وسى تۇرعىدان العاندا جولداۋدا كوتەرىلگەن باستامالار ءبىلىم مەن عىلىم سالاسىنا, اسىرەسە, جوعارى وقۋ ورىندارىنا ۇلكەن جاۋاپكەرشىلىك جۇكتەيدى. مەملەكەت باسشىسى جولداۋدا «قازاقستان ءۇش جىلدىڭ ىشىندە تسيفرلىق ەلگە اينالۋى كەرەك» دەپ ناقتى ماقسات قويدى. بۇل باعىتتاعى العاشقى جانە ناقتى قادامداردىڭ ءبىرى – جاساندى ينتەللەكت مينيسترلىگىن قۇرۋ. مۇنداي قۇرىلىم ۋنيۆەرسيتەتتەرگە ۇلتتىق تسيفرلىق جوبالارعا تىكەلەي قاتىسۋعا جول اشادى.
بۇل رەتتە اباي وبلىسىنداعى شاكارىم ۋنيۆەرسيتەتى قازىر «AI-Sana» ۇلتتىق جوباسى اياسىندا بىرنەشە جي اگەنتتەرىن وقۋ پروتسەسىنە ەنگىزىپ ۇلگەردى. ونىڭ ىشىندە «AI-Check» دەپ اتالاتىن وزدىك جۇيەمىز عىلىم جانە جوعارى ءبىلىم مينيسترلىگىنىڭ «AI-Sana» باعدارلاماسىنىڭ ۇزدىك 6 جوباسىنىڭ قاتارىنا ەندى. جۇيە ستۋدەنتتىك جۇمىستاردى قازاق, ورىس, اعىلشىن تىلدەرىندە ساپا, قۇرىلىم جانە تۇپنۇسقالىق كريتەريلەرى بويىنشا اۆتوماتتى تۇردە تالدايدى. ۋنيۆەرسيتەت ءوڭىردىڭ تسيفرلىق حابىنا اينالۋدى, ياعني مەكتەپتەر مەن كوللەدجدەرگە ءوزىمىزدىڭ تاجىريبەمىزدى تاراتۋدى جانە جاڭا بۋىن EdTech پەداگوگوتارىن دايارلاۋدى كوزدەيدى. جالپى, جوعارى وقۋ ورىندارى ەلدىڭ تسيفرلىق بولاشاعىنىڭ زەرتحاناسى بولۋى ءتيىس. وسى تۇرعىدان العاندا, جولداۋدا ايتىلعان جاڭا مينيسترلىكتىڭ قۇرىلۋى ۋنيۆەرسيتەتتەردىڭ ۇلتتىق جوبالارعا تىكەلەي قاتىسۋىنا مۇمكىندىك بەرەدى.
پرەزيدەنت جولداۋىندا اتاپ وتىلگەن ماڭىزدى ماسەلەلەردىڭ ءبىرى – ينۆەستيتسيا تارتۋ, ونى ۇلتتىق قاۋىپسىزدىك پەن ەلدىڭ باسەكەگە قابىلەتتىلىگىنىڭ باستى فاكتورى رەتىندە قاراستىردى. بۇل رەتتە شاكارىم ۋنيۆەرسيتەتى وسى باعىتتا ناقتى ناتيجەلەرگە قول جەتكىزۋدە.
ەستەرىڭىزدە بولسا, 2025 جىلدىڭ ماۋسىم ايىندا ۋنيۆەرسيتەت قىتايدىڭ سيان تسزياوتۋن ۋنيۆەرسيتەتىمەن ينۆەستيتسيالىق كەلىسىمگە قول قويعان بولاتىن. كەلىسىم بويىنشا اباي وبلىسىنداعى وڭىرلىك جوعارى وقۋ ورنى – Shakarim University بازاسىندا «حالىقارالىق ەلەكترلىك اۆتوماتيكا زەرتحاناسى» قۇرىلادى. جوبا قىتايدىڭ الدىڭعى قاتارلى تەحنيكالىق جوعارى وقۋ ورىندارىنىڭ ءبىرى – Xi’an Jiaotong University-پەن بىرلەسىپ ىسكە اسادى. زەرتحانا ەلەكترلىك اۆتوماتيكا, «جاسىل» لوگيستيكا, اقىلدى كولىك جۇيەلەرى, تسيفرلىق شەشىمدەر مەن ينتەللەكتۋالدى ءوندىرىس سالالارىنداعى قولدانبالى زەرتتەۋلەرمەن اينالىسادى. بۇعان قىتاي ەلى تاراپىنان ينۆەستيتسيا بولىنەدى. بۇل قارجى قۇرىلعىلار, باعدارلامالىق قامتاماسىز ەتۋ, كادرلاردى وقىتۋ جانە زەرتحانالاردى جاڭعىرتۋعا جۇمسالادى. وسىلايشا Shakarim University وڭىرلىك وقۋ ورىندارىنىڭ ىشىندە العاشقى بولىپ حالىقارالىق ءبىلىم مەن عىلىم ترانسفەرى بويىنشا ناقتى جوبالاردى ىسكە اسىرۋدا. بۇل كەلىسىم – تەك قارجىلىق ينۆەستيتسيا ەمەس, سونىمەن قاتار تەحنولوگيالار, تاجىريبە, كادرلار دايارلاۋ مەن عىلىمي زەرتتەۋلەر سالاسىنداعى تەرەڭ ارىپتەستىكتىڭ كورىنىسى.
بۇل باستامالار ۋنيۆەرسيتەتتىڭ جاھاندىق ءبىلىم كەڭىستىگىندەگى باسەكەگە قابىلەتتىلىگىن ارتتىرىپ قانا قويماي, وڭىرلىك جانە ۇلتتىق دامۋعا قوسقان ۇلەسىن كورسەتەدى.
جالپى, پرەزيدەنتتىڭ بيىلعى جولداۋى – تەك باعىت-باعدار ەمەس, ەل بولاشاعىن قالىپتاستىرۋداعى ينتەللەكتۋالدىق سەرپىلىستىڭ باستاۋى. Shakarim University بۇل ۇدەرىسكە بەلسەندى قاتىسىپ, يننوۆاتسيالىق ءبىلىم بەرۋ, عىلىم مەن تەحنولوگيانى ۇشتاستىرۋ, وڭىرلىك دامۋ جانە ينۆەستيتسيالىق سەرپىلىس ارقىلى ەل دامۋىنا ءوز ۇلەسىن قوسىپ كەلەدى. ۋنيۆەرسيتەت رەكتورى رەتىندە مەن جولداۋدان تۋىندايتىن مىندەتتەردى تەرەڭ تۇسىنە وتىرىپ, ۇجىمىمىزبەن بىرگە ءبىلىم مەن عىلىمدى دامىتۋدىڭ جاڭا ساتىسىنا كوتەرىلۋگە دايىن ەكەنىمىزدى سەنىممەن ايتا الامىن.
دۋمان ورىنبەكوۆ,
شاكارىم ۋنيۆەرسيتەتىنىڭ رەكتورى
