بىرلەسكەن جوبالار جايى تالقىلاندى

الدىمەن پرەزيدەنت «China National Petroleum Coprporation (سNPC)» ديرەكتورلار كەڭەسى­نىڭ توراعاسى داي حوۋلياندى قابىلدادى.

كەزدەسۋ بارىسىندا پرەزيدەنت قاسىم-جومارت توقاەۆ «CNPC» كومپانياسى قازاقستاننىڭ مۇناي-گاز سالا­سىنداعى بۇرىننان كەلە جاتقان ستراتەگيالىق سەرىكتەسى ەكەنىن اتاپ ءوتتى. مەملەكەت باسشىسى وسى جىلدار ارالىعىندا كومپانيامەن جوعارى دەڭگەيدە ىنتىماقتاستىق ورناعانىنا نازار اۋدارىپ, ەلىمىزدىڭ ەنەرگەتيكا سەكتورى ءۇشىن ءمانى زور اۋقىمدى جوبانى بىر­گە اتقارۋعا مۇددەلى ەكەنىن جەتكىزدى.

اڭگىمەلەسۋ كەزىندە كومىر­سۋتەگىن ءوندىرۋ جانە وڭدەۋ باعى­تىنداعى ستراتەگيالىق باس­تامالاردى جۇزەگە اسىرۋ ما­سە­لەسىنە دەن قويىلدى. پرە­زي­دەنت جىلدىق قۋاتى 12 ملن تون­ناعا دەيىن جەتەتىن شىمكەنت مۇناي وڭدەۋ زاۋىتىن جاڭ­عىرتۋ وزەكتى ەكەنىن ايت­تى. سونداي-اق گاز حيمياسى ءون­دىرىسىن دامىتۋ پەرسپەكتيۆا­سىنا توقتالدى. بۇدان بولەك, اقتوبە وبلىسىنداعى كارباميد زاۋىتىنىڭ قۇرىلى­سى جونىندە پىكىر الماستى. اتالعان كاسىپورىن ەلىمىزدەگى اگروونەركاسىپ كەشەنىنىڭ وركەندەۋىنە تىڭ سەرپىن بەرەدى.

پرەزيدەنت ازيا ينفراقۇرىلىمدىق ينۆەستيتسيا­لار بانكىنىڭ پرەزيدەنتى تسزين ليتسيۋنمەن كەزدەستى.

كەزدەسۋدە قاسىم-جومارت توقاەۆ پەن تسزين ليتسيۋن قازاقستان مەن ازيا ينفراقۇرىلىمدىق ينۆەستيتسيالار بانكى (ايب) اراسىنداعى ىنتىماقتاستىقتى دامىتۋ پەرسپەكتيۆاسى جونىندە پىكىر الماستى.

قازاقستان پرەزيدەنتى ايب باسشىسىمەن 2023 جىلدىڭ مامىر ايىندا سيان قالاسىندا كەزدەسكەنىن, سودان بەرى ءوزارا قارىم-قاتىناس, اسىرەسە كولىك, ەنەرگەتيكا جانە دەنساۋلىق ساقتاۋ سەكىلدى باستى سالالاردا تىڭ سەرپىن العانىن اتاپ ءوتتى.

قاسىم-جومارت توقاەۆتىڭ ايتۋىنشا, قازاقستان بانك قىزمەتىن كەڭەيتۋگە, اتاپ ايتقاندا, «جاسىل» جانە زياتكەرلىك تەحنولوگيالاردى دامىتۋ جوبالارىن ىلگەرىلەتۋگە ارنالعان ايماقتىق الاڭعا اينالۋعا دايىن. بۇگىندە ازيا ينفراقۇرىلىمدىق ينۆەستيتسيالار بانكى ەلىمىزدەگى ستراتەگيالىق مانگە يە جوبالاردىڭ بىر­قاتارىنا 2 ملرد دوللاردان استام كولەمدە قارجى قۇي­دى. سونىڭ ىشىندە جامبىل وبلىسىنداعى ءىرى جەل ەلەكتر ستانساسى, جەزقازعان – قاراعاندى اۆتوكولىك جولى, كوك­­شە­تاۋ قالاسىنداعى كوپسالالى اۋرۋحانا قۇرىلىسى بار.

*  *  *

قاسىم-جومارت توقاەۆ «Huawei Technologies Co. LTD» ديرەكتورلار كەڭەسىنىڭ توراعاسى حۋا ءلياندى قابىلدادى.

كەزدەسۋ بارىسىندا وزىق تەحنولوگيالار مەن تسيفرلىق شەشىمدەر سالاسىنداعى ءوزارا ءتيىمدى ىنتىماقتاستىق پەرسپەكتيۆاسى قاراستىرىلدى.

