فوتو: اشىق دەرەككوز
ونىڭ ايتۋىنشا, بۇگىندە ەلدە جاڭا مودەلگە ءوتۋدىڭ دايىندىعى باستالىپ كەتكەن. جاڭا جۇيەگە سايكەس 6 جاسار بالالارعا ارنالعان ءبىر جىلدىق دايارلىق كەزەڭى مەكتەپ باعدارلاماسىنا ەنگىزىلەدى. مۇنداي قادام ۇلتتىق ءبىلىم بەرۋ جۇيەسىن حالىقارالىق ستاندارتتارعا جاقىنداتۋعا, تۇلەكتەردىڭ دايىندىق ساپاسىن ارتتىرۋعا جانە ولاردىڭ شەتەلدىك جوعارى وقۋ ورىندارىنا تىكەلەي تۇسۋىنە مۇمكىندىك بەرۋگە باعىتتالعان.
«قازىرگى تاڭدا ءبىزدىڭ تۇلەكتەر شەتەلدىك ۋنيۆەرسيتەتتەرگە قابىلدانۋ ءۇشىن مىندەتتى تۇردە foundation دەپ اتالاتىن ءبىر جىلدىق دايىندىق كۋرستارىنان وتەدى. بۇل ولاردىڭ ۋاقىتىن جوعالتۋىنا اكەلەدى. ەگەر ءبىز 12 جىلدىق جۇيەنى زاڭنامالىق دەڭگەيدە ەنگىزسەك, تۇلەكتەرىمىزگە بىرقاتار ەلدە foundation قاجەت بولمايدى جانە ولار بىردەن باكالاۆرياتقا تۇسە الادى», دەدى ۆيتسە-مينيستر.
Gazeta.uz دەرەكتەرىنە قاراعاندا, وسىعان قاتىستى پرەزيدەنتتىڭ ءتيىستى جارلىعى ازىرلەنىپ قويعان. قۇجاتقا قوسىمشا تۇسىندىرمە جازبادا قازىرگى 11 جىلدىق وقۋ مەرزىمىنىڭ حالىقارالىق تالاپتارعا سايكەس كەلمەيتىنى, سونداي-اق مەكتەپ بىتىرۋشىلەردى جۇيەلى دايارلاۋ تەتىكتەرىنىڭ جەتكىلىكسىزدىگى ايتىلعان. سونىڭ سالدارىنان جىل سايىن شامامەن 15 مىڭ وزبەكستاندىق تۇلەك شەتەلدە قوسىمشا ءبىر جىلدىق foundation وقۋىن وتۋگە ءماجبۇر.
جاڭا رەفورماعا سايكەس وزبەكستانداعى ءبىلىم بەرۋ قۇرىلىمى مىناداي بولماق:
- ءبىر جىلدىق دايىندىق كەزەڭى;
- ءتورت جىلدىق باستاۋىش مەكتەپ;
- بەس جىلدىق نەگىزگى ورتا ءبىلىم (5–9 سىنىپتار);
- ەكى جىلدىق جالپى ورتا ءبىلىم, ونى مەكتەپتەردە, ليتسەيلەردە, اسكەري ۋچيليششەلەردە نەمەسە تەحنيكۋمداردا جالعاستىرۋعا بولادى.
ايتا كەتەيىك, وزبەكستاندا 2010 جىلدان 2017 جىلعا دەيىن 12 جىلدىق ءبىلىم بەرۋ جۇيەسى بولعان. ول كەزدە وقىتۋ «9+3» سىزباسى بويىنشا جۇرگىزىلگەن. ياعني, 9-سىنىپتى اياقتاعاننان كەيىن وقۋشىلار كاسىبي كوللەدجدەردە نەمەسە اكادەميالىق ليتسەيلەردە مىندەتتى تۇردە وقۋىن جالعاستىرعان. الايدا 2018 جىلى ۇكىمەت بۇل تاجىريبەنى ءتيىمسىز دەپ تاۋىپ, قايتادان 11 جىلدىق وقۋ جۇيەسىنە ورالعان ەدى.
