باستاپقى جوسپار بويىنشا, 2025 جىلى ارالداعى سۋ كولەمىن 20,6 ميلليارد تەكشە مەترگە جەتكىزۋ كوزدەلگەن بولاتىن. جالپى العاندا, سولتۇستىك ارالدىڭ سۋ كولەمىن 2030 جىلعا دەيىن 27 ميلليارد تەكشە مەترگە دەيىن ۇلعايتۋ جوسپارلانعان ەدى.
«سۋ رەسۋرستارىن باسقارۋ جۇيەسىن دامىتۋ تۇجىرىمداماسىندا كوزدەلگەن سولتۇستىك ارالدىڭ سۋ كولەمىن ارتتىرۋ كورسەتكىشتەرىنە جوسپاردان ەرتە قول جەتكىزىلىپ جاتىر. قازىرگى ناتيجەلەرگە 2029 جىلى جەتۋ كوزدەلگەن بولاتىن», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
ونىڭ ايتۋىنشا, دۇنيەجۇزىلىك بانك گرانتى اياسىندا سولتۇستىك ارالدى ساقتاۋ جوباسىنىڭ تەحنيكالىق-ەكونوميكالىق نەگىزدەمەسى دە ازىرلەنىپ جاتىر. اتاپ ايتقاندا, كوكارال بوگەتىنىڭ بيىكتىگىن 2 مەترگە كوتەرۋ جانە اقشاتاۋ مەن قامىستىباس كول جۇيەلەرىندەگى سۋدىڭ دەڭگەيىن تۇراقتاندىرۋ ءۇشىن گيدروتوراپ سالۋ مۇمكىندىگى قاراستىرىلىپ جاتىر.
«جوبا سولتۇستىك ارالداعى سۋدىڭ كولەمى مەن ساپاسىن ارتتىرۋعا, سىرداريا وزەنىنىڭ اتىراۋىن قالپىنا كەلتىرۋگە, تەڭىز تۇبىنەن تۇزدىڭ شىعۋىن ازايتۋعا, قىزىلوردا وبلىسىنداعى بالىق شارۋاشىلىعىن دامىتۋعا جانە جەرگىلىكتى تۇرعىنداردىڭ ءومىر ءسۇرۋ جاعدايىن جاقسارتۋعا باعىتتالعان», دەدى مينيستر نۇرجان نۇرجىگىتوۆ.
