بيىل ماگيستراتۋراعا كەشەندى تەستىلەۋگە 51 مىڭنان استام ءوتىنىش تۇسكەن. بۇل وتكەن جىلمەن سالىستىرعاندا 9,5 مىڭعا كوپ. تەستىلەۋگە 47 798 تالاپكەر قاتىسىپ, ولاردىڭ جارتىسىنا جۋىعى – 23 065 ادام شەكتى بالدى جيناپ, ءبىلىم الۋعا دايىن ەكەندىكتەرىن دالەلدەدى.
ورتاشا كورسەتكىشتەر دە ارتقان – كت-نىڭ ورتاشا بالى 72,9-دى قۇرادى. بۇل قازاقستاندىق جاستاردىڭ دايىندىق دەڭگەيى مەن وقۋعا دەگەن ىنتاسىنىڭ جوعارىلاعانىن كورسەتەدى.
مەملەكەتتىك گرانتتار مىناداي كولەمدە ءبولىندى:
-
ماگيستراتۋراعا – 13 554 گرانت, ونىڭ ىشىندە ينجەنەرلىك-تەحنيكالىق ماماندىقتارعا – 3 338, پەداگوگيكالىق عىلىمدارعا – 3 225, اقپاراتتىق-كوممۋنيكاتسيالىق تەحنولوگيالارعا – 1 315, جاراتىلىستانۋ عىلىمدارىنا – 1 268 گرانت ءبولىندى;
-
دوكتورانتۋراعا – 2 919 گرانت, ونىڭ ىشىندە پەداگوگيكالىق عىلىمدارعا – 486, ينجەنەرلىك جانە قۇرىلىس ماماندىقتارىنا – 615, اقپاراتتىق-كوممۋنيكاتسيالىق تەحنولوگيالارعا – 161 گرانت ءبولىندى.
بيىل دوكتورانتۋراعا سۇرانىس تا ايتارلىقتاي ارتقان. قابىلداۋ سىناعىنا 4 307 ادام قاتىسىپ, ولاردىڭ 3 146-سى عىلىم جولىن جالعاستىرۋ مۇمكىندىگىنە يە بولدى.
ايتا كەتەيىك, قازىر دوكتورانتۋراعا قابىلداۋ ەمتيحاندارىن وتكىزۋ تولىعىمەن جوعارى وقۋ ورىندارىنىڭ قۇزىرەتىنە بەرىلگەن. بۇل ۋنيۆەرسيتەتتەردىڭ اكادەميالىق ەركىندىگى مەن دەربەستىگىن نىعايتاتىن ماڭىزدى قادام سانالادى.
