فورۋمنىڭ نەگىزگى ماقساتى – ءوڭىردىڭ تۋريستىك جانە ينۆەستيتسيالىق الەۋەتىن تانىستىرۋ, ورتالىق ازياداعى ءتۋريزمدى دامىتۋ پەرسپەكتيۆالارىن تالقىلاۋ جانە حالىقارالىق ىنتىماقتاستىقتى كەڭەيتۋ. باعدارلاما اياسىندا ينۆەستيتسيا تارتۋ, كولىك قولجەتىمدىلىگى, مەديتسينالىق, وقيعالىق جانە جاپپاي ءتۋريزمدى دامىتۋ ماسەلەلەرىنە ارنالعان پلەنارلىق وتىرىستار جوسپارلانعان.
ء«تۋريزمدى دامىتۋ – مەملەكەتتىڭ باسىم باعىتتارىنىڭ ءبىرى. ىشكى جانە كەلۋ ءتۋريزمىن قولداۋ, قولايلى ينۆەستيتسيالىق احۋال قالىپتاستىرۋ جانە بيزنەسكە جاڭا مۇمكىندىكتەر اشۋ باعىتىندا مەملەكەت ناقتى شارالار قابىلداپ جاتىر. بيىل ماڭعىستاۋ وبلىسىن دامىتۋدىڭ 2025-2029 جىلدارعا ارنالعان كەشەندى جوسپارى بەكىتىلدى. قۇجات اياسىندا جالپى قۇنى 401 ملرد تەڭگەنى قۇرايتىن 100-دەن استام ءىس-شارا قاراستىرىلعان. بۇل فورۋم ءوڭىر ءۇشىن جاڭا مۇمكىندىكتەر اشاتىن ماڭىزدى قادام بولماق», دەدى ەربول مىرزابوسىنوۆ فورۋمنىڭ اشىلۋ سالتاناتىندا.
سونداي-اق ەلگە شەتەلدىك تۋريستەردى تارتۋ ءۇشىن قولايلى جاعداي جاسالۋدا. بۇگىندە قازاقستانعا 87 ەلدىڭ ازاماتتارى ۆيزاسىز كىرە الادى, ال 30 مەملەكەتپەن تىكەلەي اۋە رەيستەرى اشىلعان. بۇدان بولەك, «اۋە كەڭىستىگىنىڭ بەسىنشى ەركىندىگى» رەجيمى قولدانىلادى. مۇنىڭ بارلىعى قازاقستاننىڭ حالىقارالىق ساياحاتشىلار ءۇشىن تارتىمدىلىعىن ايتارلىقتاي ارتتىرادى. ماڭعىستاۋ وبلىسىنىڭ اكىمى نۇرداۋلەت قيلىباي ءوڭىردىڭ تۋريستىك سالاسىن دامىتۋعا توقتالىپ, ينفراقۇرىلىمدىق جوبالاردىڭ قارقىندى ىسكە اسىرىلىپ جاتقانىن اتاپ ءوتتى.
«ماڭعىستاۋ – تەك مۇناي مەن گاز عانا ەمەس, سونداي-اق قايتالانباس تابيعي جانە مادەني مۇراسى بار ەرەكشە ءوڭىر. پرەزيدەنت تاپسىرماسىنا سايكەس, ءبىز وبلىستى تۋريستەر مەن ينۆەستورلار ءۇشىن تارتىمدى ورتالىققا اينالدىرۋ باعىتىندا جۇيەلى جۇمىس جۇرگىزىپ جاتىرمىز. ءتۋريزمدى دامىتۋ ءۇشىن قولايلى جاعداي جاسالۋدا. دەگەنمەن ەڭ باستىسى – بۇل باعىتتا ەكولوگياعا جانە قورشاعان ورتاعا زيان كەلتىرۋگە جول بەرمەۋىمىز كەرەك. سونىمەن بىرگە ۇلتتىق قۇندىلىقتارىمىز بەن مادەنيەتىمىزدى ساقتاۋ ماڭىزدى. قازىرگى ماقسات – قازاقتىڭ ءداستۇرلى زاڭدىلىقتارى مەن ۇلتتىق داستۇرلەرىن ساقتاي وتىرىپ, ماڭعىستاۋدا ءتۋريزمدى بارىنشا دامىتۋ», دەدى نۇرداۋلەت قيلىباي.
ماڭعىستاۋ ءوڭىرى قازاقستاننىڭ تۋريستىك كارتاسىندا ايرىقشا ورىنعا يە. كاسپي تەڭىزىنىڭ جاعالاۋى, بوزجىرا مەن قىزىلكۇپ شاتقالىنىڭ قايتالانباس لاندشافتتارى, باي تاريحي-مادەني مۇراسى ايماقتى ورتالىق ازياداعى ەڭ الەۋەتتى تۋريستىك باعىتتاردىڭ بىرىنە اينالدىرادى. اقتاۋداعى فورۋم ەلىمىزدىڭ جانە بۇكىل ءوڭىردىڭ تۋريزم سالاسىنا تىڭ سەرپىن بەرىپ, حالىقارالىق ارىپتەستىكتى نىعايتۋعا جانە ينۆەستيتسيالىق مۇمكىندىكتەردى كەڭەيتۋگە جول اشادى.
