادام.
