اق جايىقتان قارت قاراتاۋعا

وڭتۇستىك قازاقستان وبلىسىندا ءۇش كۇن قاتارىنان وتكەن اتىراۋ وبلىسىنىڭ مادەنيەت كۇندەرىنىڭ شىمىلدىعى «تۇركىستان» سالتانات سارايىندا جابىلدى. جابىلدى دەپ اقجايىقتان كەلگەن اعايىننىڭ اتىراۋعا ورالاتىندىعىنا عانا قاتىستى ايتىپ جاتىرمىز, ايتپەسە بارماساڭ, كەلمەسەڭ جات بولاتىن زاماندا از كۇن ىشىندە ءبىر ءۇيدىڭ بالاسىنداي ەتەنە جاقىن بولىپ ۇلگەرگەن جۇزدەسۋلەردىڭ تاعىلىمىن ەكى جاق تا ۇمىتا قويماس. بەلگىلى جازۋشى راقىمجان وتارباەۆپەن وتكەن وقىرماندار كەزدەسۋلەرىنەن وسىنى ۇقتىق. «تۇركىستانداعى» گالا-كونتسەرت دينا نۇرپەيىسوۆا اتىنداعى اكا­دەميالىق ۇلت-اسپاپتار وركەس­ترىنىڭ كۇيىمەن اشىلدى. – وزدەرىڭىز بىلەتىندەي, 2013 جىلى ەلباسى وڭىرلەر اراسىنداعى قارىم-قاتىناستى نىعايتۋ ءۇشىن اپتالىقتار وتكىزۋدى تاپسىرعان بولاتىن, – دەدى وبلىس اكىمى اسقار مىرزاحمەتوۆ. – وسىعان وراي, وتكەن جىلى ءبىزدىڭ وڭىرگە جامبىل, ماڭعىستاۋ وبلىسىنىڭ ونەرپازدارى گاسترولدىك ساپارمەن كەلدى. مادەني ونكۇندىكتەر بارلىق ايماقتا وتۋدە. ءۇش كۇن قاتارىنان كوتەرىڭكى كوڭىل كۇي سىيلاعان اتىراۋلىق ونەرپازدار دا تەك شىمكەنت قالاسىمەن شەكتەلمەي, اۋدان ساحنالارىندا ونەر كورسەتتى. مادەني كۇندەر اياسىندا ولكەنىڭ رۋحانياتىن عانا ەمەس, جالپى, تىنىسىن سەزگەندەي بولدىق. تاريحى تەرەڭ, مادەنيەتى اۋقىمدى اتىراۋدان كەلگەن ونەر وكىلدەرىنە وڭتۇستىك حالقى اتىنان العىس ايتامىن. وسىلاي دەگەن اسقار يسابەك ۇلى اتىراۋ وبلىسى اكىمىنىڭ ورىنباسارى, دەلەگاتسيا جەتەكشىسى شىڭعىس مۇقانعا «تاۋ سامالى» وقۋ-ساۋىق­تىرۋ ورتالىعىنا 100 ورىنعا جولداما مەن العىس حات تابىس ەتتى. اتىراۋ وبلىسى اكىمىنىڭ ورىن­­باسارى شىڭعىس مۇقان – وڭتۇستىكقازاقستاندىقتارعا بوتەن ەمەس, ءوز باۋىرىندا وسكەن ءبىر بالاسى. بەلگىلى جۋرناليست جۇمابەك مۇقانوۆتىڭ ۇلى شىڭعىستىڭ وڭتۇستىككە ات ءىزىن سالماعانىنا ءبىراز ۋاقىت بولعان ەكەن. – از عانا ۋاقىتتىڭ ىشىندە شىم­­كەنت ادام تانىماستاي اجارلانىپ كەتىپتى, – دەدى ول. – بۇل, بىرىنشىدەن ەلباسىنىڭ وڭىرلەرگە سالعان ينۆەستيتسياسىنىڭ جەمى­سى بولسا, ەكىنشىدەن باردى ۇقسا­تىپ وڭتۇستىك جۇرتىنىڭ ءتورت قۇبى­لاسىن تۇگەندەيتىندەي جەمىس­تى جۇ­مىستار اتقارعان وبلىس باس­شىسىنىڭ ەڭبەگى. از وتىرىپ كوپ سىنايتىن قوناق ايتقان لەبىز كەڭ سارايعا ينە شانشار ورىن قالدىرماعان جۇرتقا جاعىمدى اسەر ەتتى. شىڭعىس مۇقان ەكى وبلىس اراسىنداعى مادەني بايلانىستىڭ كادەسى رەتىندە وبلىس باسشىسى اسقار يسابەك ۇلىنا اتىراۋ ءان-كۇي مۇراسىنىڭ 12 ديسكىدەن تۇراتىن ەلەكتروندى جيناعىن, ون تومدىق پوەزيا انتولوگياسىن, ءور اقىن م.وتەمىس ۇلىنىڭ بەينەسى بەينەلەنگەن توسبەلگى جانە دومبىرا بويتۇماردى سىيعا تارتتى. كەڭ تىنىستى كونتسەرتتىك باعدار­لاما كورەرمەندەردىڭ كوڭى­لىنەن شىقتى. دينا نۇرپەيىسوۆا اتىنداعى اكادەميالىق ۇلت-اسپاپتار وركەسترى, اسپانداعى اققۋعا ءان قوسقان گۇلمايدان سۇندەتوۆا, ۆەنەرا ماشقاليەۆا, اسەت ءالي باستاعان انشىلەردىڭ ونەرى, ءورشىل جىگىتتەر بي توبىنىڭ تامىرلاردى بۇلكىلدەتىپ قان قىزدىرۋى, «ادايدان» «ماحامبەتكە» ۇلاسقان كۇي كۇمبىرى تىڭدارمانداردىڭ جانىن باۋرادى. باقتيار تايجان, «ەگەمەن قازاقستان». شىمكەنت.