مەملەكەت باسشىسى قاسىم-جومارت توقاەۆ بۇعان دەيىن بىرنەشە رەت ءار وبلىس پەن اۋدان ورتالىعىندا, اۋىلداردا زاماناۋي فۋتبول الاڭدارى سالىنۋى ءتيىس ەكەنىن اتاپ وتكەن. سونداي-اق ول دەمەۋشىلەردىڭ قولداۋىمەن جاڭا فۋتبول ستاديوندارىن تۇرعىزۋدى تاپسىرعان بولاتىن.
وسى تاپسىرمالاردى جۇزەگە اسىرۋ ماقساتىندا بيىل شىلدە ايىندا قاراعاندى وبلىسى اكىمدىگى مەن Freedom Holding Corp. كومپانياسىنىڭ باس ديرەكتورى تيمۋر تۋرلوۆ اراسىندا ىنتىماقتاستىق تۋرالى مەموراندۋمعا قول قويىلدى. سونىڭ ناتيجەسىندە ايماقتا فۋتبول اكادەمياسىنىڭ قۇرىلىسى قولعا الىندى.
اكادەميا 9,6 گەكتار اۋماقتا سالىنادى. عيماراتتار مەن نىسانداردىڭ جالپى اۋماعى 28 مىڭ شارشى مەتردەن اسادى. جوسپار بويىنشا مۇندا: 3500 كورەرمەنگە ارنالعان ستاديون, جىل بويى جۇمىس ىستەيتىن جابىق مانەج, جىلىتۋ جۇيەسى بار تولىق ولشەمدى جاتتىعۋ الاڭى, ۇلدار مەن قىزدارعا ارنالعان ينتەرنات, جاتتىقتىرۋشىلار كابينەتى, وقۋ سىنىپتارى, مەديتسينالىق بولىمدەر, اسحانا, دۋش, ساۋنا جانە باسسەينى بار اكىمشىلىك كەشەن بوي كوتەرەدى.
جوبانى Freedom Holding Corp. قارجىلاندىرادى. قاراعاندىدا فۋتبول اكادەمياسىن سالۋعا 12 ميلليارد تەڭگە بولىنەدى. اكادەميا «شاحتيور» فۋتبول كلۋبىنىڭ بولاشاق ويىنشىلارىن دايىندايتىن نەگىزگى بازاعا اينالادى. سونىمەن قاتار, ينۆەستور ايماقتاعى بۇقارالىق فۋتبولدى دامىتۋعا قوسىمشا 6,5 ميلليارد تەڭگە باعىتتايدى: اۋىلدار مەن قالالاردا شاعىن فۋتبول الاڭدارىن سالۋ, مەكتەپتەر مەن بالاباقشالاردا سپورتتىق باعدارلامالاردى ەنگىزۋ, تۋرنيرلەر مەن فەستيۆالدەر ۇيىمداستىرۋ كوزدەلگەن. ايەلدەر فۋتبولى مەن جاسوسپىرىمدەر فۋتبولىنا دا ەرەكشە نازار اۋدارىلادى.
