سۋرەتتەردى تۇسىرگەن – اسىلبەك ناسىپقالي ۇلى
جاڭا ءبىلىم ورداسى مەملەكەت باسشىسى قاسىم-جومارت توقاەۆتىڭ اپاتتى مەكتەپتەردىڭ ورنىنا جاڭا ءبىلىم وشاقتارىن سالۋ جونىندەگى تاپسىرماسىنا سايكەس, «قاراشىعاناق پەتروليۋم وپەرەيتينگ ب.ۆ.» كومپانياسىنىڭ الەۋمەتتىك جاۋاپكەرشىلىك اياسىندا جۇزەگە استى. مەكتەپتىڭ العاشقى قوڭىراۋ سالتاناتىنا باتىس قازاقستان وبلىسى اكىمىنىڭ ورىنباسارى قايىرجان مەڭدىعاليەۆ, «قاراشىعاناق پەترولەۋم وپەرەيتينگ ب.ۆ.» باس ديرەكتورىنىڭ ورىنباسارى مۇحتار مانكەەۆ, وبلىستىق ءبىلىم باسقارماسىنىڭ باسشىسى ەلدوس سافۋللين, اۋدان اكىمى اسلانبەك سارقۇلوۆ, اۋداندىق ءماسليحات توراعاسى سارسەنباي مولداشەۆ قاتىستى.
قونىس اۋىلىندا العاشقى مەكتەپتىڭ ىرگەتاسى 1948 جىلى سالىنعان ەكەن. 1976 جىلى كرۋپسكايا اتىنداعى 8 جىلدىق مەكتەپ بولىپ وزگەرگەن كەزدە جاڭا عيماراتى بوي كوتەرگەن. بىراق ودان بەرى دە جارتى عاسىردان اسا ۋاقىت ءوتتى. توزعان مەكتەپتىڭ ورنىنا سالىنعان جاڭا ءبىلىم ورداسىندا زامان تالابىنا ساي جابدىقتالعان 11 وقۋ كابينەتى, سپورت زالى, اسحانا, كىتاپحانا, ءماجىلىس زالى بار.
– پرەزيدەنت بيىلعى تامىز كونفەرەنتسياسىندا «بۇگىن سانالى ۇرپاق تاربيەلەي الساق, ەرتەڭ زامان كوشىنىڭ باسىندا جۇرەمىز. سوندىقتان وسى سالانى قولداۋ مەملەكەتتىك ساياساتتىڭ نەگىزگى باسىمدىعى بولىپ قالا بەرەدى...» دەگەن بولاتىن. بۇل ءبىلىم ورداسىنىڭ بوي كوتەرۋى — مەملەكەت پەن بيزنەستىڭ, جەرگىلىكتى بيلىك پەن حالىقتىڭ بىرلەسكەن ەڭبەگىنىڭ جارقىن كورىنىسى. «قاراشىعاناق پەتروليۋم وپەرەيتينگ ب.ۆ.» كومپانياسى ءوڭىرىمىزدىڭ الەۋمەتتىك دامۋىنا بەلسەندى ۇلەس قوسىپ كەلەدى, – دەيدى وبلىس اكىمىنىڭ ورىنباسارى قايىرجان مەڭدىعاليەۆ.
قايىرجان ەرمەك ۇلىنىڭ ايتۋىنشا, كەيىنگى ءۇش جىلدا وبلىستا جالپى سانى 7 526 ورىندىق 26 مەكتەپ سالىنعان. سونىڭ ىشىندە كپو ب.ۆ. كومپانياسىنىڭ الەۋمەتتىك ينۆەستيتسيالىق جوباسى اياسىندا 1 344 ورىنعا 16 مەكتەپ, جەرگىلىكتى بيۋدجەت ەسەبىنەن 1 982 ورىنعا 7 مەكتەپ, «كەلەشەك مەكتەپتەرى» ۇلتتىق جوباسى اياسىندا 4 200 ورىنعا 3 مەكتەپ پايدالانۋعا بەرىلگەن. 2023 جىلى قازتالوۆ اۋىلىندا الما ورازباەۆا اتىنداعى 600 ورىندىق مەكتەپ, جۇلدىز اۋىلىندا ا.حۇسايىنوۆ اتىنداعى 108 ورىندىق مەكتەپ, بوستاندىق جانە قاراوبا اۋىلدارىندا دارىگەرلىك امبۋلاتوريا, سونداي-اق قاراوزەن اۋىلىندا فەلدشەرلىك-اكۋشەرلىك پۋنكت ىسكە قوسىلدى. ال 2024 جىلى سارالجىن اۋىلىندا 60 ورىندىق مەكتەپ, قايشاقۇدىق اۋىلىندا ءمودۋلدى مەديتسينالىق پۋنكت, قايىڭدى اۋىلىندا جاڭا مادەنيەت ءۇيى, قازتالوۆ اۋىلىندا 320 ورىندىق زاماناۋي سپورت كەشەنى پايدالانۋعا بەرىلدى. 2025 جىلى 4 باعىت بويىنشا 20 الەۋمەتتىك نىسانعا گاز كىرگىزىلدى, «قالادان – اۋىلعا» باعدارلاماسى بويىنشا جالپاقتال, قاراوزەن, ورازعالي اۋىلدارىنا كوشىپ كەلگەن 8 وتباسىعا پاتەر كىلتى تابىستالدى. سەكسەنباەۆ, بوزوبا, بەيىستەرەك, حايرۋش اۋىلدارىنا اۋىزسۋعا ارنالعان بلوك-ءمودۋلدى كەشەن ورناتىلدى. «بۇل نىساندار – اۋدان تۇرعىندارىنىڭ الەۋمەتتىك جاعدايىن جاقسارتۋعا, ساپالى ءبىلىم, دەنساۋلىق ساقتاۋ جانە مادەني-سپورتتىق ينفراقۇرىلىمدى دامىتۋعا باعىتتالعان مەملەكەتتىك ساياساتتىڭ جەمىستى ناتيجەسى» دەيدى ورىنباسار.
ءبىلىم ورداسىنىڭ اشىلۋ سالتاناتىندا جاڭا مەكتەپكە وبلىس اكىمىنىڭ اتىنان LED ەكران تابىستالدى.
باتىس قازاقستان وبلىسى
