فوتو: اشىق دەرەككوز
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, جىل باسىنان بەرى مۇگەدەكتىگى بار ازاماتتار الەۋمەتتىك قىزمەتتەر پورتالى ارقىلى 427,1 مىڭنان استام ءوتىنىش بەرىپ, قاجەتتى قۇرالدار مەن قىزمەتتەرىن العان. ونىڭ ىشىندە شامامەن 319 مىڭ ادام وڭالتۋدىڭ تەحنيكالىق قۇرالدارىمەن قامتاماسىز ەتىلسە, 8,3 مىڭ ادامعا ىمداۋ ءتىلى ماماندارىنىڭ كومەگى كورسەتىلدى. بۇدان بولەك, 25,5 مىڭ ادام جەكە كومەكشى قىزمەتىن پايدالاندى, ال 74,3 مىڭ ادام ساناتوريلىك-كۋرورتتىق ەم قابىلدادى.
«پورتال مۇگەدەكتىگى بار ادامدارعا وڭالتۋدىڭ تەحنيكالىق قۇرالدارى مەن قىزمەتتەرىن ءوندىرۋشىنى جانە جەتكىزۋشىنى ءوز بەتىنشە تاڭداۋعا مۇمكىندىك بەرەدى. كومەك تۇرىنە تاپسىرىس بەرۋ كورسەتىلەتىن قىزمەتتى الۋشىنىڭ ەلەكتروندىق تسيفرلىق قولتاڭباسىمەن راستاۋ ارقىلى جۇزەگە اسىرىلادى. تاپسىرىس بەرىلگەن وڭالتۋدىڭ تەحنيكالىق قۇرالدارىن جەتكىزۋ نەمەسە ءوز بەتىنشە اكەتۋ ارقىلى الۋعا بولادى. مۇگەدەكتىگى بار ادامداردى وڭالتۋ قۇرالدارىمەن قامتاماسىز ەتۋ پروتەزدىك-ورتوپەديالىق, سۋردوتەحنيكالىق, تيفلوتەحنيكالىق جانە گيگيەنالىق قۇرالدار, سونداي-اق كرەسلو-اربالار بەرۋدى قامتيدى», دەلىنگەن حابارلامادا.
قازىرگى ۋاقىتتا پورتالدا 629 ارناۋلى الەۋمەتتىك قىزمەت كورسەتۋشى, 1036 تەحنيكالىق قۇرال جەتكىزۋشى, 32 مىڭنان استام جەكە كومەكشى, 749 ىمداۋ ءتىلى مامانى جانە 133 ساناتوريلىك-كۋرورتتىق ۇيىم تىركەلگەن.
پورتالدى قولدانۋ بويىنشا سۇراقتار تۋىنداعان جاعدايدا ازاماتتار 1414 بىرىڭعاي بايلانىس ورتالىعىنا حابارلاسا الادى.
