مەگاپوليستىڭ ونەرسۇيەر قاۋىمى مەن قالا زيالىلارى قاتىستى كونتسەرتكە قىتاي حالىق رەسپۋبليكاسىنىڭ باس كونسۋلدىعى باستاماشى بولىپ, جامبىل اتىنداعى قازاق مەملەكەتتىك اكادەميالىق فيلارمونياسى مەن ب.بايقاداموۆ اتىنداعى مەملەكەتتىك حور كاپەللاسى, سونىمەن قاتار ت.ابدىراشەۆ اتىنداعى قر مەملەكەتتىك اكادەميالىق سيمفونيالىق وركەسترى قولداۋ تانىتتى.
سالتاناتتى كونتسەرتتە قىتاي حالىق رەسپۋبليكاسىنىڭ الماتىداعى باس كونسۋلى تسزيان ۆەي حانىم ءسوز الىپ: ء«بىز بۇگىن قىتايدىڭ ۇلى حالىق كومپوزيتورى سيان سينحايدىڭ تۋعانىنا 120 جىل تولۋىن بىرگە اتاپ وتپەكپىز. ول ءداۋىردىڭ رۋحاني قۋاتى مەن وتانعا دەگەن شەكسىز سۇيىسپەنشىلىكپەن شابىت الىپ, «سارى وزەن» كانتاتاسى مەن «تايحانشان تاۋىندا» سەكىلدى ماڭگىلىك مۋزىكالىق تۋىندىلاردى دۇنيەگە اكەلدى. ول تەك قىتاي مۋزىكاسىنىڭ عانا ەمەس, زاماناۋي الەمدىك مۋزىكا تاريحىنىڭ دا جارقىن ءىنجۋى.
ۇلى مۋزىكانتتى ءبىزدىڭ ورتاق قالامىز الماتىمەن ەرەكشە دە كۇردەلى تاعدىرى بايلانىستىرادى. كەڭەستەر وداعى مەن گەرمانيا اراسىنداعى سوعىس باستالعاننان كەيىن سيان سينحاي ءدال وسى قالاعا كەلگەن بولاتىن. قيىن-قىستاۋ كەزەڭدەردە قازاق مۋزىكانتى باقىتجان بايقاداموۆ وعان قولداۋ كورسەتكەن. توراعا سي تسزينپين مەن پرەزيدەنت قاسىم-جومارتتوقاەۆ وسىناۋ جان تەبىرەنتەرلىك دوستىق پەن ءوزارا كومەك تۋرالى بىرنەشە رەت تىلگە تيەك ەتكەن. ەكى مۋزىكانتتىڭ بىرلەسكەن تۋىندىسى – «امانگەلدى» سيمفونيالىق پوەماسى – ەكىنشى دۇنيەجۇزىلىك سوعىس كەزىندە رۋحاني ۇرانعا, ال ولاردىڭ وت پەن سۋدان وتكەن دوستىعى قىتاي مەن قازاقستان اراسىنداعى ماڭگى دوستىقتىڭ نىشانى ءارى ۇلگىسىنە اينالدى», دەدى.
قىتاي حالىق رەسپۋبليكاسىنىڭ الماتىداعى باس كونسۋلى ورتاق تاريحىمىزدى ەسكە الا وتىرىپ, بەيبىت بولاشاقتى بىرلەسە قۇرۋ ءۇشىن قحر ۇكىمەتى ەكى قازاقستاندىق قاھارماندى – مايحان ءىلياس ۇلى ارەنوۆ پەن ابدىبەكتى نۇرماعامبەتوۆ – «قىتاي حالقىنىڭ جاپون باسقىنشىلارىنا قارسى سوعىستاعى جەڭىستىڭ 80 جىلدىعى» ەستەلىك مەدالىمەن ماراپاتتاۋ تۋرالى شەشىم قابىلداعانىن جەتكىزدى. بۇل قۇرمەت – قازاق حالقىنىڭ قىتاي حالقىنىڭ تاۋەلسىزدىگى مەن ازاتتىعى جولىنداعى كۇرەسىنە قوسقان زور ۇلەسىن مويىنداپ, ماڭگى ەستە قالدىرۋدى كوزدەيدى.
ال مەرەيتويلىق مەدالدار ساحنا تورىندە قاھارمانداردىڭ تۋىستارى – مۇرات مايحان ۇلى ارەنوۆ پەن ماقسات ابدىبەك ۇلى نۇرماعامبەتوۆتەرگە تابىستالدى.
ماراپاتتاۋ سيان سينحايدىڭ 120 جىلدىق قۇرمەتىنە قويىلعان سالتاناتتى كونتسەرتكە ۇلاسىپ, مۋزىكانتتىڭ تانىمال شىعارمالارى ورىندالدى.
الماتى
