فوتو: .bbc.com
WLFI اتاۋىن العان كريپتوۆاليۋتا دۇيسەنبى كۇنى ساۋدا الاڭىنا شىققاننان كەيىن ءبىر توكەننىڭ باعاسى شامامەن 40 تسەنتكە دەيىن كوتەرىلگەن. الايدا سەيسەنبى كۇنى تاڭەرتەڭ, جەرگىلىكتى ۋاقىت بويىنشا, قۇنى 48 پايىزعا تومەندەپ, 21 تسەنتكە دەيىن تۇسكەن. كۇننىڭ ەكىنشى جارتىسىندا باعاسى ءبىرشاما قالپىنا كەلىپ, 23 تسەنت شاماسىندا تۇراقتاعان.
باعانىڭ قۇلدىراۋىنا قاراماستان, ترامپ اۋلەتىنىڭ ۇلەسى 5 ميلليارد دوللار كولەمىندە باعالانىپ وتىر. سەبەبى ولاردىڭ يەلىگىندە 22,5 ميلليارد WLFI توكەنى بار.
World Liberty Financial مالىمەتىنشە, دونالد ترامپ پەن ونىڭ وتباسى ازىرگە ءوز اكتيۆتەرىن ساتا المايدى, سەبەبى نەگىزىن قالاۋشىلارعا تيەسىلى توكەندەر ۋاقىتشا بۇعاتتالعان.
كومپانيانىڭ تۇسىندىرۋىنشە, WLFI – بۇل تەك قارجىلىق اكتيۆ قانا ەمەس, سونىمەن قاتار ونىڭ يەلەرىنە World Liberty Financial قىزمەتىن باسقارۋعا بايلانىستى ماسەلەلەردە داۋىس بەرۋ قۇقىعىن بەرەتىن ارنايى توكەن.
ايتا كەتەيىك, دونالد ترامپ پرەزيدەنتتىك ەكىنشى مەرزىمى كەزىندە تسيفرلىق اكتيۆتەردى قولدايتىنىن مالىمدەپ, اقش-تى «الەمنىڭ كريپتواستاناسىنا» اينالدىراتىنىن ۋادە ەتكەن بولاتىن.
