فوتو: اشىق دەرەككوز
كولىك مينيسترلىگىنىڭ باستاماسىمەن قازاقستان جول عىلىمي-زەرتتەۋ ينستيتۋتى ازىرلەگەن دەرەكقوردىڭ باستى ماقساتى – كادر تاپشىلىعىن ازايتۋ جانە سالاداعى باسقارۋ ۇدەرىسىن بارىنشا اشىق ەتۋ.
مينيسترلىكتىڭ مالىمەتىنشە, جۇيەدە ستۋدەنتتەر, تۇلەكتەر, ينجەنەرلەر مەن سالا ماماندارى تۋرالى تولىق مالىمەت جيناقتالادى. ولاردىڭ ءبىلىمى, تاجىريبەسى, ەڭبەك ءوتىلى مەن بىلىكتىلىكتى ارتتىرۋ كۋرستارىنان ءوتۋى جونىندەگى اقپارات تا تىركەلەدى. قازىردىڭ وزىندە دەرەكقوردا ەكى مىڭنان استام پايدالانۋشى بار. بۇل مۇمكىندىك جۇمىس بەرۋشىلەرگە ۇمىتكەردىڭ كاسىبي ءپروفيلىن كورۋگە جول اشسا, ستۋدەنتتەر ءۇشىن تاجىريبە مەن جۇمىسقا ورنالاسۋ مۇمكىندىگىن كەڭەيتەدى.
«2025 جىلعى 1 قىركۇيەكتەن باستاپ جول سالاسى قىزمەتكەرلەرى ءۇشىن بىلىكتىلىكتى مىندەتتى تۇردە ارتتىرۋ تالابى ەنگىزىلەدى. بۇل ۇدەرىس تە «JOLSHY» ارقىلى تىركەلەدى. جاقىن ارادا دەرەكقور «e-License» جانە «Enbek.kz» جۇيەلەرىمەن بىرىكتىرىلمەك. وسىلايشا, «JOLSHY» مەملەكەتتىك ساياساتتىڭ ءتيىمدى قۇرالىنا اينالىپ, كادر تاپشىلىعىن جويۋعا, اشىقتىقتى ارتتىرۋعا جانە اۆتوجول سالاسى ماماندارىنىڭ كاسىبي وسۋىنە جاعداي جاسايدى», دەلىنگەن حابارلامادا.
