بۇگىندە ەڭبەك جانە حالىقتى الەۋمەتتىك قورعاۋ مينيسترلىگىنىڭ قۇزىرىنداعى 49 مەملەكەتتىك قىزمەتتىڭ 45-ءى ەلەكتروندىق تۇردە قولجەتىمدى. 28 قىزمەت بويىنشا پرواكتيۆتى فورمات ەنگىزىلگەن. جىل باسىنان تامىز ايىنا دەيىن كورسەتىلگەن 4,2 ملن قىزمەتتىڭ 2,8 ميلليونى ەلەكتروندىق فورماتتا بولسا, 1,2 ميلليونى پرواكتيۆتى تۇردە بەرىلگەن. وسى جىلدىڭ ءبىرىنشى جارتىجىلدىعىندا 2 جاڭا قىزمەت اۆتوماتتاندىرىلدى. ءبىرىنشىسى – ەرەسەك, ارەكەتى شەكتەۋلى ازاماتتارعا قاداعالاۋ نەمەسە قامقورشىلىق ورناتۋعا قاتىستى. ەكىنشىسى – وسى ازاماتتاردىڭ مۇلكىن جانە تولەمدەرىن باسقارۋعا رۇقسات بەرۋ. سونداي-اق قازىر «eGov mobile» قوسىمشاسىندا «قامقورشىلىق ورناتۋ تۋرالى مالىمەت» جاڭا تسيفرلىق قۇجاتى پايدا بولدى. جالپى, بۇل قوسىمشا ارقىلى الەۋمەتتىك-ەڭبەك سالاcىنداعى 35 قىزمەت پەن 8 تسيفرلىق قۇجات قولجەتىمدى. بۇدان بولەك, انىقتامالىق اقپارات بەرۋ قىزمەتتەرىنىڭ باسىم بولىگى مەملەكەتتىك قىزمەتتەر تىزىلىمىنەن شىعارىلىپ, پايدالانۋشى سۇرانىسىنا قاراي «eGov, «eGov-mobile», ەكىنشى دەڭگەيلى بانكتەردىڭ قوسىمشالارى سىندى ءتۇرلى پلاتفورمالار ارقىلى دەر كەزىندە ۇسىنىلىپ جاتىر. ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس انافين الەۋمەتتىك-ەڭبەك سالاسىنداعى مەملەكەتتىك قىزمەتتەردى ترانسفورماتسيالاۋ, تسيفرلاندىرۋ جۇمىسى تۋرالى جان-جاقتى ايتىپ بەردى.
«ەڭبەككە ورنالاستىرۋ ۇدەرىسىن اشىق ءارى ىڭعايلى ەتۋ ماقساتىندا ەڭبەك ميگرانتتارى مەن كامەلەتكە تولماعان ازاماتتارمەن ەلەكتروندىق ەڭبەك شارتتارىن, ەلەكتروندىق ۇجىمدىق شارتتاردى جاساقتاۋ مۇمكىندىكتەرى ەنگىزىلدى. «HR Enbek» پورتالىندا قىزمەتكەردىڭ جەكە كابينەتىندە ەڭبەككە جارامسىزدىق پاراقشالارى, كاسىپوداقتارعا ارنالعان اۆتوماتتاندىرىلعان جۇمىس ورنى فۋنكتسيونالدى, شتاتتىق كەستەلەردى ەلەكتروندىق تۇردە جۇرگىزۋ, سونداي-اق توتەنشە جاعداي تۋرالى حابارلاۋ مۇمكىندىكتەرى قوسىلدى», دەگەن و.انافين جاساندى ينتەللەكت نەگىزىندە ەنگىزىلگەن, ەنگىزۋ جوسپارلانعان قۇرالدار جايىندا باياندادى.
مەملەكەت باسشىسى, ۇكىمەت جاساندى ينتەللەكتىنىڭ كەلەشەگىنە ەرەكشە نازار اۋدارىپ وتىر. ءبىرىنشى جارتىجىلدىقتا ەڭبەك جانە حالىقتى الەۋمەتتىك قورعاۋ مينيسترلىگى ەكى جاساندى ينتەللەكت مودەلىن ەنگىزسە, جىل سوڭىنا دەيىن وسىنداي تاعى بىرنەشە جۇيە ىسكە قوسىلادى دەگەن بولجام بار.