مەملەكەت باسشىسى «سامۇرىق-قازىنا» ۇلتتىق ءال-اۋقات قورى مەن «Huawei» كومپانياسى اراسىندا ين­نوۆاتسيالىق تەلەكوممۋنيكاتسيا تەحنولوگيالارىن ەنگىزۋ جانە سەرۆەر ينفراقۇرىلىمىن جاڭعىر­تۋ تۋرا­لى ستراتەگيالىق كەلىسىمگە قول قويىلۋىن قۇپتادى. اتالعان ۋاعدالاستىق اياسىندا تسيفرلىق ترانس­فور­ماتسيا مەن ورنىقتى دامۋعا قاتىستى بىر­لەسكەن جوبالاردى جۇزەگە اسىرۋ جوسپارلانىپ وتىر.

بۇدان بولەك, كومپانيانىڭ ەلىمىزدەگى ءبىلىم بەرۋ باستامالارىنا ايرىقشا نازار اۋدارىلدى. «Huawei» اقپاراتتىق تەحنولوگيا, جاساندى ينتەللەكت جانە ۇلكەن دەرەكقوردى تالداۋ سالالارىندا وتاندىق بىلىكتى كادرلار دايارلاۋ ىسىنە ۇلەس قوسۋعا نيەتتى.

«Huawei» – اقپاراتتىق-كوممۋنيكاتسيالىق تەحنولوگيالار مەن سمارت-قۇرىلعىلار شىعاراتىن الەم­دەگى ءىرى كومپانيالاردىڭ ءبىرى. حالىقارالىق كور­پوراتسيا 170 ەلدە جانە ايماقتا 3 ميللياردتان استام پايدالانۋشىعا قىزمەت كورسەتەدى.

*  *  *

مەملەكەت باسشىسى «Sany Group Co. Ltd.» كورپوراتسياسى ديرەكتورلار كەڭەسىنىڭ توراعاسى سيان ۆەنبونى قابىلدادى.

اڭگىمەلەسۋ بارىسىندا «جاسىل» ەنەرگەتيكا, ماشينا جاساۋ سالالارىندا بىرلەسكەن جوبالاردى ىسكە اسىرۋ, سونداي-اق عىلىمي زەرتتەۋ جۇمىستارى جانە يننوۆاتسيالىق تەحنولوگيالار بويىنشا سەرىكتەستىك ورناتۋ ماسەلەلەرى تالقىلاندى.

قاسىم-جومارت توقاەۆ «Sany Group» كورپوراتسيا­سىنىڭ قازاقستان نارىعىنداعى قىزمەتىن جاندان­دىرۋعا ۇمتىلىسىن جوعارى باعالادى. كورپوراتسيا ەلىمىزدە ارنايى تەحنيكالاردىڭ وزىق ءوندىرىسىن جولعا قويۋعا نيەتتى.

پرەزيدەنت جامبىل وبلىسىندا جەل گەنەراتورلارىنا ارنالعان قوسالقى بولشەكتەر شىعاراتىن زاۋىتتىڭ ىسكە قوسىلۋىن ىنتىماقتاستىقتى ودان ءارى تەرەڭدەتۋ جولىنداعى ماڭىزدى قادام دەپ اتادى.

سيان ۆەنبو قىتايلىق كورپوراتسيانىڭ قازاق­ستانداعى جۇمىس جوسپارىن تانىستىردى. اتاپ ايتقاندا, «Sany Group» كومپانياسى قۋاتتىلىعى 1 گۆت بولاتىن جەل ەلەكتر ستانساسىن سالىپ جاتىر.

*  *  *

مەملەكەت باسشىسى بەيجىڭدە «China Energy Engineering Group «كومپانياسىنىڭ باس ديرەكتورى ني چجەنمەن كەزدەستى.

قاسىم-جومارت توقاەۆ پەن ني چجەن ىنتىماق­تاستىقتىڭ نەگىزگى باعىتتارى مەن بىرلەسكەن جوبالاردى دامىتۋدىڭ جاي-جاپسارىن تالقىلادى.

اڭگىمەلەسۋ بارىسىندا ەلەكتر جەلىلەرى ينفراقۇرىلىمىن جاڭعىرتۋ مەن كەڭەيتۋگە, داتا-ورتالىق سالۋعا, سونداي-اق قالدىقتاردى قايتا وڭدەۋ ارقىلى ەلەكتر قۋاتىن ءوندىرۋ جوباسىن جۇزەگە اسىرۋعا قاتىستى ماسەلەلەرگە نازار اۋدارىلدى.

