سۋرەت: ernur.kz
جيىندا قاتىسۋشىلار ءىرى ينفراقۇرىلىمدىق جوبالاردى مەملەكەتتىك كەپىلدىكپەن جۇزەگە اسىرۋ ءۇشىن ەۋروپالىق قايتا قۇرۋ جانە دامۋ بانكىنىڭ (ەقدب), حالىقارالىق قايتا قۇرۋ جانە دامۋ بانكىنىڭ (حقدب), ازيا ينفراقۇرىلىمدىق ينۆەستيتسيالار بانكىنىڭ (ايب) جانە يسلام دامۋ بانكىنىڭ (يدب) قاراجاتىن تارتۋ ماسەلەسىن تالقىلادى.
ترانسكاسپي حالىقارالىق كولىك مارشرۋتىنىڭ قۇرامىنا كىرەتىن «بەينەۋ – سەكسەۋىل» اۆتوموبيل جولىنىڭ قۇرىلىسىنا ەرەكشە نازار اۋدارىلدى. مەملەكەت باسشىسىنىڭ تاپسىرماسى بويىنشا جاقىن ارادا «بەينەۋ – سەكسەۋىل» مەن «بوزوي – شالقار» ۋچاسكەلەرىن قوسا العاندا, جالپى ۇزىندىعى 765 شاقىرىم بولاتىن جاڭا اۆتوجول قۇرىلىسىن باستاۋ قاجەت. كولىك مينيسترلىگى تەحنيكالىق-ەكونوميكالىق نەگىزدەمەنى اياقتاۋ مەن قۇرىلىس جۇمىسىن باستاۋ تاياۋ ۋاقىتقا جوسپارلانعانىن حابارلادى. ەقدب مەن حقدب 800 ملرد تەڭگەدەن استام قاراجات ءبولۋ نيەتى تۋرالى مانداتتىق حات جىبەرىپ, جوبانى قولداۋعا دايىن ەكەنىن راستادى.
سونداي-اق «قتج» ۇك» اق-نىڭ ترانسقازاقستاندىق تەمىرجول ءدالىزىن دامىتۋ جونىندەگى Transforming Rail and Connectivity in Kazakhstan (Middle Corridor Development) جوباسىن حقدب جانە ايب-مەن بىرلەسىپ جۇزەگە اسىرۋ ماسەلەسى تالقىلاندى.
يسلام دامۋ بانكىمەن ارنايى ەكونوميكالىق جانە يندۋستريالىق ايماقتاردا ينجەنەرلىك-كوممۋنيكاتسيالىق ينفراقۇرىلىم سالۋ ماسەلەسى بويىنشا ىنتىماقتاستىق بولەك قارالدى. ونەركاسىپ جانە قۇرىلىس مينيسترلىگىنىڭ بولجامى بويىنشا قاجەتتى ينفراقۇرىلىممەن قامتاماسىز ەتۋ 2030 جىلعا قاراي وڭدەۋ ونەركاسىبىنىڭ جالپى قوسىلعان قۇنىنا (جقق) 6,1% ءوسىم بەرەدى.
اتالعان ينفراقۇرىلىمدىق جوبالاردى جۇزەگە اسىرۋ ەلدىڭ حالىقارالىق ترانزيتتىك ءدالىز رەتىندەگى الەۋەتىن ەداۋىر نىعايتا تۇسۋگە مۇمكىندىك بەرىپ, ەكونوميكالىق تارتىمدىلىقتى ارتتىرۋعا, ىسكەرلىك ورتانى دامىتۋعا ەلەۋلى ۇلەس قوسپاق.
