فوتو: primeminister.kz
سەمينار بارىسىندا ۆيتسە-پرەمەر كاسىپكەرلىككە تىكەلەي قاتىستى وزەكتى تاقىرىپتاردىڭ ءبىرى – ارنايى سالىق رەجيمدەرى جونىندە تۇسىنىكتەمە بەردى.
«باستى قاعيدا: بۇعان دەيىن كىم وڭايلاتىلعان سالىق رەجيمىندە جۇمىس ىستەپ كەلگەن بولسا, سول رەجيمدە قالادى», دەدى سەرىك جۇمانعارين.
سونىمەن قاتار ول وڭدەۋ ونەركاسىبى سالاسىنا ەنگىزىلەتىن جاڭا ەرەجەلەرگە توقتالدى. ءمينيستردىڭ ايتۋىنشا, تۇپكى تۇتىنۋشىعا باعىتتالعان كاسىپورىندارعا جەڭىلدەتىلگەن سالىق رەجيمىن قولدانۋعا مۇمكىندىك بەرىلەدى.
«وڭدەۋ ونەركاسىبىنىڭ ءبىر بولىگىنە رۇقسات بەرەمىز. ەڭ الدىمەن, ول كاسىپورىن وفسەتتە نەمەسە ءىرى كاسىپورىندار ءۇشىن جەتكىزۋشى بولىپ سانالمايتىن B2C سەكتورىنا باعىتتالعان بولۋى ءتيىس», دەپ ناقتىلادى ول.
ال سالانىڭ قالعان بولىگى جالپىعا ورتاق سالىق سالۋ تارتىبىنە كوشەدى. بۇل شەشىم وڭدەۋ كاسىپورىندارى ءۇشىن قولدانىستاعى سالىقتىق ىنتالاندىرۋ شارالارىنىڭ بار بولۋىمەن بايلانىستى. ماسەلەن, وندىرىستىك ماقساتتاعى يمپورتقا ققس ەسەپتەلەدى, سونداي-اق جاڭعىرتۋ جۇمىستارى كەزىندە دە سالىق الىنبايدى.
ۆيتسە-پرەمەر مەملەكەت تاراپىنان كورسەتىلىپ جاتقان قولداۋلاردى دا ەرەكشە اتاپ ءوتتى. ونىڭ سوزىنشە, قازىر دامۋ ينستيتۋتتارى ارقىلى اۋقىمدى باعدارلامالار جۇزەگە اسىرىلىپ وتىر.
ء«بىز دامۋ ينستيتۋتتارى بويىنشا اۋقىمدى باعدارلامانى باستادىق. «بايتەرەكتى» كاپيتالداندىرۋ بيىل 1 ترلن تەڭگەگە جۋىقتادى, ال ءۇش جىلدىق بيۋدجەتكە جىل سايىن 1 ترلن تەڭگەدەن سالىپ وتىرمىز. ءبىزدىڭ بيزنەسكە, سونىڭ ىشىندە نەگىزىنەن وڭدەۋ ونەركاسىبىنە جاساپ وتىرعان قولداۋ شارالارىمىز قوماقتى قارجىنى تالاپ ەتەدى. سول سەبەپتى جالپى العاندا وڭدەۋ سالاسى قولداۋدان شەت قالمايدى دەۋگە بولادى», دەدى جۇمانعارين.
