فوتو: اشىق دەرەككوز
جۇمىسشى ماماندىقتارىنىڭ جىلى اياسىندا تەحنيكالىق جانە كاسىپتىك ءبىلىم بەرۋ سالاسى ەڭبەك نارىعىنىڭ تالاپتارىنا ساي قايتا جاڭعىرتىلىپ جاتىر. وسى تۇرعىدا جاڭا كاسىپتەر اتلاسى ازىرلەنىپ, ونىڭ نەگىزىندە 900-دەن استام ءبىلىم بەرۋ باعدارلاماسى وزەكتەندىرىلدى, ال 510-نان استام جاڭا باعدارلاما جاسالعان.
سونىمەن قاتار 9 وڭىردە كادرلارعا قاجەتتىلىك كارتالارى دايىندالعان. جۇمىسشى ماماندىقتارىنىڭ بەدەلىن ارتتىرۋ ءۇشىن Jas Skills جانە Junior Skills چەمپيوناتتارى ۇيىمداستىرىلىپ, 107 مىڭنان استام وقۋشى «مانساپ كومپاسى» پلاتفورماسىندا كاسىبي دياگنوستيكادان ءوتتى. بۇعان قوسا, بەس كوللەدجدى حالىقارالىق دەڭگەيگە كوتەرۋ باعىتىندا ناقتى جۇمىستار باستالدى.
ءبىلىمنىڭ قولجەتىمدىلىگىن ارتتىرۋدىڭ باستى تەتىكتەرىنىڭ ءبىرى – وقىتۋدى تىكەلەي قارجىلاندىرۋ. پرەزيدەنتتىڭ تاپسىرماسىنا سايكەس, مەملەكەتتىك گرانتتاردىڭ سانى 50%-عا كوبەيتىلىپ, بيىلعى وقۋ جىلىندا ولاردىڭ كولەمى 93 مىڭنان استى. بۇدان بولەك, جەرگىلىكتى اكىمدىكتەر – 1,5 مىڭنان استام, KAZENERGY قاۋىمداستىعى – 400, جوو رەكتورلارى – 2,2 مىڭ جانە «قازاقستان» قورى – 500 قوسىمشا گرانت ءبولدى.
ستۋدەنتتەردى الەۋمەتتىك قولداۋ شارالارى دا جۇيەلى تۇردە جۇرگىزىلىپ كەلەدى. 2024 جىلدىڭ قىركۇيەگىنەن باستاپ شاكىرتاقى ءوستى: باكالاۆرلار ءۇشىن – 20%-عا, ماگيسترانتتار مەن دوكتورانتتار ءۇشىن – 15%-عا, پەداگوگيكا سالاسىنداعى ستۋدەنتتەردىڭ شاكىرتاقىسى 75 مىڭ تەڭگەدەن استى. سوڭعى بەس جىل ىشىندە شاكىرتاقى كولەمى ەكى ەسە ارتتى. الداعى ماقسات – 2029 جىلعا قاراي ونىڭ مولشەرىن تاعى دا 200%-عا دەيىن كوتەرۋ.
جاستاردى قولداۋدىڭ ۇزاقمەرزىمدى قارجىلىق تەتىكتەرى دە ەنگىزىلىپ جاتىر.
«ۇلتتىق قور – بالالارعا» باعدارلاماسى باستاپقى كاپيتالدى قالىپتاستىرۋعا كومەكتەسەدى, 2024 جىلدىڭ قورىتىندىسى بويىنشا بالالاردىڭ شوتتارىنا $8 880 ملن ءتۇستى. مەملەكەتتىڭ قاتىسۋىمەن جۇزەگە اساتىن جاڭا «كەلەشەك» جيناقتاۋشى جۇيەسى (60 اەك باستاپقى كاپيتال جانە 7% دەيىنگى سىيلىقاقى) اتا-انالارعا ءبىلىم بەرۋگە جوسپارلى تۇردە 5 ملن تەڭگەدەن استام قاراجات جيناۋعا مۇمكىندىك بەرەدى. ستۋدەنت مەملەكەتتىك گرانت العان جاعدايدا, «كەلەشەك» باعدارلاماسى بويىنشا جيناقتالعان قاراجات تۇرعىن ءۇي ساتىپ الۋعا باعىتتالۋى مۇمكىن», دەدى عىلىم جانە جوعارى ءبىلىم ءمينيسترى ساياسات نۇربەك.
وعان قوسا, مەملەكەت تاراپىنان جەڭىلدەتىلگەن ءبىلىم بەرۋ نەسيەلەرى مەن 300 سارالانعان گرانت قاراستىرىلعان. بۇل گرانتتار وقۋ اقىسىنىڭ 50%-ىن نەمەسە 75%-ىن جابۋعا مۇمكىندىك بەرەدى, ال ستۋدەنت تولىق كولەمدە شاكىرتاقى الادى.
مەملەكەت باسشىسىنىڭ تاپسىرماسىنا سايكەس, جىل سايىن ستۋدەنتتىك جاتاقحانالاردا كەمىندە 10 مىڭ ورىن اشۋ مىندەتى قويىلعان. 2018 جىلدان بەرى 62 مىڭ ورىندىق 251 جاڭا جاتاقحانا پايدالانۋعا بەرىلدى. بيىلعى جىلى 29 جاتاقحانا اشىلىپ, ولاردىڭ جالپى سىيىمدىلىعى 10 مىڭنان استى. سونىڭ ىشىندە ەل تاريحىنداعى ەڭ ءىرى جاتاقحانا – ەلورداداعى ەۋرازيا ۇلتتىق ۋنيۆەرسيتەتىنە ارنالعان 2 656 ورىندىق عيمارات پايدالانۋعا بەرىلدى. وسىلايشا ستۋدەنتتەرگە ارنالعان جاتاقحانا تاپشىلىعى بارلىق وڭىردە شەشىمىن تاپتى. سونىمەن بىرگە «Student-residence» زاماناۋي ۇلگىسى ەنگىزىلىپ, الەۋمەتتىك وسال توپتاعى ستۋدەنتتەردىڭ جاتاقحانادا تۇرۋ شىعىندارى 2023 جىلدان باستاپ مەملەكەت ەسەبىنەن وتەلىپ وتىر.
