«مەن سەناتقا ون جىل باسشىلىق ەتتىم. بۇل جۇمىستى قاشاندا زور مارتەبە ءارى ۇلكەن جاۋاپكەرشىلىك دەپ سانادىم. سوندىقتان ماعان وسى مىنبەردەن پارلامەنتتىك رەفورما تۋرالى ايتۋ وڭاي ەمەس. سوعان قاراماستان مەن ءدال بۇگىن ەلىمىزدە كوپ ۇزاماي ءبىر پالاتالى پارلامەنت قۇرۋ تۋرالى باستاما كوتەرگىم كەلەدى», – دەدى پرەزيدەنت.
ونىڭ ايتۋىنشا, بۇل – اسا ماڭىزدى ماسەلە, سوندىقتان اسىعىستىققا جول بەرىلمەۋى ءتيىس.
«بۇل رەفورما ازاماتتىق سەكتوردا, ساراپشىلار ورتاسىندا, سونداي-اق, قازىرگى پارلامەنتتە جان-جاقتى تالقىلانۋى قاجەت. رەفورمانىڭ ءمان-ماڭىزى ايرىقشا ەكەنىن ەسكەرسەك, ونى تالقىلاۋعا ءبىر جىل ۋاقىت كەرەك دەپ ويلايمىن», – دەدى قاسىم-جومارت توقاەۆ.
مەملەكەت باسشىسى 2027 جىلى جالپىۇلتتىق رەفەرەندۋم وتكىزىپ, كونستيتۋتسياعا ءتيىستى وزگەرىستەر ەنگىزۋگە بولاتىنىن ايتتى.
«مەن مەملەكەتتىڭ تاعدىرىن ايقىندايتىن بارلىق ماسەلە حالىقتىڭ كەلىسىمىمەن عانا شەشىلەدى دەپ بۇعان دەيىن بىرنەشە رەت ايتتىم. ەگەر ءبىر پالاتالى پارلامەنت قۇرۋ قاجەت دەگەن ورتاق شەشىمگە كەلسەك, ونداي پارلامەنتتى تەك قانا پارتيالىق ءتىزىم بويىنشا سايلاعان ءجون دەپ سانايمىن», – دەدى پرەزيدەنت.
