سۋرەت: primeminister.kz
ءوز سوزىندە ول «Astana Finance Days» بۇگىندە 70-تەن استام ەلدىڭ ينۆەستورلارىن, بيزنەس قاۋىمداستىعى مەن مەملەكەتتىك قۇرىلىمدارىن توعىستىرعان ايماقتىق دەڭگەيدەگى باستى ىنتىماقتاستىق الاڭىنا اينالعانىن ءارى ەلىمىزدىڭ اشىقتىعىن ايقىنداپ, ىنتىماقتاستىق پەن يننوۆاتسياعا دەگەن بەرىك ۇستانىمىن دالەلدەيتىنىن اتاپ ءوتتى.
فورۋمنىڭ وزەكتىلىگىن ەلدىڭ ەكونوميكالىق كورسەتكىشتەرى دە ايقىن دالەلدەيدى. بيىلعى جىلعى قاڭتار-شىلدە ارالىعىندا ءىجو ءوسىمى 6,3%-دى قۇراپ, ونىڭ ىشىندە ناقتى سەكتور 8,3%-عا, قىزمەت كورسەتۋ سالاسى 5,2%-عا ارتتى. جىلدىڭ I توقسانىندا تىكەلەي شەتەلدىك ينۆەستيتسيالار كولەمى 6,6 ملرد دوللارعا جەتىپ, وتكەن جىلمەن سالىستىرعاندا 6,2%-عا ءوستى. ال نەگىزگى كاپيتالعا سالىنعان ينۆەستيتسيالار 9,9 ترلن تەڭگەنى قۇراپ, 16,1%-عا ۇلعايدى. بۇل دەرەكتەر حالىقارالىق سەرىكتەستەردىڭ قولداۋىن كورسەتىپ, قازاقستاننىڭ سەنىمدى ينۆەستيتسيالىق الاڭ رەتىندەگى مارتەبەسىن راستايدى.
«مەملەكەت باسشىسى العا قويعان باستى مىندەتتىڭ ءبىرى – ينۆەستيتسيا تارتۋ. ماقسات – 2029 جىلعا قاراي ەكونوميكانىڭ كولەمىن ەكى ەسەلەۋ. بۇل ءۇشىن كەمىندە 150 ملرد دوللار كولەمىندە تىكەلەي ينۆەستيتسيا تارتىپ, نەگىزگى كاپيتالعا سالىناتىن ينۆەستيتسيالاردىڭ ءىجو-دەگى ۇلەسىن 23%-عا جەتكىزۋ قاجەت. وسى ماقساتتا قازىردىڭ وزىندە جاڭا تەتىكتەر ەنگىزىلدى, سونىڭ ىشىندە ينۆەستيتسيالار تۋرالى كەلىسىمدەر مەن باسىم جوبالارعا ارنالعان «جاسىل ءدالىز» مەحانيزمى بار», دەدى س.جۇمانعارين.
استانا حالىقارالىق قارجى ورتالىعى (احقو) بۇل مىندەتتەردى جۇزەگە اسىرۋدا ەرەكشە ورىن الادى. قۇرىلعان كۇنىنەن باستاپ احقو اعىلشىن جالپى قۇقىعىنىڭ قاعيداتتارىنا, تاۋەلسىز رەتتەۋ مەن حالىقارالىق ستاندارتتارعا نەگىزدەلگەن بىرەگەي ينستيتۋتسيونالدىق ورتا ۇسىنىپ كەلەدى. بۇگىندە ورتالىق الاڭىندا 85 ەلدەن 4 مىڭنان استام كومپانيا تىركەلگەن. ولار اكتيۆتەردى باسقارۋ مەن فينتەحتەن باستاپ, جاسىل قارجى جانە يسلامدىق بانكينگكە دەيىنگى ءتۇرلى سالالاردى قامتيدى. وسى كومپانيالاردىڭ قازاقستان ەكونوميكاسىنا سالعان جالپى ينۆەستيتسيا كولەمى 17 ملرد دوللاردان استى.
ءسوز سوڭىندا س.جۇمانعارين سەرىكتەستەرگە بىرلەسكەن جوبالارعا بەلسەندى قاتىسقانى ءۇشىن العىس ايتىپ, VIII «Astana Finance Days» فورۋمىنىڭ ىنتىماقتاستىقتىڭ جاڭا كوكجيەكتەرىن اشىپ, ورتاق يگىلىككە قىزمەت ەتەتىن بولاشاقتى قالىپتاستىرۋدا ماڭىزدى قادام بولارىنا سەنىم ءبىلدىردى.
