فوتو: gov.kz
كوپسالالى قالالىق №2 بالالار اۋرۋحاناسىندا تورينولارينگولوگيا, نەيروحيرۋرگيا جانە ورتوپەديا سالاسىنداعى كۇردەلى ءارى جوعارى تەحنولوگيالىق وپەراتسيالاردىڭ تولىق سپەكترى جاسالادى. جوعارى تەحنولوگيالىق وتا جاساۋعا كوپسالالى دارىگەرلەر توبى قاتىسىپ, زاماناۋي جابدىقتار مەن يمپلانتتار, يننوۆاتسيالىق ەمدەۋ تاسىلدەرى قولدانىلۋ قاجەت. مۇنداي وپەراتسيالاردى جاساۋعا ميلليونداعان قاراجات كەرەك بولعانمەن بالالار ءۇشىن كۇردەلى وتالار تەگىن جاسالادى.
ماسەلەن اۋرۋحانادا بالالارعا ەستۋ قابىلەتىن قايتاراتىن كوحلەارلىق يمپلانتاتسيا جاسالادى.
2024 جىلى ستاتسيونار جاعدايىندا 827 ملن تەڭگەگە 108 وپەراتسيا جاسالعان. سوڭعى 7 ايدا 536 ملن تەڭگەدەن اساتىن 68 وپەراتسيا وتكەن.
نەيروحيرۋرگيا سالاسىندا دا كۇردەلى وتالار جاسالىپ جاتىر. باس سۇيەك جاراقاتتارى, ىسىك نەمەسە تۋا بىتكەن پاتولوگيا كەزىندە ارنايى پلاستينالار قولدانىلادى. بۇل وتا دارىگەردەن زەرگەرلىك دالدىكتى, ەرەكشە تاجىريبەنى جانە قىمبات جابدىقتى تالاپ ەتەدى. مۇنداي مەديتسينالىق كومەكبالالاردىڭ ءومىرىن ساقتاپ, اۋىر مۇگەدەكتىكتىڭ الدىن الادى. سونداي-اق, ماماندار نەيروناۆيگاتسيا مەن نەيرومونيتورينگ ارقىلى مي ىسىكتەرىنە وتا جاسايدى.
2024 جىلى 68 ملن تەڭگەگە 39 وتا جاسالعان. بيىلعى جەتى ايدا 38 ملن تەڭگەگە 21 وتا وتكەن.
2024 جىلدىڭ سوڭىندا اۋرۋحانادا جاڭا قىزمەت ءتۇرى – جامباس-سان بۋىنىن ەندوپروتەزدەۋ ەنگىزىلدى. دارىگەرلەر العاشقى وتالاردى 4,6 ملن تەڭگەگە جاساعان.
«بۇگىنگى كۇنگە دەيىن ءبىز جامباس-سان بۋىنىن اۋىستىرۋ بويىنشا 7 وپەراتسيا جاسادىق. بۇل پروتەزدەردى ارنايى قور ساتىپ اپەردى. ال ەمدەۋدىڭ ءوزى الەۋمەتتىك مەديتسينالىق ساقتاندىرۋ قورى ەسەبىنەن جۇرگىزىلدى. بالالار ورتوپەدياسىندا بىرنەشە باعىت بار, ەڭ قىمباتى – ونكوپروتەزدەۋ, ول دەنساۋلىق ساقتاۋ مينيسترلىگى تاراپىنان قامتاماسىز ەتىلەدى. بۇدان بولەك, ءبىز ميكروحيرۋرگيالىق وتالار جاسايمىز, ونىڭ قۇنى شامامەن 800 مىڭ تەڭگە. جىل سوڭىنا دەيىن تاعى ءۇش جامباس-سان بۋىنىن اۋىستىرۋ وپەراتسياسىن جاساۋ جوسپارلانۋدا», دەدى ورتوپەديا ءبولىمىنىڭ مەڭگەرۋشىسى اعابەك شىقىناەۆ.
