بۇگىندە جوبانى ىسكە اسىرۋ ءۇشىن رەسپۋبليكالىق دەڭگەيدە مەملەكەتتىك-جەكەمەنشىك ارىپتەستىك اياسىندا كەلىسىم جاساۋ مۇمكىندىگى قاراستىرىلىپ جاتىر. اقمولا وبلىسى اكىمىنىڭ ءباسپاسوز قىزمەتىنىڭ حابارلاۋىنشا, پيلوتتىق جوبا الدىمەن ءبىزدىڭ وبلىستا ىسكە قوسىلىپ, كەيىن رەسپۋبليكا بويىنشا تاراتىلادى.
جۋىردا وبلىس اكىمىنىڭ ورىنباسارى التىناي امىرەنوۆانىڭ توراعالىعىمەن «تىنىس» اكتسيونەرلىك قوعامىندا اتالعان جوبانى جۇزەگە اسىرۋ ماسەلەلەرىنە ارنالعان جيىن ءوتتى. بۇل باستاما مۇمكىندىگى شەكتەۋلى جانداردىڭ مۇمكىندىكتەرىن كەڭەيتۋگە باعىتتالعان جانە ءاربىر قازاقستاندىقتىڭ تەڭ قۇقىعىن قامتاماسىز ەتۋ مەن ءومىر ساپاسىن ارتتىرۋ جونىندەگى مەملەكەت مىندەتتەرىنە ساي كەلەدى.
– قازاقستان رەسپۋبليكاسىنىڭ پرەزيدەنتى ەرەكشە قاجەتتىلىكتەرى بار ازاماتتاردى قولداۋ ەلدىڭ الەۋمەتتىك ساياساتىنىڭ نەگىزگى باسىمدىقتارىنىڭ ءبىرى ەكەنىن اتاپ وتكەن بولاتىن. بۇگىندە وڭىردە 29 مىڭنان استام مۇگەدەكتىگى بار ادام تۇرادى, ولاردىڭ 1293-ءى اربامەن قوزعالادى. جىل سايىنعى قاجەتتىلىك – بەلسەندى پايدالانۋشىلار ءۇشىن شامامەن 300 ەلەكترقوسالقى قۇرىلعى. جوبانى جۇزەگە اسىرۋ ينكليۋزيۆتى قوعام قۇرۋعا, ينفراقۇرىلىمدىق جانە الەۋمەتتىك كەدەرگىلەردى جويۋعا, سونداي-اق وتاندىق ازىرلەمەلەر مەن وندىرىستەردى قولداۋعا مۇمكىندىك بەرەدى, – دەپ اتاپ ءوتتى التىناي امىرەنوۆا.
قازىرگى ۋاقىتتا «تىنىس» اكتسيونەرلىك قوعامىندا وسىعان دايىندىق جۇمىستارى باستالدى. وندىرىستىك بازا قۇرىلىپ, تەحنيكالىق پىسىقتاۋ جانە جوبانى ىسكە قوسۋ ءىس-شارالارى قاراستىرىلۋدا.
كوكشەتاۋ.
