جاڭا تۇزەتۋلەرگە سايكەس, ءبىر كانديدات ەندى بىرنەشە وكرۋگتەن سايلاۋعا تۇسە المايدى, سونداي-اق ءماجىلىس پەن ماسليحاتقا قاتارىنان ۇمىتكەر بولۋعا دا تىيىم سالىنادى. اكىمدىككە ۇمىتكەرلەر ءۇشىن مىندەتتى سايلاۋ قورى قۇرۋ تالابى ەنگىزىلەدى.
سونىمەن قاتار پرەزيدەنتكە, دەپۋتاتتارعا, اكىمدەرگە جانە ورتالىق سايلاۋ كوميسسياسى مۇشەلىگىنە كانديداتتار اۋىر جانە اسا اۋىر قىلمىستار بويىنشا سوتتالماعان بولۋى ءتيىس. ۇگىت-ناسيحات جۇرگىزۋ ءتارتىبى ناقتىلانىپ, زاڭدى بۇزعاندارعا اكىمشىلىك جاۋاپكەرشىلىك قاراستىرىلىپ وتىر.
زاڭ جوباسى سايلاۋ راسىمدەرىن جەتىلدىرۋگە باعىتتالعان.
«كونستيتۋتسيالىق زاڭ جوباسىنىڭ ماقساتى – سايلاۋ وتكىزۋ راسىمدەرىن جەتىلدىرۋگە جانە سايلاۋ زاڭناماسىنىڭ نورمالارىن ساقتاماعانى ءۇشىن اكىمشىلىك جاۋاپكەرشىلىك ەنگىزۋگە باعىتتالعان», دەدى زاڭناما جانە سوت-قۇقىقتىق رەفورما كوميتەتىنىڭ ءتورايىمى سنەجانا يماشەۆا.
جوبا الداعى ۋاقىتتا پارلامەنتتە تالقىلانادى.
