فوتو: gov.kz
پرەزيدەنت سەرىكتەستىكتى نىعايتۋ ءۇشىن وتاندىق كاسىپكەرلەر زاماناۋي تەحنولوگيالاردى ءبىرىنشى كەزەكتە مەڭگەرۋى كەرەكتىگىن ايتتى.
«مينيسترلىك مال شارۋاشىلىعى سالاسىنداعى اگرو بيزنەستى قولداۋ جوسپارىن ازىرلەپ, ناقتى قارجىلاندىرۋ شارالارىن باستاۋ كەرەك. باستى ماقسات ىشكى نارىقتى ەتپەن تولىق قامتاماسىز ەتۋ. سونىمەن قاتار وسى سالانىڭ ەكسپورتتىق الەۋەتىن كۇشەيتۋ. ەلدەگى ازىق-ت ۇلىك نارىعىنىڭ يمپورتقا تاۋەلدىلىگىن بارىنشا ازايتۋ – ۇكىمەتتىڭ ستراتەگيالىق مىندەتى. ارينە, ءوزىمىزدى ءوزىمىز ءجۇز پايىز قامتاماسىز ەتۋىمىز مۇمكىن ەمەس, بالكىم, ونىڭ قاجەتى دە جوق شىعار. بىراق, نارىقتاعى قازىرگى جاعدايدى ايتۋدىڭ ءوزى ۇيات», دەدى ق.توقاەۆ.
سونداي-اق مەملەكەت باسشىسى ءداستۇرلى ۇلتتىق ونىمدەرىمىزدى سىرتقى نارىققا بەلسەندى تۇردە تانىتۋدى, اگرارلىق ەكسپورتتىڭ ناقتى جوسپارىن ازىرلەۋدى تاپسىردى.
«وندا لوگيستيكا, ۆەتەرينارلىق جانە فيتوسانيتارلىق ستاندارتتار مەن ۇتىمدى ماركەتينگ ستراتەگياسى ەسكەرىلۋگە ءتيىس. بۇل – اۋىل شارۋاشىلىعى مينيسترلىگىنىڭ عانا ەمەس, بىرقاتار مەملەكەتتىك ورگاننىڭ ورتاق مىندەتى. سوندىقتان ءىس-ارەكەتتەردى ۇكىمەت باسشىلىعى دەڭگەيىندە ۇيلەستىرىپ وتىرۋ كەرەك. ۇكىمەت ەۋرازيا اۋماعىنداعى ساۋدا-ساتتىقتىڭ ءادىل جاعدايدا جاسالۋىن ناقتى دالەلمەن تالاپ ەتۋگە مىندەتتى. ال دەپۋتاتتار زاڭنامالىق باستامالار ارقىلى وتاندىق ءونىم وندىرۋشىلەردىڭ قۇقىقتارىن قورعاۋعا ءتيىس», دەدى پرەزيدەنت.
