جيىندا ەۋروپالىق قايتا قۇرۋ جانە دامۋ بانكى, حالىقارالىق قايتا قۇرۋ جانە دامۋ بانكى, ازيا ينفراقۇرىلىمدىق ينۆەستيتسيالار بانكى جانە يسلام دامۋ بانكى ارقىلى ءىرى ينفراقۇرىلىمدىق جوبالاردى مەملەكەتتىك كەپىلدىكپەن قارجىلاندىرۋ تەتىكتەرى قارالدى.
كولىك ينفراقۇرىلىمىنا قاتىستى ەرەكشە نازار «بەينەۋ – سەكسەۋىل» اۆتوجولىنىڭ قۇرىلىسىنا اۋدارىلدى. مەملەكەت باسشىسىنىڭ تاپسىرماسىنا سايكەس, «بەينەۋ – سەكسەۋىل» جانە «بوزوي – شالقار» ۋچاسكەلەرىن قامتيتىن, جالپى ۇزىندىعى 765 شاقىرىم بولاتىن جاڭا اۆتوجولدىڭ تەحنيكالىق-ەكونوميكالىق نەگىزدەمەسى اياقتالۋدا. كولىك مينيسترلىگىنىڭ مالىمەتىنشە, قۇرىلىس جۇمىستارى تاياۋ ۋاقىتتا باستالادى. ال ەقدب مەن حقدب 800 ملرد تەڭگەدەن استام قاراجات بولۋگە دايىن ەكەنىن مانداتتىق حاتپەن راستادى.
سونداي-اق «قتج» ۇك» اق-نىڭ ترانسقازاقستاندىق تەمىرجول ءدالىزىن دامىتۋعا باعىتتالعان Middle Corridor Development جوباسىن حقدب جانە ايب-مەن بىرلەسىپ جۇزەگە اسىرۋ ماسەلەسى ءسوز بولدى.
يسلام دامۋ بانكىمەن ارنايى ەكونوميكالىق جانە يندۋستريالىق ايماقتاردى ينجەنەرلىك-كوممۋنيكاتسيالىق ينفراقۇرىلىممەن قامتۋعا بايلانىستى ىنتىماقتاستىق بولەك قارالدى. ونەركاسىپ جانە قۇرىلىس مينيسترلىگىنىڭ بولجامىنشا, بۇل قادام 2030 جىلعا قاراي وڭدەۋ ونەركاسىبىنىڭ جالپى قوسىلعان قۇنىنا 6,1 پايىز ءوسىم بەرەدى.
اتالعان جوبالاردى جۇزەگە اسىرۋ قازاقستاننىڭ حالىقارالىق ترانزيتتىك ءدالىز رەتىندەگى الەۋەتىن ارتتىرىپ قانا قويماي, ەل ەكونوميكاسىنىڭ تارتىمدىلىعىن كۇشەيتۋگە جانە ىسكەرلىك ورتانى دامىتۋعا ەلەۋلى ۇلەس قوسپاق.
