پرەزيدەنت بۇل جوبانىڭ اۋقىمى ەرەكشە ەكەنىن جەتكىزدى. قازىردىڭ وزىندە ارناۋلى اۋماق ءبولىنىپ, باستاپقى جوسپارلاۋ اياقتالعان, نەگىزگى ينفراقۇرىلىم جەلىلەرى تارتىلعان.
«مەنىڭ قىتايعا جاساعان ساپارىم كەزىندە الەمدىك دەڭگەيدەگى كومپانيالارمەن ميللياردتاعان دوللارلىق كەلىسىمدەر جاسالدى. سول كومپانيالاردىڭ ءبىرى جاھاندىق تەحنوپوليس شەنچجەن قۇرىلىسىنا قاتىسقان. ەندى ءدال وسى ۇيىم Alatau city جوباسىن جۇزەگە اسىرۋعا تىكەلەي قاتىسادى», دەدى توقاەۆ.
مەملەكەت باسشىسى ون كۇن ىشىندە ۇكىمەتكە قالاعا ارناۋلى مارتەبە بەرەتىن جارلىق جوباسىن ازىرلەۋدى تاپسىردى. ال التى ايدىڭ ىشىندە باسقارۋ رەجيمى, قارجىلىق مودەلى جانە وزگە دە ماڭىزدى تۇستارى ايقىندالعان جەكە زاڭ قابىلدانۋى ءتيىس.
«ەرەكشە مارتەبە – ارتىقشىلىق ەمەس, قاجەتتى قۇرال. ونسىز جوبا قاعاز جۇزىندە قالىپ قويۋى مۇمكىن», دەدى پرەزيدەنت.
Alatau city ورتالىق ازياداعى العاشقى تولىق تسيفرلىق قالا بولماق. مۇندا سمارت-سيتي تەحنولوگيالارى ەنگىزىلىپ, تاۋارلار مەن قىزمەتتەردى كريپتوۆاليۋتامەن تولەۋ مۇمكىندىگى قاراستىرىلادى.
«بۇل جوبا – ەلىمىزدىڭ بولاشاق كەلبەتى. Alatau city تەحنولوگيالىق پروگرەسس پەن جايلى ءومىر ءسۇرۋ ورتاسىن ۇيلەستىرەتىن جاڭا ۇلگىگە اينالادى», دەدى قاسىم-جومارت توقاەۆ.
