فوتو: egemen.kz/ قىرمىزى جۇماعاليقىزى
قازاقستاننىڭ مەديتسينالىق ءتۋريزمدى دامىتۋ مۇمكىندىگى
وتاندىق مەديتسينانىڭ نەيرو جانە كارديوحيرۋرگيا, پەريناتالدىق مەديتسينا, نەۆرولوگيا جانە ستوماتولوگيا سالالارى شەتەلدىكتەر تاراپىنان جوعارى قىزىعۋشىلىقتى تۋدىرىپ وتىر. ماسەلەن, قازاقستاندىق مەديتسينالىق تۋريزم قاۋىمداستىعىنىڭ مالىمەتىنشە, ەلىمىزگە ەم ىزدەپ كەلگەندەر سانى 2022 – 2024 جىلدار ارالىعىندا 1200-دەن 80 مىڭ ادامعا وسكەن. كورشى مەملەكەت ازاماتتارىنان بولەك گەرمانيا, اقش, يزرايل, ءباا جانە شۆەيتساريادان كەلەتىن مەديتسينالىق تۋريستەر لەگى بىرتىندەپ ارتىپ كەلەدى. نۇرگۇل تاۋ وڭ كورسەتكىش كەزدەيسوق ەمەس, ناقتى فاكتورلار نەگىزىنەن كوتەرىلىپ وتىرعانىن تىلگە تيەك ەتتى. ونىڭ العاشقىسى حالىقارالىق اككرەديت بولسا, ەكىنشىسى ەلىمىزدەگى جوعارى ساپالى مەديتسينالىق قىزمەتتەر باسقا ەلدەرگە قاراعاندا الدەقايدا قولجەتىمدى ەكەندىگى. ماسەلەن, استانا اكىمدىگىنە قاراستى «استانانى دامىتۋ ورتالىعىنىڭ» اقپاراتىنا سايكەس قازاقستاندا جۇرەك شۋنتتاۋ حيرۋرگياسى اقش-قا قاراعاندا 80 ەسە, سينگاپۋرعا قاراعاندا 11 ەسە ارزان. ءۇشىنشى, ەلدەگى مەديتسينالىق ۇيىمداردىڭ مەديتسينالىق تۋريستتەردى تارتۋعا ەكونوميكالىق جاعىنان مۇددەلى بولۋى.
وسىنداي ىرگەلى مۇمكىندىكتەردى قوماقتى ەكونوميكالىق تابىسقا اينالدىرۋ تۇسى تۇرالاپ تۇرعانى جاسىرىن ەمەس. ءماجىلىس دەپۋتاتى ساۋالىندا سالادا شەشىمىن تابۋى ءتيىس ماسەلەلەردى اتادى.
«ەلدەگى مەديتسينالىق ۇيىمدار مەن تۋريستتىك وپەراتورلاردىڭ اراسىنداعى ءوزارا ارەكەتتەستىك جوقتىڭ قاسى. ماسەلەن, مەديتسينالىق مەكەمەلەر تۋريستتىك-بيزنەسكە بەيىمدەلمەگەندىكتەن تۋريستتەرگە بيلەتتەردى ساتىپ الۋ, تۇرمىستىق جاعدايدى ۇيىمداستىرۋ سياقتى قوسىمشا قىزمەتتەردى ساپالى تۇردە بەرە المايدى. ويتكەنى, بۇل تۋريستتىك ۇيىمداردىڭ قۇزىرىندا. سول سەبەپتەن, كلينيكالار مەن مەديتسينالىق تۋريستەرگە ساۋاتتى قولداۋ كورسەتە الاتىن مەديتسينالىق تۋريزم سالاسىنداعى بىرىڭعاي وپەراتوردى قۇرۋ قاجەت دەپ ويلايمىن. ونىڭ قۇزىرەتىنە دياگنوستيكا جانە ەمدەۋ بويىنشا كونسالتينگ, تۋريستتەردىڭ سانىن تىركەۋ, تۋريستتىك ءونىمدى ۇسىنۋ, تاسىمال جانە مەديتسينالىق اۋدارماشى قىزمەتىن كىرگىزۋگە بولادى», دەدى نۇرگۇل تاۋ.
