مارتەبەلى مەيماندى ماجىلىستە قارسى العان ەرلان قوشانوۆ موڭعوليا ارقاشان قازاقستان ءۇشىن ازياداعى ماڭىزدى ارىپتەس ەكەنىن اتاپ ءوتتى. بۇل رەتتە وتانداستارىمىز كورشى ەلدىڭ جەتىستىكتەرىنە رياسىز قۋانىپ, موڭعوليا پرەزيدەنتى ۋحنااگين حۋرەلسۋحتىڭ باستاماسىمەن جۇرگىزىلىپ جاتقان اۋقىمدى ساياسي-ەكونوميكالىق جانە الەۋمەتتىك رەفورمالاردى قولدايدى.
– ەلدەرىمىزدىڭ اراسىنداعى قارىم-قاتىناس قارقىندى دامىپ كەلەدى. پرەزيدەنت قاسىم-جومارت توقاەۆتىڭ موڭعولياعا بىلتىرعى مەملەكەتتىك ساپارى وتە ناتيجەلى بولدى. كوشباسشىلارىمىزدىڭ ارقاسىندا ەكىجاقتى بايلانىسىمىز ستراتەگيالىق سەرىكتەستىك دەڭگەيىنە كوتەرىلىپ, ءتۇرلى سالانى قامتيتىن 11 قۇجاتقا قول قويىلدى. بۇگىن ءبىز قول قوياتىن پارلامەنتتەرىمىز اراسىنداعى ىنتىماقتاستىق تۋرالى مەموراندۋم ارىپتەستىگىمىزدى جاڭا بەلەسكە كوتەرەدى دەپ سەنەمىن, – دەدى ءماجىلىس سپيكەرى.
ەرلان قوشانوۆ 2022 جىلدان بەرى قازاقستاندا جۇزەگە اسىپ جاتقان كونستيتۋتسيالىق رەفورمالار مەن وزگەرىستەر تۋرالى ايتىپ, ەكى ەلدىڭ ساياسي باعىتتارى ۇقساستىعىنا ءمان بەردى. بىلتىر موڭعوليانىڭ ۇلى مەملەكەتتىك حۋرالى سايلاۋى ارالاس جۇيە بويىنشا ءوتىپ, پارلامەنت قۇرامىنا العاش رەت بەس پارتيانىڭ وكىلدەرى كىردى.
پارلامەنتارالىق ىنتىماقتاستىقتى دامىتۋ جايىن ءسوز ەتكەن ەكى تاراپ دەپۋتاتتار نۇرتاي سابيليانوۆ پەن ۋحناگين وتگونبايار باسقاراتىن دوستىق توپتارىنىڭ جۇمىسىن كۇشەيتۋ تۋرالى ۋاعدالاستى. تۇراقتى ديالوگتى سالالىق كوميتەتتەر اياسىندا دا ىنتالاندىرۋ جوسپارلانىپ وتىر.
پارلامەنتتەر باسشىلارى پارتيا جەلىسى بويىنشا ىنتىماقتاستىقتى نىعايتۋ جانە پارلامەنتارالىق وداق پەن ەقىۇ پارلامەنتتىك اسسامبلەياسى سياقتى كوپجاقتى الاڭداردا ودان ءارى بىرلەسە جۇمىس ىستەۋ ماسەلەلەرىن دە قوزعادى.
ءوز كەزەگىندە ۇلى مەملەكەتتىك حۋرال توراعاسى تسيفرلاندىرۋ, جاساندى ينتەللەكتىنى دامىتۋ, ەكولوگيا, اۋىل شارۋاشىلىعى سياقتى سالالار بويىنشا زاڭ شىعارۋدا تاجىريبە الماسۋعا ءوزارا ۇلكەن قىزىعۋشىلىق بار ەكەنىن اتاپ ءوتتى.
– قازاقستان – موڭعوليانىڭ ورتالىق ازياداعى العاشقى ستراتەگيالىق سەرىكتەسى. بۇگىنگى ءبىزدىڭ كەزدەسۋىمىز پارلامەنتارالىق قاتىناستى عانا قامتىپ قويمايدى. كۇن تارتىبىندە ەكونوميكالىق-ساياسي, مادەني-گۋمانيتارلىق جانە باسقا دا سالالارداعى ءوزارا ءىس-ارەكەتتى دامىتۋ ماسەلەسى تالقىلانۋدا, – دەدى داشزەگۆين امارباياسگالان.
سونداي-اق پارلامەنتشىلەر تۋريزم باعىتىنداعى ارىپتەستىكتى نىعايتۋ, ەكى ەلدىڭ ەكونوميكالارى ءۇشىن كادرلار دايارلاۋ جانە تەحنولوگيالاردى دامىتۋ مۇمكىندىكتەرىن تالقىلادى.
كەزدەسۋ قورىتىندىسىندا تاراپتار پارلامەنت ءماجىلىسى مەن ۇلى مەملەكەتتىك حۋرال اراسىنداعى ىنتىماقتاستىق تۋرالى مەموراندۋمعا قول قويدى. قۇجاتقا سايكەس, تاراپتار ءوز قۇزىرەتتەرى اياسىندا ساياسي, ساۋدا-ەكونوميكالىق, عىلىمي-تەحنيكالىق, الەۋمەتتىك-مادەني, گۋمانيتارلىق, باسقا دا سالالاردا, سونداي-اق ەكونوميكانى تسيفرلاندىرۋ, يننوۆاتسيالاردى دامىتۋ مەن ەنگىزۋ ىسىندە قازاقستان رەسپۋبليكاسى مەن موڭعوليا ىنتىماقتاستىعىن نىعايتۋعا جانە دامىتۋعا جاردەمدەسۋگە مىندەتتەنەدى. سونىمەن قاتار ءماجىلىس الاڭىندا شىعىس قازاقستان وبلىسى مەن قوبدا ايماعى اراسىندا باۋىرلاستىق قاتىناس ورناتۋ تۋرالى مەموراندۋمعا قول قويىلدى.
رەسمي ساپار اياسىندا موڭعوليا دەلەگاتسياسىنىڭ «استانا» حالىقارالىق قارجى ورتالىعىنا, «Kazakh Invest» ۇلتتىق كومپانياسىنا, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ احۋالدىق ورتالىعىنا, «قازاقستان عارىش ساپارى» ۇلتتىق كومپانياسىنا جانە باسقا دا نىساندارعا بارۋى جوسپارلانعان.
