فوتو: gov.kz
قۇرمەتتى قوناقتار قاتارىندا قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى, قر مادەنيەت جانە اقپارات ءمينيسترى ايدا بالاەۆا, قىرعىز رەسپۋبليكاسىنىڭ ەكونوميكا جانە كوممەرتسيا ءمينيسترىنىڭ ورىنباسارى گۇلشات اسىلباەۆا, ازەربايجان رەسپۋبليكاسىنىڭ ميللي مەدجليسى جانىنداعى وتباسى, ايەلدەر جانە بالالار ىستەرى جونىندەگى كوميتەتىنىڭ توراعاسى يدجران گۋسەينوۆا, وزبەكستان رەسپۋبليكاسى پرەزيدەنتى جانىنداعى ستراتەگيالىق رەفورمالار اگەنتتىگىنىڭ ناتيجەلەرگە قول جەتكىزۋ كەڭسەسىنىڭ جەتەكشىسى ازيزا ۋماروۆا, كورەيا رەسپۋبليكاسىنىڭ ساۋدا جانە ونەركاسىپ سالاسىنداعى ايەلدەر حالىقارالىق فەدەراتسياسىنىڭ پرەزيدەنتى سوفي كانگ جانە باسقا دا بەدەلدى تۇلعالار بولدى.
«بۇگىندە قازاقستاندىق قوعامنىڭ دامۋ باعىتتارى ايقىن. مەملەكەت باسشىسى قازاقستاننىڭ جاڭا يدەولوگيالىق تۇعىرىن قالىپتاستىردى. ول ۇزاق مەرزىمدى تۇجىرىمدامالارعا نەگىزدەلگەن. اتاپ ايتساق, «زاڭ مەن ءتارتىپ», «تازا قازاقستان», «ادال ازامات» باستامالارى. وسى تۇجىرىمدامالاردى جۇزەگە اسىرۋدا بىزگە – كوشباسشى ايەلدەرگە, قۇندىلىقتاردى ساقتاپ ۇرپاقتا-ۇرپاققا جەتكىزەتىن انالارعا جاۋاپكەرشىلىك جۇكتەلدى. ءبىز جاس ۇرپاققا ىشكى مادەنيەت پەن زاڭعا باعىنۋدى, دامۋعا ۇمتىلۋدى, ەڭبەكقور جانە جاۋاپتى ازامات بولۋدى, ءوز مادەنيەتى مەن داستۇرىنە ۇقىپتى قاراۋدى, تابيعاتتى ءسۇيۋ مەن ادامي قادىر-قاسيەتتى قاستەرلەۋدى, بىرلىك پەن تولەرانتتىلىق قۇندىلىقتارىن دارىپتەپ, ءسىڭىرۋىمىز كەرەك», دەدى ايدا بالاەۆا.
ۇلتتىق كوميسسيا توراعاسىنىڭ ايتۋىنشا, قازاقستان ايەل قۇقىقتارىن قورعاۋ كورسەتكىشتەرى بويىنشا الەمنىڭ بىرقاتار ەلىنەن الدا تۇر. دەگەنمەن, گەندەرلىك تەڭدىك پەن ايەلدەر كاسىپكەرلىگىن دامىتۋ ماسەلەلەرى ءالى دە وزەكتى.
«بۇگىندە قازاقستاندا وتباسىلىق-تۇرمىستىق قاتىناستار سالاسىندا پروگرەسسيۆتى زاڭدار قابىلداندى. زاڭنامالىق دەڭگەيدە حاراسسمەنت قىلمىستىق جاۋاپكەرشىلىككە تارتىلاتىن بولادى. تۇرمىستىق زورلىق-زومبىلىق ءۇشىن تەك جاۋاپكەرشىلىك كۇشەيتىلىپ قانا قويماي, قوعامنىڭ نارازىلىعىن تۋدىرىپ, ۇيات سانالاتىن قۇبىلىسقا اينالدى. قالىڭدىقتى ۇرلاۋ دا قاتاڭ جازالاناتىن قىلمىسقا ەندى, ول ءۇشىن ون جىلعا دەيىن باس بوستاندىعىنان ايىرۋ جازاسى قاراستىرىلعان», دەدى مينيستر.
ايدا بالاەۆ ءسوزىن قورىتىندىلاي كەلە فورۋمعا قاتىسۋشىلاردىڭ جۇمىسىنا تابىس, باستامالارىنا ساتتىلىك تىلەدى.
بيىلعى «BeWoman Asia» فورۋمى «ترانسفورماتسيا. تۇلعا. وتباسى. قوعام. بولاشاق. كوشباسشىلىق. شابىت. بىرلىك» ۇرانىمەن ءوتتى. فورۋم اياسىندا تسيفرلاندىرۋ, جاساندى ينتەللەكت, بيزنەس جانە وتباسى ينستيتۋتىنىڭ قۇندىلىقتارى سياقتى كەڭ اۋقىمدى ماسەلەلەر تالقىلاندى. سپيكەرلەر قاتارىندا حالىقارالىق جانە قازاقستاندىق كاسىپكەرلەر, زەرتتەۋشىلەر, جۋرناليستەر مەن ينفليۋەنسەرلەر دە بولدى.
