فوتو: ءال-فارابي اتىنداعى قازۇۋ-دىڭ ءباسپاسوز قىزمەتى
بۇل جوبا قازۇۋ مەن قىتايدىڭ جوعارى تەحنولوگيالىق جەتەكشى كومپانياسى – Jiangsu Huibo Robotics Technology Co., Ltd. اراسىنداعى ستراتەگيالىق ارىپتەستىكتىڭ ناتيجەسىندە جۇزەگە استى.
اشىلۋ ءراسىمى بەيجىڭدە وتكەن قازاقستان–قىتاي ىسكەرلىك كەڭەسى اياسىندا ۇيىمداستىرىلدى. شاراعا قازۇۋ باسقارما توراعاسى – رەكتور جانسەيىت تۇيمەباەۆ پەن Jiangsu Huibo Robotics Technology Co., Ltd. وكىلى لي ۆەن حانىم قاتىستى.
تاراپتار ءوزارا ىنتىماقتاستىقتى كەڭەيتۋگە جانە عىلىم مەن ءبىلىم سالاسىنداعى بىرلەسكەن جوبالاردى ىسكە اسىرۋعا نيەتتى ەكەندەرىن ءبىلدىردى. سونداي-اق جاڭا ورتالىقتىڭ الداعى ۋاقىتتا ءبىلىم, عىلىمي زەرتتەۋ جانە يننوۆاتسيانى توعىستىرعان ءىرى كلاستەرگە اينالاتىنى اتاپ ءوتىلدى.
شارا بارىسىندا ينستيتۋت پەن ورتالىققا ارنالعان بەينەروليك كورسەتىلدى. جاڭا نىسان KazNU Hub اۋماعىندا ورنالاسقان, جالپى اۋدانى – 600 شارشى مەتر. جوباعا 2,5 ملن اقش دوللارى كولەمىندە ينۆەستيتسيا قۇيىلدى. قازىرگى ۋاقىتتا مۇندا 13 زاماناۋي روبوت جۇمىس ىستەپ تۇر.
ينستيتۋت اياسىندا باكالاۆريات, ماگيستراتۋرا جانە دوكتورانتۋرا دەڭگەيلەرىندە «روبوتوتەحنيكا», «مەحاترونيكا», «جاساندى ينتەللەكت» جانە «زاتتار ينتەرنەتى» (IoT) باعىتتارىندا بىرلەسكەن ءبىلىم بەرۋ باعدارلامالارى قولعا الىنادى.
عىلىمي-زەرتتەۋ قىزمەتى دە باستى نازاردا بولماق. زەرتتەۋشىلەر وندىرىستىك, سەرۆيستىك جانە ءبىلىم بەرۋ روبوتتارى سالاسىندا تاجىريبە جۇرگىزىپ, ءوندىرىستى اۆتوماتتاندىرۋ مەن اقىلدى باسقارۋ جۇيەلەرىن ازىرلەۋگە ۇلەس قوسادى. سونىمەن قاتار جوبا شەڭبەرىندە ستارتاپتار مەن يننوۆاتسيالىق كومپانيالاردى قۇرۋ جوسپاردا بار.
بۇل باستاما قازاقستاننىڭ تسيفرلىق دامۋ باعىتىنداعى ماڭىزدى قادام بولىپ, ەلدىڭ حالىقارالىق يننوۆاتسيالىق كەڭىستىكتەگى بەدەلىن ارتتىرا تۇسەدى.