تۇركيا تاجىريبەسى
سۇرانىس ارتسا باعا دا كوتەرىلەتىنى - نارىق زاڭى. بۇل ماسەلەنى دە الدىن – الا باعامداعان ابزال. نۇرگۇل تاۋ بىزگە بەرگەن جاۋابىندا وسى تۇرعىدا تۇركيا تاجىريبەسىن ۇستىن ەتۋدى ۇسىندى.
«الەمدىك ۇزدىك ۇلگىلەر قاتارىنان تابىلاتىن تۇركيادا مەديتسينالىق ءتۋريزمدى دامىتۋ ۇلتتىق ستراتەگيا دەڭگەيىندە ىسكە اسىرىلادى – Health Tourism Vision 2030 باعدارلاماسى قابىلدانعان. باۋىرلاس ەلدە سۇرانىس سوڭىنان قالتاعا سالماق سالماۋ ءۇشىن جەرگىلىكتى حالىققا باسقا, شەتەلدىك ەم الۋشىلارعا وزگە باعا بەكىتىلگەن. ء بىزدىڭ ەلدە وسى ۇلگىنى ۇستانعانى دۇرىس», دەدى دەپۋتات.
مەديتسينالىق ءتۋريزمدى جولعا قويعان تۇرىك ەلىنەن الاتىن وزگە دە تۇششىمدى تاجىريبەلەر جەتكىلىكتى. سونىڭ ءبىرى مەديتسينالىق ءتۋريزمدى تۇلەتۋ باعىتىندا جۇمىس ىستەپ وتىرعان تۋروپەراتورلارلار مەن مەديتسينالىق مەكەمەلەردى قولداۋدىڭ مەملەكەتتىك جۇيەسى.
«تۇركيا مەديتسينالىق ۇيىمدار مەن تۋروپەراتورلارعا: حالىقارالىق كورمەلەرگە قاتىسۋعا سۋبسيديالار بەرەدى, ماركەتينگ شىعىندارىن ءىشىنارا وتەيدى, شەتەلدىك پاتسيەنتتەرگە قىزمەت كورسەتۋ ساپاسىن ارتتىرۋ ءۇشىن گرانتتار مەن جەڭىلدەتىلگەن نەسيەلەر ۇسىنادى. قاتىسۋشىلارعا قىزمەتتى Türkiye Health Tourism Council دەپ اتالاتىن ورتالىق ورگان ۇيلەستىرەدى. وندا ءىرى كلينيكالار, اسىرەسە جەكەمەنشىك مەديتسينا ۇيىمدارى (Acıbadem, Memorial, Anadolu) وزدەرىنىڭ ىشكى تۋريزم بولىمشەلەرىن نەمەسە سەرىكتەس تۋروپەراتورلاردى پايدالانادى. مەملەكەتتىك قولداۋ مەن ۇتىمدى جۇيەنىڭ ناتيجەسىندە ناۋقاس ەمدەۋدەن بولەك, تۋريستىك قىزمەتتەردى ءبىر تەرەزە قاعيداتىمەن الادى», دەگەن Respublica پارتياسى فراكتسياسىنىڭ مۇشەسى مەديتسينالىق تۋريزم دەڭگەيىن ارتتىرۋ ءۇشىن مەديتسينالىق تۋريستتەرگە ارنالعان ارنايى تسيفرلىق ۆيزانى قولعا الۋدى ۇسىندى.
سونداي-اق قازاقستانداعى مەديتسينالىق ۇيىمداردىڭ مەديتسينالىق تۋريستەرگە قىزمەت كورسەتۋگە دايىندىعىنىڭ تومەندىگى دە كوكەيكەستى ماسەلە. نۇرگۇل تاۋ بۇل باعىتتا استانا مەن الماتىدان بولەك ءوڭىر ۇيىمدارىنىڭ دا الەۋەتىن ارتتىرۋدى اتاپ ءوتىپ, بازاسى مىقتى جەكەمەنشىك كلينيكالارعا دا جان-جاقتى قولداۋ كورسەتە وتىرىپ, قىزمەتىن كەڭىنەن پايدالانۋى قاجەت ەكەنىنە دە نازار اۋداردى.
