پرەزيدەنتتىڭ ايتۋىنشا, ەل ىشىندە جولاۋشىلار تاسىمالىنا قاتىستى ماسەلەلەر شەشىمىن تابۋى قاجەت.
«جۇرتتىڭ ۆاگونداردىڭ جاي-كۇيىنە كوڭىلى تولمايدى. استانادا ۆاگون قۇراستىراتىن زاۋىت ىسكە قوسىلدى. بۇل وسى سالاداعى وزەكتى ماسەلەلەردى شەشۋ ءۇشىن جاسالعان ماڭىزدى قادام بولدى. وزىق حالىقارالىق ستاندارتقا ساي جابدىقتالعان زاماناۋي جولاۋشىلار ۆاگونىن جاساۋ شەتەل ينۆەستورىنىڭ قاتىسۋىمەن قولعا الىنادى», – دەدى قاسىم-جومارت توقاەۆ.
مەملەكەت باسشىسى اۆياتسيا ينفراقۇرىلىمىن جاڭعىرتۋ ىسىنە دە توقتالدى. سوڭعى جىلدارى الماتى, شىمكەنت جانە قىزىلوردا قالالارىندا جاڭا تەرمينالدار اشىلدى. جاقىندا زايساندا, قاتونقاراعاي مەن كەندىرلىدە اۋەجاي قۇرىلىسى اياقتالادى. ارقالىق اۋەجايى قايتا جوندەلىپ جاتىر.
بۇل جوبالار وڭىرلەردىڭ ەكونوميكالىق بەلسەندىلىگىن ارتتىرىپ, جاڭا جۇمىس ورىندارىن اشۋعا جانە بىرقاتار سالانىڭ دامۋىنا ىقپال ەتەدى.
تاعى ءبىر ماڭىزدى ماسەلە – اۋەمەن جۇك تاسىمالى. پرەزيدەنت بۇعان ەرەكشە نازار اۋدارۋدى تاپسىردى.
«مەن بۇعان دەيىن اۋەمەن تاسىمالداناتىن جۇك كولەمىن ەكى ەسە ۇلعايتۋ جونىندە تاپسىرما بەردىم. بۇعان ءبىرىنشى كەزەكتە, شەتەلدىڭ ءىرى ينۆەستورلارىن تارتا وتىرىپ, ۇلتتىق جۇك تاسىمالداۋشى كومپانيا قۇرۋ ارقىلى قول جەتكىزۋگە بولادى», – دەدى مەملەكەت باسشىسى.
قاسىم-جومارت توقاەۆ ەلەكتروندى ساۋدانىڭ دامۋىنا بايلانىستى اۋە جۇك تاسىمالىنا سۇرانىس ارتقانىن, بۇل سالا اسا تابىستى باعىت ەكەنىن اتاپ ءوتتى. سوندىقتان اۋە حابتارىن دامىتۋ, ولاردى جاھاندىق لوگيستيكا تىزبەگىنە كىرىكتىرۋ قاجەتتىگىن ايتتى.
سونىمەن قاتار پرەزيدەنت ەكسپرەسس-جۇك تاسىمالىن رەتكە كەلتىرۋ, جاڭا تەحنولوگيالاردى – پيلوتسىز جۇك كولىكتەرى مەن درونداردى قولدانىسقا ەنگىزۋ ءۇشىن ءتيىستى قۇقىقتىق بازا ازىرلەۋدى تاپسىردى.
«جالپى, مەن بۇعان دەيىن بىرنەشە رەت ايتتىم: قازاقستان ەۋرازياداعى كولىك حابى بولۋعا ءتيىس. بۇل – ستراتەگيالىق ماڭىزى زور مىندەت. بۇل جۇمىسقا وسى سالادا تابىسقا جەتكەن ۇزدىك ماماندار مەن كاسىپكەرلەردى تارتۋ كەرەك. بىراق, نەگىزگى جاۋاپكەرشىلىك – ۇكىمەتتە. تاپسىرمانىڭ ورىندالۋ بارىسىن جىلدىڭ باسىندا ۇكىمەتتىڭ جىلدىق ەسەبىنەن كەيىن ارنايى جينالىستا قارايمىز», – دەدى پرەزيدەنت.
