فوتو: ۇكىمەتتىڭ ءباسپاسوز قىزمەتى
«كوپ نارسە جول ەرەجەسىن ءجيى بۇزاتىن كولىك جۇرگىزۋشىلەرى مەن جاياۋ جۇرگىنشىلەرگە, سونداي-اق جول ينفراقۇرىلىمىنىڭ جاعدايىنا بايلانىستى. ايتا كەتەتىن ءجايت, جازاتايىم جاعدايلاردىڭ باسىم بولىگىنىڭ الدىن الۋعا بولاتىن ەدى. مىسالى, ادامدار نەگىزىنەن جاياۋ جۇرگىنشىلەر ينفراقۇرىلىمىنىڭ, جارىق پەن تروتۋارلاردىڭ جوقتىعىنان اجال قۇشادى», دەدى ۇكىمەت باسشىسى.
پرەمەر-مينيستر ناقتى مىسالداردى كەلتىردى. الماتىداعى جەتىسۋ اۋدانىندا جانسۇگىروۆ پەن بۇرىنداي كوشەلەرىنىڭ قيىلىسى ءجيى اپات ورىن الاتىندىقتان, تۇرعىندار اراسىندا «قاۋىپتى وتكەل» اتالىپ كەتكەن. ال استانانىڭ ۇركەر تۇرعىن الابىندا جاياۋ جۇرگىنشىلەر وتكەلدەرى مەن باعدارشامدار مۇلدە جوق, سوندىقتان اتا-انالار بالالارىن مەكتەپكە وزدەرى جەتكىزۋگە ءماجبۇر.
وسىعان بايلانىستى ولجاس بەكتەنوۆ اكىمدىكتەرگە تۇرعىندار كوتەرگەن شاعىمدارعا دەر كەزىندە نازار اۋدارىپ, قاۋىپتى ۋچاسكەلەردە ءتيىستى ينفراقۇرىلىمدى جەدەل قامتاماسىز ەتۋدى تاپسىردى.
