فوتو: شىمكەنت قالالىق اكىمدىگى
قازاقستان قۇراماسى 2025 جىلعى World Boxing ۇيىمىنىڭ العاشقى ەرەسەكتەر اراسىنداعى الەم چەمپيوناتىندا كەرەمەت ناتيجە كورسەتىپ, 7 التىن, 1 كۇمىس جانە 2 قولا مەدال جەڭىپ, جالپىكوماندالىق ەسەپتە ءبىرىنشى ورىنعا يە بولدى. سولاردىڭ ىشىندە شىمكەنتتىڭ ماقتانىشى – سابىرحاندار اعايىندىسى دا بار.
سپورتشىلاردى قالا اكىمىنىڭ ورىنباسارى سارسەن قۇرانبەك, دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى ەرمەك دارمەنوۆ, قالالىق بوكس فەدەراتسياسىنىڭ ۆيتسە-پرەزيدەنتى قانات وراقباەۆ جانە جانكۇيەرلەر ىستىق ىقىلاسپەن قارسى الدى.
ماحمۇد سابىرحان 2023 جىلعى تاشكەنتتەگى جەڭىسىن قايتالاپ, الەم چەمپيوناتىنىڭ ەكى دۇركىن جەڭىمپازى اتاندى. ال ونىڭ 19 جاسار باۋىرى تورەحان سابىرحان العاش رەت الەم چەمپيونى اتانىپ, قازاق بوكس تاريحىندا ەڭ جاس جەڭىمپاز رەتىندە ەسىمىن جازدىردى. بۇل جەتىستىكتىڭ ارتىندا باپكەرى ءىلياس ورالبەكوۆتىڭ ەڭبەگى زور.
ايتا كەتەيىك, الەم چەمپيوناتىنا 68 ەلدەن 540 سپورتشى قاتىسقان. قازاقستان قۇراماسى ەرلەر مەن ايەلدەر اراسىندا ءوز تاريحىنداعى ۇزدىك ءۇشىنشى ناتيجەنى كورسەتتى.
الداعى ۋاقىتتا بوكسشىلارىمىزدى الەم كۋبوگىنىڭ فينالدىق كەزەڭى, ازيا چەمپيوناتى جانە 2026 جىلى ناگويادا وتەتىن جازعى ازيا ويىندارى كۇتىپ تۇر. سونىمەن قاتار, قازاقستان 2027 جىلى كەلەسى الەم چەمپيوناتىن قابىلداۋعا دايىندىق جۇرگىزىپ جاتىر.