– ءبىرىنشى كەزەكتە جي ۇلگىسى ينتەللەكتۋالدى چات-بوتتا قولدانىلادى. چات-بوت «Enbek» تسيفرلىق ەكوجۇيەسىندە وپەراتورلار جۇكتەمەسىن ازايتۋ, قىزمەت ساپاسىن ارتتىرۋ ماقساتىندا ەنگىزىلدى. جي ارقاسىندا پايدالانۋشىلار ونلاين رەجىمدە تاۋلىك بويى ءجيى قويىلاتىن سۇراقتارعا جاۋاپ, كەڭەس الا الادى. ەگەر بوت سايكەس جاۋاپ تابا الماسا, ءوتىنىش وپەراتورعا جىبەرىلەدى. قازىر شامامەن 96 % وتىنىشتەر اۆتوماتتى تۇردە, ياعني قىزمەتكەردىڭ كومەگىنسىز وڭدەلگەن. كۇن سايىن چات-بوت ارقىلى 600-گە جۋىق ءوتىنىش وڭدەلەدى,– دەدى ۆيتسە-مينيستر جي مۇمكىندىگى مول ەكەنىن العا تارتىپ.
جىل باسىنان تامىز ايىنا دەيىن جي كومەگىمەن 18,7 مىڭنان استام ءوتىنىش قارالعان. «Enbek.kz» قوسىمشاسىندا جي تەحنولوگياسى بوس جۇمىس ورىندارىن ىرىكتەيدى. رەزيۋمەنى وڭدەۋگە ورتا ەسەپپەن 2 سەكۋندتان از ۋاقىت كەتەدى. ارتىنشا سەرۆيس ۇسىنىستار بەرە باستايدى. بۇل بوس جۇمىس ورىنداردى تاڭداۋ ۋاقىتىن 80 %-عا قىسقارتۋعا مۇمكىندىك بەردى. ەندى مينيسترلىك جي مۇمكىندىكتەرىن مۇگەدەكتىك دارەجەسىن انىقتاۋدا تيىمدىلىكتى ارتتىرۋ ءۇشىن ەنگىزۋدى كوزدەپ وتىر. مۇندا جي مەديتسينالىق قورىتىندىلاردى, ساۋالنامالاردى, اۋرۋ تاريحتارىن جانە باسقا مالىمەتتەردى پايدالانا وتىرىپ, مۇگەدەكتىك دارەجەسى مەن ساناتىن اۆتوماتتى تۇردە انىقتايدى.
جاساندى ينتەللەكتىنى پايدالانۋ ارقىلى قىزمەتكەردىڭ جۇكتەمەسى ازايادى, مەكەمەلەردىڭ الەۋەتى ارتادى, كوپ ۋاقىت الاتىن جۇمىسقا بۇرىنعىداي ادام ءجيى ارالاسپايدى. ناتيجەسىندە, راسىمدەردىڭ وبەكتيۆتىلىگى مەن اشىقتىعى قامتاماسىز ەتىلەدى. بۇل حالىقتىڭ الەۋمەتتىك قورعاۋ جۇيەسىنە سەنىمىن نىعايتادى. كەلەشەكتە جي اتاۋلى الەۋمەتتىك كومەك تاعايىنداۋ كەزىندە ازاماتتاردىڭ جالپى اكتيۆتەرىن باعالاۋ ۇدەرىسىن اۆتوماتتاندىرۋعا قولدانىلاتىن بولادى. ەڭبەك جانە حالىقتى الەۋمەتتىك قورعاۋ مينيسترلىگى وسى جۇمىستارمەن شەكتەلمەي, بىرىڭعاي تسيفرلىق پلاتفورما, دەرەكتەردى تالداۋدىڭ ينتەللەكتۋالدى مودەلدەرى سياقتى جي-ءدى قاجەت ەتەتىن تسيفرلىق قۇرالداردى ودان ءارى دامىتۋدى جوسپارلاپ وتىر. ويتكەنى بۇل قادام جۇمىس ۇدەرىستەرىن اۆتوماتتاندىرىپ, قىزمەت كورسەتۋدىڭ اشىقتىعى مەن جىلدامدىعىنا اسەر ەتۋمەن شەكتەلمەيدى. قىزمەتكەرلەردىڭ جۇكتەمەسىن ازايتىپ, قارجى ۇنەمدەۋگە, الەۋمەتتىك-ەڭبەك سالاسىنىڭ تۇراقتى دامۋىن قامتاماسىز ەتۋگە مۇمكىندىك بەرەدى.
