فوتو: اشىق دەرەككوزدەن
بۇعان دەيىن ەلىمىزدىڭ اياقدوپ شەبەرلەرىنەن قۇرالعان كوماندالار اراسىندا العاش بولىپ 2015/16 جىلعى ماۋسىمدا «Astana» فۋتبول كلۋبى چەمپيوندار ليگاسىنىڭ نەگىزگى كەزەڭىندە دوپ تەپتى. ەلوردالىق كلۋب كيپرلىك اپوەل-ءدى جالپى ەسەپتە 2-1 ەسەبىمەن جەڭىپ تاريحقا تۇرەڭ سالعان ەدى.
ال توپتىق كەزەڭدە «Astana» الەمنىڭ الپاۋىت كوماندالارى يسپاندىق «اتلەتيكو مادريد», تۇركيالاق «گالاتاساراي» مەن پورتۋگاليانىڭ «بەنفيكا» فۋتبول كلۋبتارىنا قارسى جاسىل الاڭعا شىقتى.
«Astana» ءوز الاڭىندا گريزمانن, فەرناندو توررەس باستاعان «اتلەتيكو مادريدپەن» 0-0 ەسەبىمەن تەڭ ءتۇسىپ, جارقىن ەموتسيا سىيلاعانى جانكۇيەرلەر ەسىندە بولسا كەرەك؟! «Astana» توپتىق كەزەڭنىڭ ءوز الاڭىندا وتكەن ماتچتارىندا «گالاتاساراي», «بەنفيكامەن» دە تەڭ تۇسكەن بولاتىن.
ال جاڭا تاريح بيىل جازىلعالى تۇر. ون جىلعا جۋىق ۇزىلىستەن كەيىن «قايرات» كومانداسى كلۋبتىق تروفەيدىڭ نەگىزگى كەزەڭىنە جولداما الدى. «قايراتتىڭ» تروفەي جولىنداعى تاعدىرى شوتلانديالىق «سەلتيكپەن» پەنالتي سەرياسى ارقىلى شەشىلدى. شەشۋشى ماتچتا «قايراتتىڭ» جاس قاقپاشىسى تەمىرلان اناربەكوۆ 3 بىردەي سوققىنى ءساتتى توقتاتتى.
«قايراتتىڭ» قارسىلاستارى 28 تامىزدا موناكودا چەمپيوندار ليگاسىنىڭ نەگىزگى كەزەڭى بويىنشا وتكەن جەرەبەدە انىقتالدى. ناتيجەسىنددە «قايرات» «رەال» (مادريد), «ينتەر» (ميلان), «ارسەنال» (لوندون), «بريۋگگە», «سپورتينگ» (ليسسابون), «وليمپياكوس», «پافوس» جانە «كوپەنگاگەن» كلۋبتارىمەن ءبىر توپقا ءتۇستى. ونىڭ تورتەۋى الماتىدا, ال قالعان تورتەۋى سىرت الاڭدا وتەدى.
الماتىلىق كلۋب ءوز الاڭىندا «رەالدى», «بريۋگگەنى», «وليمپياكوستى» جانە «پافوستى» قابىلداسا, سىرت الاڭدا «ينتەر», «ارسەنال», «سپورتينگ» جانە «كوپەنگاگەنمەن» وينايتىنى بەلگىلى بولعان.
70 جىلدىق تاريحى بار وتاندىق كوماندا چەمپيوندار ليگاسىنداعى العاشقى ماتچىن وتكىزىپ ۇلگەردى. كلۋب بۇل ليگاداعى دەبيۋتىندە 4-1 ەسەبىمەن ەسە جىبەرگەنمەن, ويىن بارىسىنداعى «سپورتينگ» كاپيتانى مورتەن يۋلماننىڭ 11 مەترلىك سوققىسىنان قاقپاسىن قورعاپ قالۋى جانكۇيەرلەردى ءتانتى ەتتى. الماتىلىق كلۋبتىڭ ەسەبىنە جازىلعان جالعىز گولدى ەدميلسون 86-مينۋتتا سالدى.
جاسىراتىنى جوق جانكۇيەرلەر «قايراتتىڭ» كەلەسى قايراتتى قارسىلاسى كورولدىك كلۋبپەن ويىندى اسىعا كۇتىپ وتىر. وتانداستارىمىز چەمپيوندار ليگاسىنىڭ 15 دۇركىن چەمپيوندارىمەن المالى شاھاردىڭ «ورتالىق ستاديونىندا» 30 قىركۇيەك كۇنى كەزەكتى ماتچىن وتكىزەدى.
ماڭىزدى ماچتى «Qazaqstan» جانە «Qazsport» ارنالارى 21:35-تە تىكەلەي ەفيردە كورسەتەدى.
