ەلىمىزدە اۋىل شارۋاشىلىعى ساناعىنىڭ وفلاين كەزەڭى باستالادى

شارۋالارعا 22 سۇراق قويىلىپ, مال مەن قۇستىڭ بولۋى, جەر رەسۋرستارىن پايدالانۋ, باقشا ەگۋ, تىڭايتقىش قولدانۋ جانە باسقا دا مالىمەتتەر سۇرالادى.

ينتەرۆيۋەرلەر ايرىقشا كوك ءتۇستى فورمادا – جيلەت پەن بەيسبولكادا بولادى, بەيدجدە ونىڭ جەكە باسىن راستاۋعا ارنالعان QR-كود ورنالاسادى. 

ء«بىز ساناقتىڭ ونلاين كەزەڭىن اياقتادىق, ول كەزدە اۋىل شارۋاشىلىعى قۇرىلىمدارى مەن ءۇي شارۋاشىلىقتارىنىڭ ساۋالنامانى sanaq.gov.kz سايتىندا تولتىرۋ مۇمكىندىگى بولدى. ول كەزەڭگە 600 مىڭنان استام رەسپوندەنت قاتىستى. ەندى اۋقىمدى كەزەڭ باستالدى: ينتەرۆيۋەرلەر ۇيلەردى ارالاپ, دەرەكتەردى پلانشەت ارقىلى جينايدى. بارشاڭىزدى شاراعا بەلسەندى قاتىسۋعا جانە وزەكتى اقپارات بەرۋگە شاقىرامىز. سۇراقتار قاراپايىم ءارى تەك اۋىل شارۋاشىلىعى قىزمەتىنە قاتىستى بولادى. بارلىق جاۋاپ ستاتيستيكالىق ماقساتتا پايدالانىلادى جانە ءۇشىنشى تۇلعالارعا بەرىلمەيدى», دەدى ۇلتتىق ستاتيستيكا بيۋروسىنىڭ باسشىسى ماقسات تۇرلىباەۆ.

بيۋرو اقپاراتتىڭ قاۋىپسىزدىگى مەن قۇپيا ساقتالۋىنا كەپىلدىك بەرىپ, جاۋاپ زاڭمەن قورعالاتىنىن, ال دەرەكتەر تەك جالپىلانعان تۇردە قولدانىلاتىنىن مالىمدەدى. ساناققا قاتىستى سۇراقتار تۋىنداعان جاعدايدا بيۋرونىڭ بايلانىس ورتالىعىنا 1446 ءنومىرى ارقىلى حابارلاسۋعا بولادى (جۇمىس ۋاقىتى 9.00–21.00, قوڭىراۋ شالۋ – تەگىن).

ايتا كەتەيىك, 1 تامىزدا باستالعان اۋىل شارۋاشىلىعى ساناعى, 20 قازانعا دەيىن جالعاسادى. جينالعان دەرەكتەر سالاعا قاتىستى مالىمەتتەردى جاڭارتۋعا جانە اۋىل شارۋاشىلىعىن دامىتۋعا ارنالعان شەشىمدەر قابىلداۋعا نەگىز بولادى.