پارلامەنت سەناتىنىڭ توراعاسى, سەزد حاتشىلىعىنىڭ باسشىسى ماۋلەن اشىمباەۆ الەمدىك جانە ءداستۇرلى دىندەر ليدەرلەرىنىڭ VIII سەزى قارساڭىندا Qogam News جوباسىنا سۇحبات بەردى. وندا پالاتا سپيكەرى قازاقستان پرەزيدەنتى قاسىم-جومارت توقاەۆتىڭ «بەيبىتشىلىك جولىنداعى جاڭا قوزعالىس» قالىپتاستىرۋ جونىندەگى باستاماسى الداعى فورۋمدا نەگىزگى تاقىرىپتاردىڭ ءبىرى بولاتىنىن اتاپ ءوتتى.
سەنات توراعاسىنىڭ ايتۋىنشا, بۇل يدەيا الەمدە قاقتىعىستاردى توقتاتۋ جانە جەر ءجۇزىنىڭ ءار ايماعىنداعى زورلىق-زومبىلىق دەڭگەيىن تومەندەتۋ جولىندا كۇش بىرىكتىرۋدىڭ ماڭىزدى ەكەنىن كورسەتەدى. حاوس پەن تۇراقسىزدىق قالىپتى جاعدايعا اينالعان قازىرگى كەزەڭدە رۋحاني كوشباسشىلار عانا الەمدە ىزگىلىكتى ىلگەرىلەتۋ جانە قاقتىعىستاردى بەيبىت جولمەن شەشۋ ىسىندە ماڭىزدى ءرول اتقارا الادى.
«بۇل حالىقارالىق قاۋىمداستىق ءۇشىن دەر كەزىندە قولعا الىنعان اسا ماڭىزدى فورۋم بولادى. قازىرگى الەمگە وزگەرىس ەنگىزۋ ءۇشىن ءىس جۇزىندە قانداي دا ءبىر قادامدار قاجەت. پرەزيدەنتىمىز قاسىم-جومارت كەمەل ۇلى توقاەۆ وسى كوكەيكەستى ماسەلەنى كوتەردى جانە ءبىز «بەيبىتشىلىك جولىنداعى جاڭا قوزعالىس» يدەياسى VIII سەزد اياسىندا نەگىزگى تاقىرىپتاردىڭ ءبىرى بولادى دەپ سەنەمىز», – دەدى ماۋلەن اشىمباەۆ.
