فوتو: ەرلان ومار
«پرەزيدەنتىمىز جولداۋدا قۇرىلىس سالاسىن قاتاڭ باقىلاۋعا الۋ ءۇشىن ارنايى كودەكس قابىلداۋدى تاپسىرعان ەدى. بۇعان دەيىن الماتىدا جانە ونىڭ تاۋلى ايماقتارىندا نۇكتەلىك قۇرىلىسقا تىيىم سالىنعان بولاتىن. بىراق, وكىنىشكە قاراي, بۇل شەشىمدەر ءالى كۇنگە دەيىن ورىندالماي كەلەدى», دەدى دەپۋتات.
ول الماتى تۇرعىندارىنان ەڭ كوپ شاعىم تۇسەتىن RAMS قۇرىلىس كومپانياسىنىڭ قىزمەتىنە جەكە توقتالدى. اتالعان كومپانيا ەلدەگى ەڭ ءىرى سەگىزىنشى قۇرىلىس كومپانياسى سانالعانىمەن, ونىڭ تۇرعىن ءۇي كەشەندەرى حالىقتىڭ قاتاڭ سىنىنا ۇشىراپ وتىر.
«مەنىڭ تەلەفونىم تۇرعىنداردىڭ RAMS كومپانياسىنا قاتىستى شاعىمدارىنان تىنىم تاپپايدى. بۇل كومپانيا بۇرىنعى جوبالارىن دۇرىس اياقتاماي جاتىپ, جاڭا الىپ نىساندارعا كىرىسەدى. ولاردىڭ ۋادەلەرى ورىندالمايدى, ال سالىنعان ۇيلەردە جارىق پەن سۋ ۇنەمى ءۇزىلىپ قالادى, جەرتولەلەرىن كوگەرىپ, شاتىرلارى اعىپ تۇر, پاركينگ جەتىسپەگەندىكتەن كوشەلەردە كولىك كەپتەلىسى كۇشەيگەن. ءتىپتى ۋادە ەتىلگەن مەكتەپ قالا بالانسىنا بەرىلمەي, جەكەمەنشىككە اينالىپ, قاراپايىم تۇرعىندار ءۇشىن قولجەتىمسىز بولىپ وتىر», دەدى دەپۋتات پونومارەۆ.
ونىڭ ايتۋىنشا, RAMS كومپانياسىنىڭ «ساكۋرا», «Nef uptown» سەكىلدى باسقا دا تۇرعىن ءۇي كەشەندەرى دە ءدال وسىنداي ماسەلەلەرگە تولى. سوعان قاراماستان, كومپانيا قازىر «Beyond» دەپ اتالاتىن 40 قاباتتى ءزاۋلىم مۇنارا سالۋعا كىرىسكەن. بۇل جوبا قوعامدا ۇلكەن نارازىلىق تۋعىزعان.
«دەپۋتاتتاردىڭ ارالاسۋىمەن اتالعان قۇرىلىس ۋاقىتشا توقتاتىلىپ, زاڭدىلىعى تەكسەرىلىپ جاتىر. ءبىز الماتىنىڭ ارحيتەكتۋرالىق بەينەسىن قورعاپ قالۋىمىز كەرەك», دەدى پونومارەۆ.
سەرگەي پونومارەۆ سونداي-اق پرەزيدەنت ۇسىنعان جاڭا باعىت الاتاۋ-سيتي جوباسىنا نازار اۋداردى.
«الاتاۋ – بولاشاقتىڭ قالاسى. بۇل يننوۆاتسيا مەن تەحنولوگيا توعىسقان ورتالىق الماتىنى ايتارلىقتاي جەڭىلدەتۋى ءتيىس», دەدى ول.
ءسوزىن قورىتىندىلاي كەلە دەپۋتاتتىڭ سوڭعى بەس جىلدا RAMS كومپانياسى سالعان نىسانداردىڭ بارلىق رۇقسات قۇجاتتارى مەن ساپاسىن تەكسەرۋدى ۇسىندى.
سونىمەن قاتار جوبالىق-سمەتالىق قۇجاتتاماسىز, ەكسپەرتيزاسىز باستالعان 40 قاباتتى «Beyond» مۇناراسىن سالۋعا تىيىم سالىپ, ونىڭ ورنىنا ساياباق نەمەسە الەۋمەتتىك نىسان تۇرعىزۋ مۇمكىندىگىن قاراستىرۋدى اتاپ ءوتتى.