«Energy China» كومپانياسى قازاقستاننىڭ سولتۇستىگى مەن وڭتۇستىگىن جالعايتىن تۇراقتى ەلەكتر جەلى­لەرىنىڭ قۇرىلىسىن جۇرگىزۋگە نيەت تانىتىپ وتىر. سونداي-اق جاڭارتىلاتىن ەنەرگەتيكا جوبالارىن ىسكە اسىرۋ مۇمكىندىگىن قاراستىرادى.

Fortune Global 500 رەيتينگىنە كىرەتىن حالىقارالىق ءىرى كومپانيا جەل, كۇن جانە جىلۋ قۋاتىن ءوندىرۋ, يادرولىق ەنەرگەتيكا, سۋ ۇنەمدەۋ مەن گيدروەنەرگەتيكا سالالارىندا جۇمىس ىستەيدى.

*  *  *

پرەزيدەنت قىتاي ۇلتتىق يادرولىق ونەركاسىپ كورپوراتسياسىنىڭ (CNNC) باس ديرەكتورى شەن يانفەندى قابىلدادى.

قاسىم-جومارت توقاەۆ شەن يانفەندى قىتاي اتوم ونەركاسىبىنە 70 جىل تولۋىمەن قۇتتىقتاپ, بۇل مەرەيلى مەجە اتالعان سالاداعى ديالوگتى ودان ءارى نىعايتۋعا جول اشاتىنىن اتاپ ءوتتى.

مەملەكەت باسشىسى توراعا سي تسزينپين­مەن جۇرگىزگەن كەلىسسوز بارىسىندا اتوم يندۋس­ت­رياسىنداعى ىنتىماقتاستىققا ايرىقشا ءمان بەرىلىپ, ماڭىزدى ۋاعدالاستىقتارعا قول جەتكىزىل­گەنىن ايتتى.

پرەزيدەنت تاجىريبەسى مول ءارى تەحنولوگياسى وزىق «CNNC» كومپانياسىمەن بىرلەسكەن جوبالار, سونىڭ ىشىندە ەلىمىزدەگى ەكىنشى اتوم ەلەكتر ستانساسىنىڭ قۇرىلىسى تابىستى جۇزەگە اسىرىلاتىنىنا سەنىم ءبىلدىردى.

*  *  *

مەملەكەت باسشىسى «CRRC» ديرەكتورلار كەڭەسىنىڭ توراعاسى سۋن يۋنتسايدى قابىلدادى.

اڭگىمەلەسۋ بارىسىندا قاسىم-جومارت توقاەۆ تەمىرجول ماشينالارىن جاساۋعا ماماندانعان الەمدەگى ەڭ ءىرى كاسىپورىنداردىڭ ءبىرى سانالاتىن «CRRC» كومپانياسىمەن ۇزاق جىل بويى جالعاسىپ كەلە جاتقان سەرىكتەستىكتى جوعارى باعالادى.

پرەزيدەنت 2023 جىلدىڭ قازان ايىندا قىتايعا جاساعان ساپارىنان كەيىن «CRRC» كومپانياسىمەن ىقپالداستىق جاڭا دەڭگەيگە كوتەرىلگەنىن اتاپ ءوتتى. «قازاقستان تەمىر جولى» ۇلتتىق كومپانياسىنا 100 ماگيسترالدى جانە 100 مانەۆرلى تەپلوۆوز جەتكىزۋ جونىندە مامىلە جاسالدى. الداعى ۋاقىتتا قتج قوسىمشا 270 گيبريدتى مانەۆرلى تەپلوۆوز ساتىپ الۋدى جوسپارلاپ وتىر. مەملەكەت باسشىسى سەرىكتەستىكتىڭ كەلەسى كەزەڭىنە ءوتۋ ماڭىزدى ەكەنىنە نازار اۋداردى. ياعني تەپلوۆوز جەتكىزۋمەن قاتار ەلىمىزدە لوكوموتيۆ ءوندىرىسىن لوكاليزاتسيالاۋ جانە سەرۆيستىك ورتالىقتار اشۋ قاجەت. پرەزيدەنتتىڭ پىكىرىنشە, بۇل وتاندىق ماشينا جاساۋ سالاسىن دامىتادى. سونداي-اق جاڭا جۇمىس ورىندارىن قۇرىپ, تەمىرجول ينفراقۇرىلىمىنا جەدەل تەحنيكالىق قىزمەت كورسەتۋگە مۇمكىندىك بەرەدى.

«CRRC» كومپانياسى جىلىنا 2 مىڭنان اسا لوكوموتيۆ, 3 مىڭ جولاۋشى جانە 50 مىڭ جۇك ۆاگونىن, سونداي-اق 11 مىڭ قوعامدىق كولىك قۇراستىرىپ شىعارادى. كاسىپورىن ءونىمى 100-دەن اسا ەلگە ەكسپورتتالادى.